អាមេរិកបញ្ជូនក្រុមនាវាផ្ទុកយន្តហោះទៅតំបន់មជ្ឈិមបូព៌ា ក្រោយការស្លាប់អ្នកវិទ្យាសាស្ត្របរមាណូអុីរ៉ង់​

រដ្ឋាភិបាលអុីរ៉ង់​បានថ្កោលទោសយ៉ាងខ្លាំងដល់អុីស្រាអែលដែលនៅពីក្រោយការធ្វើឃាតអ្នកវិទ្យាសាស្ត្របរមាណូលំដាប់កំពូលរបស់អុីរ៉ង់​។ នៅពេលនេះកម្លាំងទាហានអុីរ៉ង់ បានត្រៀមលក្ខណៈវាយប្រហារទៅលើប្រទេសអុីស្រាអែល ដោយ«ព្យុះមីស៊ីលរាប់ពាន់ដើម»។
ប្រធានាធិបតីអុីរ៉ង់ លោក ​Hassan Rouhani បានបញ្ជាក់ថា​ នឹងមានការតបតវិញទៅលើ​ប្រទេសអុីស្រាអែល ​ ប៉ុន្តែអុីរ៉ង់មិនប្រញាប់ប្រញាល់នោះឡើយ​គឺមានការប្រុងប្រយ័ត្នខ្ពស់បំផុត។
ស្ថានភាពនៅក្នុងតំបន់ព្រំដែន កាន់តែតានតឹងខ្លាំង​ ហើយអាមេរិកក៏បានបញ្ជូនក្រុមនាវាផ្ទុកយន្តហោះ ដែលមាននាវា USS Nimitz ​ទៅកាន់តំបន់មជ្ឈិមបូព៌ា ជាការត្រៀមលក្ខណៈធ្វើសង្គ្រាម វាយប្រហារអុីរ៉ង់​ ប្រសិនបើអុីរ៉ង់ហ៊ានវាយប្រហារអុីស្រាអែលនោះ។
ការប្រឈមមុខតានតឹងរវាងអុីរ៉ង់នឹងអុីស្រាអែលកាន់តែខ្លាំងឡើង ក្រោយពេលបិតាបច្ចេកវិទ្យាបរមាណូអុីរ៉ង់​​លោកMohsen Fakhrizadeh រងការធ្វើឃាតកាលពីថ្ងៃទី​២៧ខែវិច្ឆិកា ហើយអុីរ៉ង់​បានចោទប្រកាន់អាមេរិក និងអុីស្រាអែលជាអ្នកនៅពីក្រោយ​។ ជាមួយគ្នានោះដែរអុីរ៉ង់​ក៏បានចេញបញ្ជាដល់កម្លាំងទាហានទាំងអស់ ត្រៀមលក្ខណៈធ្វើសង្គ្រាម។ មីស៊ីលរបស់អុីរ៉ង់រាប់ពាន់ដើមបានត្រៀមរួចរាល់រង់ចាំតែបទបញ្ជាប៉ុណ្ណោះ នឹងវាយប្រហារទៅលើប្រទេសអុីស្រាអែលជាមិនខាន។
ចំណែកកម្លាំងទាហានអុីស្រាអែលវិញ​ក៏បានត្រៀមលក្ខណៈរួចរាល់ ដែរ ពិសេសគឺប្រព័ន្ធមីស៊ីលការពារដែនអាកាស ដោយខ្លាចអុីរ៉ង់វាយប្រហារ ៕ដោយ៖ធី រីណា