សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សង្សារមួយគូបើករថយន្តលឿនមិនប្រយ័ត្នទៅបុករបាំងថ្មពុះចែកទ្រូងផ្លូវបាក់អស់២កង់ ហើយរថយន្តនៅមិនទាន់អស់ល្បឿនបានជ្រុលទៅបុកម៉ូតូមួយគ្រឿងទៀតបណ្តាលឲ្យរងការខូចខាត ហើយក្រោយកើតហេតុ អ្នកបើករថយន្តនិងអ្នករួមដំណើរបានរត់គេចចេញពីកន្លែងកើតហេតុបាត់ស្រមោល។
ហេតុការណ៍នេះបានកើតឡើងនៅម៉ោង ១និង៥០នាទីរំលងអធ្រាត្រឈានចូលថ្ងៃព្រហស្បតិ៍ទី ២៤ ខែធ្នូ ឆ្នាំ២០២០ នៅតាមបណ្ដោយមហាវិថីសហព័ន្ធរុស្ស៊ី ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
ប្រភពព័ត៌មានពីបុរសម្នាក់ជាកម្មករស៊ីនទ្រីបានបញ្ជាក់ថា មុនពេលកើតហេតុគាត់បានឃើញមនុស្សប្រុសស្រីពីរនាក់ទំនងជាគូសង្សារបានបើករថយន្តម៉ាក Lexus NS250h មួយគ្រឿងពណ៌សពាក់ស្លាកលេខ ភ្នំពេញ 2AG-5253 ធ្វើដំណើរតាមបណ្ដោយផ្លូវសហព័ន្ធរុស្ស៊ី ក្នុងទិសដៅពីលិចទៅកើតក្នុងល្បឿនលឿន ខណៈមកដល់ចំណុចកើតហេតុបានជ្រុលទៅបុករបាំងថ្មពុះចែកទ្រូងផ្លូវពេញទំហឹងបណ្តាលឲ្យបាក់អស់២កង់ ចំណែករថយន្តនៅមិនទាន់អស់ល្បឿនបានជ្រុលទៅបុកម៉ូតូមួយគ្រឿងទៀតបណ្តាលឲ្យរងការខូចខាត តែសំណាងល្អដែរដែលនៅក្នុងហេតុការណ៍នេះមិនមានអ្នករងរបួស ។ក្រោយកើតហេតុ អ្នកបើករថយន្តនិងអ្នករួមដំណើរបានរត់គេចចេញពីកន្លែងកើតហេតុបាត់ស្រមោល។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់ហើយទំនាក់ទំនងទៅសមត្ថកិច្ចជំនាញចរាចរណ៍ចុះមកវាស់វែងស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោករង់ចាំដោះស្រាយគ្នានៅពេលក្រោយ៕ជ្រោយពេជ្រ
