សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អគ្គិភ័យបានឆេះតូបលក់បាយតូចមួយ ដោយសារតែម្ចាស់តូបបានបិទទ្វារត្រឡប់ទៅផ្ទះហើយភ្លេចពន្លត់ចង្ក្រាន។
ហេតុការណ៍នេះបានបង្កការភ្ញាក់ផ្អើលកាលពីវេលាម៉ោង ៤និង០០នាទីរសៀលថ្ងៃទី ១ ខែធ្នូ ឆ្នាំ២០២០ ស្ថិតនៅតាមបណ្ដោយផ្លូវលេខ៥២៨ ត្រង់ចំណុចតូបមួយកន្លែង ក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ។
តាមប្រភពព័ត៌មានពីម្ចាស់តូបបានលើកឡើងថា តូបរបស់ខ្លួនបានលក់បាយ និងភេសជ្ជៈផ្សេងៗទៀត។ បន្ទាប់ពីដល់ម៉ោងត្រូវបិទតូបដើម្បីត្រឡប់ទៅផ្ទះ វិញរូបគាត់ភ្លេចពន្លត់ចង្ក្រានធ្យូងរហូតបានរយៈពេលប្រហែលជាមួយម៉ោងជាង ក៏បង្កជាអគ្គិភ័យឆាបឆេះតូបរបស់ខ្លួនបែបនេះតែម្តង។
ប្រភពពីស្ត្រីជាម្ចាស់តូបបានប្រាប់ឲ្យដឹងថា គឺជាកំហុសរបស់គាត់ដែលចាកចេញពីតូបខ្វះការប្រុងប្រយ័ត្នមិនបានមើលភ្លើងចង្ក្រាន ភ្លើងធូប ភ្លើងទៀន ទើបបណ្ដាលឲ្យឆាបឆេះផ្អើលអស់គេឯងបែបនេះ។
សូមបញ្ជាក់ថា កម្លាំងសមត្ថកិច្ចបានយករថយន្តពន្លត់អគ្គិភ័យចំនួនមួយគ្រឿងរបស់កងកម្លាំងប៉េអឹមមកដល់ទីតាំងកើតហេតុ រួចធ្វើការបាញ់ទឹកពន្លត់រហូតដល់អគ្គិភ័យរលត់ទៅវិញ នៅវេលាម៉ោង ៤និង២០នាទីថ្ងៃខែឆ្នាំដដែល ហើយនៅក្នុងករណីនេះគឺមិនបណ្ដាលឲ្យនរណាម្នាក់រងរបួសនោះទេ គ្រាន់តែខូចខាតសម្ភារនៅក្នុងតូបប៉ុណ្ណោះ៕
ដោយ៖រ៉ារ៉ា
