សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ ពិតជាអកុសលណាស់ដែលស្រ្តីម្នាក់បានធ្លាក់ពីលើទូកបណ្តាលឲ្យលង់ទឹកស្លាប់ ខណ:អុំទូកត្រឡប់មកពីមើលស្រែប្រាំងដោយអាការ:មិនស្រួលខ្លួន។
ហេតុការណ៍នេះបង្កឲ្យភ្ញាក់ផ្អើលកាលពីព្រឹកថ្ងៃទី០២ ខែវិច្ឆិកា ឆ្នាំ២០២០ នៅចំណុចបឹងកផល ភូមិវត្តថ្មី ឃុំតាជេស ស្រុកកំពង់ត្រឡាច ខេត្តកំពង់ឆ្នាំង។
មន្រ្តីនគរបាលមូលដ្ឋានបានឲ្យដឹងថា សាកសពជនរងគ្រោះឈ្មោះ វ៉ែន លី ភេទស្រី អាយុ៤៧ ឆ្នាំ មុខរបរ កសិករ រស់នៅភូមិ-ឃុំកើតហេតុខាងលើ។មុនពេលកើតហេតុជនរងគ្រោះបានអុំទូកត្រឡប់ពីមើលស្រែប្រាំងមកផ្ទះវិញហើយដោយមានអាការៈមិនស្រួលខ្លួនជនរងគ្រោះក៏បានធ្លាក់ទឹកបណ្ដាលឱ្យលង់ទឹកស្លាប់ដោយគ្មានអ្នកណាដឹងជួយទាន់ឡើយ ។ លុះពេលបាត់ជនរងគ្រោះយូរមិនឃើញមកដល់ផ្ទះក្រុមគ្រួសារទៅរកមើលដល់បឹងឃើញតែទូកអណ្តែតលើទឹកក៏នាំគ្នាចុះរាវក្នុងទឹកទើបឃើញសពស្រង់មកដាក់លើគោករួចរាយការណ៍ប្រាប់សមត្ថកិច្ចតែម្តង។
បន្ទាប់មកសមត្ថកិច្ចជំនាញបានចុះទៅពិនិត្យសាកសពស្រ្តីរងគ្រោះខាងលើដល់កន្លែងកើតហេតុ រួចបញ្ជាក់ថា ជនរងគ្រោះពិតជាស្លាប់ដោយសារលង់ទឹកប្រាកមែន ហើយក៏ប្រគល់ជូនសាច់ញាតិយកទៅធ្វើបុណ្យតាមប្រពៃណី៕
ដោយ៖ប្រាថ្នា
