សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បំណែកសាកសពមនុស្សម្នាក់ ត្រូវបានប្រជាពលរដ្ឋដើរបាញ់សត្វប្រទះឃើញនៅក្នុងព្រៃឬស្សីកណ្តាលវាស់ស្រែហើយរាយការណ៍ប្រាប់សមត្ថកិច្ចចុះទៅត្រួតពិនិត្យជាក់ស្តែង។
ហេតុការណ៍នេះ បង្កឲ្យមានការភ្ញាក់ផ្អើលកាលពីព្រឹកថ្ងៃទី១៨ ខែវិច្ឆិកាឆ្នាំ២០២០ នៅក្នុងព្រៃឬស្សីចំណុចទួលអ្នកតា៤មុខ ក្នុងភូមិកោះរងៀងសង្កាត់ពន្សាំង ខណ្ឌព្រែកព្នៅ រាជធានីភ្នំពេញ។
សាកសពរូបនោះ គេពុំដឹងថា ប្រុសឬស្រីនោះឡើយដែលមានសភាពស្អុយរលួយ សល់តែលលាក្បាល និងដៃ និងដងខ្លួននៅដាច់ដោយឡែកពីគ្នា។
តាមប្រភពពីលោក សា រុន ភេទប្រុស អាយុ៣៩ឆ្នាំ មានលំនៅ ភូមិ កាន់ទ្រុង សង្កាត់ពន្សាំង ខណ្ឌព្រែកព្នៅ បានឲ្យដឹងថា នៅវេលាម៉ោងប្រមាណ១០យប់ថ្ងៃទី១៧ខែ វិច្ឆិកាម្សិលមិញនេះ ឆ្នាំ២០២០ រូបគាត់នឹងបងប្រុសរបស់ខ្លួន បានដើរឆ្លុះបាញ់សត្វនៅក្នុងព្រៃ ស្រាប់តែធំក្លិនស្អុយ និងប្រទះឃើញបំណែកដៃសាកសពមនុស្ស និង ប្រទះឃើញលលាដ៏ក្បាល ភ្លាមៗនោះ ក៏បានប្រញាប់ប្រញ៉ាល់ត្រឡប់ទៅផ្ទះវិញហើយរាយការណ៍ប្រាប់នគរបាលចុះទៅទាំងយប់។ លុះព្រឹកឡើង ក៏បានរាយការណ៍ ទៅនគរបាលជំនាញចុះទៅត្រួតពិនិត្យតែម្តង ។
បើតាមប្រភពព័ត៌មានដដែល បានឲ្យដឹងទៀតថា លុះនៅព្រឹកថ្ងៃទី១៨នេះសមត្ថកិច្ចនគរបាលមូលដ្ឋានខណ្ឌព្រែកព្នៅ ក៏បានចុះទៅកន្លែងកើតហេតុក៏បានប្រទះឃើញ គ្រោងឆ្អឹង ដងខ្លួនផ្នែកខាងក្រោយ នៅក្នុងព្រៃឬស្សីលលាដ៏ក្បាលនិងដៃឃ្លាតពីដងខ្លួន។នៅដើមឈើ មានអាវជាប់ដើមឈើនិងមួក ស្រ្តីនៅជាប់នឹងឬស្សី ។
បើតាមការអះអាងពីនគរបាលជំនាញ ជំហានដំបូងមានការសង្ស័យថា សពជាស្រ្តី ដែលចងកសម្លាប់ខ្លួន អស់រយៈពេល ប្រមាណជាង១ខែមកហើយ ។ខណះដែលសពស្អុយរលួយ ត្រូវបានសត្វពាំអូសទៅជាបំណែកៗ។ទោះបីជាយ៉ាងណាគេពុំទាន់ស្គាល់អត្តសញ្ញាណសពនោះឡើយ ។ចំណែកការស្លាប់គេពុំទាន់ដឹងជាករណីអ្វី ពិតប្រាកដនោះដែរ។
ក្រោយកើតហេតុសពខាងលើ ត្រូវបានសមត្ថកិច្ចយកកង់ឡានទៅដុតបូជាចោលនៅណ្តាលវាលនោះតែម្តង៕
ដោយ៖ព្រែក សំរោង
