សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រោយពីវិលចូលប្រឡូកក្នុងសិល្បៈមួយរយៈពេលខ្លីប៉ុណ្ណោះ លី រដ្ឋាទទួលបានការគាំទ្រច្រើនគួរសមពីទស្សនិកជន។ គាំទ្រព្រោះតែរូបសម្រស់ អត្តចរិក និងទេពកោសល្យនៃការសម្តែងដែលជាចំណុចចាំបាច់របស់សិល្បករគឺនាងមានគ្រប់គ្រាន់។ កាន់តែធ្វើឲ្យទស្សនិកជនពេញចិត្តនិងចាប់អារម្មណ៍គឺក្រោយពីនាងបង្ហាញវត្តមានក្នុងការសម្តែងក្នុងបទចម្រៀងថ្មីកំពុងពេញនិយមពីសំណាក់ក្រុមយុវវ័យនោះគឺបទ”សង្សារក្មេងស្ទាវ”ដែលជាការបកស្រាយបទចម្រៀងរបស់តារាលំដាប់ជួរមុខរបស់ផលិតកម្មហ្គាឡាក់ស៊ីណាវ៉ាត់ត្រា។ បទចម្រៀងនេះមានអត្ថន័យឆ្លុះបញ្ចាំងពីតថភាពក្នុងសង្គមដែលបុរសវ័យចំណាស់សម្តែងដោយលោក សាវីនហ្វីលីព និងស្រីក្មេងសម្តែង ដោយ កញ្ញា លី រដ្ឋានោះឯង។ នាងទទួលបានការកោតសរសើរច្រើនលើសមត្ថភាពទេពកោសល្យនៃការសម្តែង និងធ្វើឲ្យអ្នកទស្សនាស្លុងអារម្មណ៍ទៅតាមអត្ថន័យនៃសាច់រឿងដ៏ចាក់ដោតនោះ។
តារាស្រីរូបនេះបញ្ជាក់ថា នាងពិតជារីករាយដែលទទួលបានការកោតសរសើរច្រើនលើការសម្តែងបទចម្រៀងមួយនេះ។ នាងថាកន្លងមកនាងក៏ធ្លាប់ចូលរួមសម្តែងក្នុងភាពយន្តភាគ និងភាពយន្តអប់ខ្នាតខ្លី និងបទចម្រៀងក្នុងផលិតកម្មមួយចំនួនផងដែរ ហើយក្រៅពីតារាសម្តែង នាងក៏ជាអ្នកបង្ហាញម៉ូតឯករាជម្នាក់ផងដែរ។ នាងថាកន្លងមកនាងធ្លាប់ចូលប្រឡូកក្នុងអាជីពសិល្បៈកាលពី៥ឆ្នាំមុនប៉ុន្តែដោយរវល់នឹងមុខជំនួញអនឡាញទើបនាងដកឃ្លាមួយរយៈ និងទើបតែវិលរកការងារសិល្បៈជិត១ឆ្នាំនេះប៉ុណ្ណោះ ប៉ុន្តែនាងទទួលបានឱកាសច្រើនក្នុងការសម្តែង ពិសេសការងារថតឈុតផ្សព្វផ្សាយពាណិជ្ជកម្ម។ តារាស្រីវ័យ២៥ឆ្នាំរូបនេះថានាងក៏មានគម្រោងការងារសិល្បៈមួយចំនួនទៀតដែលនាងបង្ហាញក្នុងពេលដ៏ខ្លីខាងមុខដែលនាងរំពឹងថានឹងទទួលបានការគាំទ្រច្រើនពីទស្សនិកជន៕
ដោយ៖ វឌ្ឍនា
