សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ យុវជនជាសិស្ស២នាក់បានរងរបួសខណៈជិះម៉ូតូមិនគោរពសិទ្ធិអាទិភាពទៅបុករថយន្តមួយគ្រឿងដែលបើកបញ្ច្រាសទិសគ្នាយ៉ាងពេញទំហឹងលាន់ស្នូរដូចរន្ទះបង្កការភ្ញាក់ផ្អើលដល់អ្នកភូមិនិងសមត្ថកិច្ចមកធ្វើអន្តរាគមន៍ហៅរថយន្តសង្គ្រោះដឹកយកទៅព្យាបាលនៅមន្ទីរពេទ្យខេត្តស្វាយរៀង។
ហេតុការណ៍នេះបានកើតឡើងកាលពីវេលាម៉ោង៩និង២០នាទីព្រឹកថ្ងៃទី៧ ខែវិច្ឆិកា ឆ្នាំ២០២០ នៅលើផ្លូវជាតិលេខ១ ត្រង់ចន្លោះគីឡូម៉ែត្រលេខ១២៦និង១២៧ ស្ថិតក្នុងភូមិបាក់រនាស់ សង្កាត់សង្ឃ័រ ក្រុងស្វាយរៀង ។
បើតាមសមត្ថកិច្ចនគរបាលក្រុងស្វាយរៀងបានឱ្យដឹងថា ជនរងគ្រោះទាំង២នាក់ម្នាក់មានឈ្មោះ ពន្លឺ រស្មី អាយុ១៦ឆ្នាំ មុខរបរសិស្ស និងម្នាក់ទៀតឈ្មោះជា ជំនិត អាយុ១៦ឆ្នាំ មុខរបរ សិស្ស រស់នៅភូមិ រកា ឃុំ រកា ស្រុកពារាំង ខេត្តព្រៃវែង។
ចំណែកអ្នកបើករថយន្តមានឈ្មោះ ឆាយ ចំរុង ភេទប្រុស អាយុ៣១ឆ្នាំ មុខរបរ បើកបរ រស់នៅភូមិប្រសូត្រទី១ ឃុំ កណ្ដៀងរាយ ស្រុកស្វាយទាប ខេត្តស្វាយរៀង។
បើតាមសាក្សីបានឲ្យដឹងថា មុនពេលកើតហេតុមានម៉ូតូមួយគ្រឿងម៉ាកហុងដាសេ ១២៥ ពណ៌ខ្មៅ ពាក់ស្លាកលេខ ភ្នំពេញ ១CJ-២១៥៦បើកក្នុងទិសដៅពីជើងទៅត្បូង ដោយមិនគោរពសិទ្ធិអាទិភាព ស្រាប់តែមានរថយន្ដមួយគ្រឿងម៉ាកSCANIA ពណ៌ខៀវលាយទឹកប្រាក់ ពាក់ស្លាកលេខស្វាយរៀង៣A -១៨២៨ បើកក្នុងទិសដៅពីលិចទៅកើតបញ្ច្រាសគ្នាចាប់ហ្វ្រ័ងមិនទាន់ក៏បុកយ៉ាងពេញទំហឹងបង្កការភ្ញាក់ផ្អើលតែម្តង។
ក្រោយកើតហេតុអ្នករបួសទាំង២នាក់ត្រូវបានសមត្ថកិច្ចហៅរថយន្តសាមុយដឹកយកទៅសង្គ្រោះនៅមន្ទីរពេទ្យខេត្តស្វាយរៀង។ ចំណែកមធ្យោបាយធ្វើដំណើររថយន្តនិងម៉ូតូទាំង២គ្រឿងសមត្ថកិច្ចវាស់វែងនិងអូសយកទៅរក្សាទុកនៅអធិការដ្ឋាននគរបាលក្រុងស្វាយរៀង ដើម្បីដោះស្រាយពេលក្រោយ៕ យឹម សុថាន
