សារព័ត៌មាន នគរវត្ត តែងតែនាំមុខគេជានិច្ច
ធនាគារពិភពលោកបានប្រកាសឲ្យដឹងថា ខ្លួនបានផ្តល់កញ្ចប់ជំនួយមានទឹកប្រាក់ដល់ទៅ១ពាន់លានដុល្លារ ដើម្បីជួយដល់ប្រទេសឥណ្ឌាប្រយុទ្ធប្រឆាំងការឆ្លងរាលដាលកូវីដ-១៩។ ទឹកប្រាក់ជំនួយទាំងនោះ សម្រាប់ផលិតវ៉ាក់សាំងប្រឆាំងកូវីដ-១៩ដល់ពលរដ្ឋឥណ្ឌា។
អ្នកនាំពាក្យធនាគារពិភពលោក បានលើកឡើងថា «យើងកំពុងតែអនុវត្តកម្មវិធីកូវីដ-១៩មានតម្លៃ១ពាន់លានដុល្លារដល់រដ្ឋាភិបាលឥណ្ឌា ពិសេសនៅក្នុងវិស័យសុខាភិបាល ក្នុងការផលិតវ៉ាក់សាំងប្រឆាំងកូវីដ-១៩ ។
បច្ចុប្បន្នឥណ្ឌាស្ថិតនៅលំដាប់ទីពីរជាប្រទេសមានករណីឆ្លងច្រើនជាងគេបំផុតលើពិភពលោក។ គិតមកដល់វេលាម៉ោង៨និង៣០នាទីព្រឹកថ្ងៃទី២១ខែតុលានេះ តាមគេហទំព័រ Worldometers ឥណ្ឌាមានករណីឆ្លងកូវីដ-១៩ កើនឡើងដល់ទៅ ៧.៦៤៩.១៥៨នាក់ និងស្លាប់១១៥.៩៥០នាក់។ ប៉ុន្តែក្នុងចំណោមអ្នកឆ្លងជាង៧,៦លាននាក់នោះមានអ្នកព្យាបាលជាសះស្បើយដល់ទៅជាង ៦,៧លាននាក់ផងដែរ។
ចំណែកនៅទូទាំងពិភពលោកវិញ មានករណីឆ្លងកើនឡើងដល់ទៅ ៤១.០២៩.២៧៩នាក់ និងស្លាប់ កើនឡើង ១.១២៩.៤៩២នាក់។ ជាមួយគ្នានោះដែរក៏មានអ្នកព្យាបាលជាសះស្បើយជាង ៣០លាននាក់ផងដែរ។
កន្លងមក មានតែ៤ប្រទេសប៉ុណ្ណោះដែលមានករណីឆ្លងកូវីដ-១៩ ចាប់ពី១លាននាក់ឡើងទៅ ប៉ុន្តែនៅពេលនេះ ប្រទេសដែលមានចំនួនអ្នកឆ្លងលើសពី១លាននាក់កើនឡើងដល់ទៅ៦ប្រទេសហើយ ក្នុងនោះមានពីរប្រទេសថ្មី គឺអេស្ប៉ាញនិងអាហ្សង់ទីន។ នៅពេលដ៏ខ្លីខាងមុខនឹងមានប្រទេសជាច្រើនទៀតមានចំនួនអ្នកឆ្លងលើសពី១លាននាក់ ក្នុងនោះមានប្រទេសតំបន់អឺរ៉ុប៕
ដោយ៖ធី រីណា
