សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី១៩ខែតុលា នាយករដ្ឋមន្ត្រីថៃលោក ប្រាយុទ្ធ ចាន់អូចា បានកោះប្រជុំសភាជាបន្ទាន់មួយក្នុងពេលដែលក្រុមបាតុករត្រៀមធ្វើមហាបាតុកម្មជាទ្រង់ទ្រាយធំក្នុងទីក្រុងបាងកក និងខេត្តក្រុងមួយចំនួនទៀតទូទាំងប្រទេស។
សារព័ត៌មាន AFP បានផ្សាយថា មានបាតុករថៃរាប់សិបពាន់នាក់ ភាគច្រើនជាយុវជនបាននាំគ្នាដង្ហែក្បួនបាតុកម្មរយៈពេលកន្លងមក បង្ខំឲ្យរដ្ឋាភិបាលត្រូវប្រកាសអាសន្ន ហាមប្រាមពលរដ្ឋជួបជុំគ្នាលើសពី៥នាក់ឡើង។ ប៉ុន្តែក្រុមបាតុករនៅតែបន្តប្រមូលផ្តុំគ្នាជាច្រើនមិនខ្វល់ពីច្បាប់ហាមប្រាមនោះឡើយ។
កាលពីថ្ងៃទី១៨ ខែតុលា ប៉ូលិសក្រុងបាងកកបានបញ្ជាក់ថា មានក្រុមបាតុករប្រមាណ២ម៉ឺននាក់នាំគ្នាធ្វើបាតុកម្មប្រឆាំងរដ្ឋាភិបាល។
នៅថ្ងៃទី១៩ ខែតុលានេះ ពេលក្រុមបាតុករបានឡើងគម្រោងធ្វើមហាបាតុកម្ម នាយករដ្ឋមន្ត្រី ប្រាយុទ្ធចាន់អូចាបានកោះប្រជុំសភាជាបន្ទាន់ បើទោះបីសភាបានបិទទ្វារជាបណ្តោះអាសន្នក្តី ។ កិច្ចប្រជុំជាបន្ទាន់នោះគឺដើម្បីពិភាក្សារកដំណោះស្រាយបញ្ចប់វិវាទ។
នាយករដ្ឋមន្ត្រីប្រាយុទ្ធ ចាន់អូចាបានលើកឡើងថា«យើងស្នើឲ្យបើកកិច្ចប្រជុំសភាជាបន្ទាន់ដើម្បីរកដំណោះស្រាយបញ្ចប់វិវាទ»។ ជាមួយគ្នានោះលោកប្រាយុទ្ធបានព្រមានដល់ក្រុមបាតុករ មិនត្រូវបំពានច្បាប់ឡើយ។
ក្រុមបាតុករថៃ ទាមទារឱ្យនាយករដ្ឋមន្ត្រីប្រាយុទ្ធ ចាន់អូចាលាលែងចេញពីតំណែង ហើយកែទម្រង់ច្បាប់រដ្ឋធម្មនុញ្ញជាថ្មីឡើងវិញ៕ដោយ៖ធី រីណា
