សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ដែលគេសង្ស័យថាស្រវឹងស្រា បានជិះម៉ូតូមួយគ្រឿងក្នុងល្បឿនលឿនចុះពីលើស្ពានអាកាសស្ទឹងមានជ័យដល់ផ្លូវកោងកាច់ចង្កូតមិនទាន់ក៏ជ្រុលទៅបុកបង្កាន់ដៃស្ពានបណ្តាលឲ្យដួលរងរបួសធ្ងន់បង្កការភ្ញាក់ផ្អេីលដល់ប្រជាពលរដ្ឋ កាលពីវេលាម៉ោង២០៖០០នាទីយប់ ថ្ងៃទី ២៥ ខែតុលាឆ្នាំ ២០២០ នៅចំណុចចុងស្ពានអាកាសស្ទឹងមានជ័យខាងជើងតាមបណ្ដោយផ្លូវលេខ២៧១ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសរងគ្រោះនេះជិះម៉ូតូម៉ាកហុងដាឌ្រីម ស៊េរីឆ្នាំ ២០១៣ ពណ៌ខ្មៅពាក់ស្លាកលេខកំពង់ចាម1G-2524 ធ្វើដំណើរតាមបណ្ដោយផ្លូវលេខ២៧១ឡើងស្ពានអាកាសស្ទឹងមានជ័យក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើ ដោយសារផ្លូវកោងកាច់ចង្កូតមិនទាន់ក៏ជ្រុលទៅបុកបង្កាន់ដៃស្ពានអាកាសដួលបោកនឹងខឿនស្ពានរងរបួសធ្ងន់។
ក្រោយកើតហេតុ ជនរងគ្រោះត្រូវបានរថយន្តសង្គ្រោះបន្ទាន់ដឹកយកទៅកាន់មន្ទីពេទ្យភ្លាមៗ។ ចំណែកម៉ូតូត្រូវបានសមត្ថកិច្ចយកទៅរក្សាទុកបណ្ដោះអាសន្ននៅប៉ុស្តិ៍នគរបាលរដ្ឋបាលស្ទឹងមានជ័យទី១ រង់ចាំប្រគល់ជូនសាច់ញាតិ ឬជនរងគ្រោះនៅពេលក្រោយ ៕ ដោយ៖ ភារ៉ា ដង្កោ
