សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិចិនម្នាក់ស្រវឹងស្រាបើករថយន្តtoyota prius មួយគ្រឿងមិនប្រកាន់ស្ដាំចូលទៅកន្លងផ្លូវម្ខាងទៀតជ្រុលទៅបុករថយន្តហ៊ីយ៉ាន់ដាយមួយ គ្រឿងពេញទំហឹងបណ្ដាលឲ្យរងការខូចខាតយ៉ាងដំណំ រួចកើតជាជម្លោះពាក្យសំដីដាក់គ្នាមួយប្រាវរកបង្កហិង្សារ បង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋនិងសមត្ថកិច្ចកាលពីវេលាម៉ោង១១ យប់ថ្ងៃទី២៧ ខែធ្នូឆ្នាំ ២០២០ ស្ថិតនៅតាមបណ្ដោយផ្លូវ ២០១១ ជិតនិងផ្លូវរថភ្លើងក្នុងសង្កាត់កាកាបទី១ ខណ្ឌពោធិ៍សែនជ័យរាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសជនជាតិចិនម្នាក់បើករថយន្ត toyota prius ពណ៌ទឹកប្រាក់មួយគ្រឿងពាក់ស្លាកលេខភ្នំពេញ2AV-4458ធ្វើដំណើរទៅដៅពីត្បូងទៅជើងក្នុងស្ថានភាពស្រវឹង លុះមកដល់ចំណុចកើតហេតុខាងលើមិនប្រកាន់ស្ដាំ ចូលទៅកន្លងផ្លូវម្ខាងទៀតជ្រុលទៅបុកចំពីមុខរថយន្តហ៊ីយ៉ាន់ដាយមួយគ្រឿងក្បាលពណ៌ស ពាក់ស្លាកលេខភ្នំពេញ2BI-1032ធ្វើដំណើរបញ្ច្រាសទិសដៅគ្នាពីជើងទៅត្បូងពេញទំហឹងបណ្ដាលឲ្យរថយន្តទាំងពីរគ្រឿងរងការខូចខាតយ៉ាងដំណំ ខណៈនោះគេឃើញបុរសជនជាតិចិនចុះពីលើរថយន្តឡាំប៉ាស្រែកឡូឡារកបង្កហិង្សាទៅលើខាងភាគីរថយន្តហ៊ីយ៉ាន់ដាយបន្ថែមទៀត ទើបបង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋនិងសមត្ថកិច្ចចុះមកអន្តរាគមន៍ភ្លាមៗ។
ក្រោយកើតហេតុសមត្ថកិច្ចបាននាំខ្លួនបុរសជនជាតិចិនយកទៅធ្វើការវាស់ជាតិស្រវឹង ចំណែករថយន្តទាំងពីរគ្រឿងសមត្ថកិច្ចធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យរង់ចាំធ្វើការដោះស្រាយគ្នាទៅតាមផ្លូវច្បាប់៕
ដោយ៖សុខា សែនជ័យ
