សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមលទ្ធផលបោះឆ្នោតបណ្ដោះអាសន្នរបស់សហរដ្ឋអាមេរិកដែលដកស្រង់ចេញផ្សាយដោយកាសែត The New York Times បាននិយាយថា បក្សប្រជាធិបតេយ្យ នឹងបន្តកាន់កាប់សភាតំណាងដដែល ខណៈកំពុងនាំមុខបក្សសាធារណរដ្ឋក្នុងការបោះឆ្នោតថ្ងៃទី៣ ខែវិច្ឆិកា។ ចំណែកនៅព្រឹទ្ធសភាវិញ ការប្រជែងកៅអីភាគច្រើននៅប្រទាញប្រទង់ខ្លាំង។ បើទោះជាមិនអាចគ្រប់គ្រងសភាតំណាងបាន ប៉ុន្តែបក្សសាធារណរដ្ឋអាចធ្វើបានល្អដោយអាចដណ្ដើមអាសនៈមកវិញបានខ្លះ បើធៀបនឹងការបោះឆ្នោតឆ្នាំ២០១៨ ។
ជាក់ស្តែងការបង្ហាញពីលទ្ធផលបណ្តោះអាសន្ននៃការបោះឆ្នោតអាមេរិកបក្សប្រជាធិបតេយ្យកំពុងមាន២០៥អាសនៈ ទល់នឹង១៩០អាសនៈដែលបក្សសាធារណរដ្ឋទទួលបានក្នុងសភាតំណាងដែលមានអាសនៈ៤៣៥។ខណៈបក្សប្រជាធិបតេយ្យត្រូវការអាសនៈបន្ថែមចំនួនត្រឹមតែ១៣ទៀតប៉ុណ្ណោះ ក្នុងការគ្រប់គ្រងសភាតំណាងនីតិកាលទី១១៧។ ព្រោះសំឡេងភាគច្រើនដាច់ខាតគឺ២១៨។ រីឯអាសនៈចំនួន៤០ទៀត ពុំទាន់ប្រកាសលទ្ធផល ព្រោះការរាប់សន្លឹកឆ្នោតនៅបន្តធ្វើនៅឡើយ។
បើតាមកាសែត The New York Times បានចេញផ្សាយថាតំណាងរាស្ត្រស្ត្រីឈានមុខចំនួន៤រូប ដែលជាអតីតសកម្មជនបរិស្ថានសិទ្ធិមនុស្សសុខភាព និងសិទ្ធិពលរដ្ឋស្បែកខ្មៅ និងជាឈាមជំនាន់ថ្មីរបស់បក្សប្រជាធិបតេយ្យ ក៏ជាប់ឆ្នោតសារជាថ្មី ដោយសំឡេងយ៉ាងច្រើនលើសលុបទល់នឹងគូប្រជែងរបស់ខ្លួន។ តំណាងរាស្រ្តស្រ្តីនោះ៖ មានលោកស្រីAlexandria Ocasio-Cortez, Ilhan Omar, Ayanna Pressley និងRashida Tlaib។
សូមជម្រាបថា ក្នុងការបោះឆ្នោតជ្រើសរើសសមាជិកព្រឹទ្ធសភា រដ្ឋ Arizona និងColorado ដែលមានអាសនៈ១រៀងខ្លួនធ្លាក់ទៅក្នុងការគ្រប់គ្រង់របស់បក្សប្រជាធិបតេយ្យវិញ។ រដ្ឋទាំង២ខាងលើ កាលពីអាណត្តិមុនគ្រប់គ្រងដោយបក្សសាធារណរដ្ឋ។ ដូចគ្នានេះដែរ រដ្ឋAlabama បានទៅបក្សសាធារណរដ្ឋវិញ។ សម្រេចសម្រួច លទ្ធផលបណ្តោះអាសន្ន បង្ហាញថាបក្សប្រជាធិបតេយ្យកើនឡើង១អាសនៈ។ ចំណែកអាសនៈចំនួន៤ នៅរដ្ឋAlaska (មួយអាសនៈ), Georgia (ពីរអាសនៈ), North Carolina (មួយអាសនៈ), និង Alaska(មួយអាសនៈ) ពុំទាន់បញ្ចប់ការរាប់សន្លឹកឆ្នោតឡើយ ដោយការរាប់សន្លឹកឆ្នោតដែលផ្ញើរតាមប្រៃសនីយ៍ ចាប់ផ្តើមក្រោយការបោះឆ្នោតថ្ងៃទី៣ វិច្ឆិកាបញ្ចប់ទាំងស្រុង។
ដោយឡែកនៅព្រឹទ្ធសភាអាមេរិកវិញ អាសនៈចំនួន៣៥ ត្រូវដាក់ប្រកួតប្រជែងក្នុងចំណោម១០០អាសនៈ។ បើគិតជារួមមក បក្សសាធារណៈរដ្ឋទទួលបាន៤៨អាសនៈ ចំណែកបក្សប្រជាធិបតេយ្យទទួលបាន៤៨អាសនៈដូចគ្នា ហើយមានអាសនៈ៤ទៀតដែលពុំទាន់ចេញលទ្ធផល៕ដោយ៖ស តារា
