សារព័ត៌មាន នគរវត្ត តែងតែនាំមុខគេជានិច្ច
គេហទំព័រអន្តរជាតិ worldmeter បានផ្សាយថា មកទល់វេលាម៉ោង១៩ ថ្ងៃទី៣ខែមករាឆ្នាំ២០២១ មានមនុស្សសរុបចំនួន ៨៥,០៤៩,៩៧៧នាក់ឆ្លងជំងឺកូវីដ-១៩ ដែលក្នុងនោះអ្នកជំងឺចំនួន ១,៨៤៥,០៧៦នាក់បានស្លាប់ និង ៦០,១៧៩,០៥៦នាក់ផ្សេងទៀតត្រូវបានព្យាបាលឲ្យជាសះស្បើយឡើងវិញ ។
មកទល់ពេលនេះ មានប្រទេស៣០ហើយបានចាប់ផ្តើមចាក់វ៉ាក់សាំង ក្នុងនោះមានពលរដ្ឋតែជាង១២លាននាក់ប៉ុណ្ណោះទទួលបានការចាក់វ៉ាក់សាំង។ បច្ចុប្បន្នការឆ្លងរាលដាលបន្តកើនឡើងខ្ពស់ដដែល ក្នុងនោះមានទីក្រុងតូក្យូជប៉ុនរកឃើញមានអ្នកឆ្លង ៨០០នាក់ក្នុងមួយថ្ងៃដែលជាចំនួនខ្ពស់បំផុតមិនធ្លាប់មានពីមុនមក។
តាមសារព័ត៌មាន CNA នៅយប់ថ្ងៃអាទិត្យ ទី០៣ ខែមករា ឆ្នាំ២០២១បានផ្សាយថា អាជ្ញាធរក្រុងតូក្យូនៃប្រទេសជប៉ុន បានរាយការណ៍ពីការរកឃើញករណីថ្មីៗ នៃជំងឺ COVID-19 ចំនួន ៨១៦ករណីទៀត នៅថ្ងៃអាទិត្យនេះ គឺមួយថ្ងៃបន្ទាប់ពីអភិបាលក្រុងនេះ និងតំបន់ជិតខាង បានអំពាវនាវឲ្យរដ្ឋាភិបាលជប៉ុនប្រកាសស្ថានភាពអាសន្ន ដើម្បីប្រយុទ្ធប្រឆាំងនឹងការកើនឡើងនូវករណីថ្មីៗ។
នាយករដ្ឋមន្រ្តីជប៉ុន លោក Yoshihide Suga បានជំទាស់នឹងការអំពាវនាវឲ្យប្រកាសដាក់ប្រទេសក្នុងស្ថានភាពអាសន្នថ្នាក់ជាតិទីពីរ ខណៈដែលរដ្ឋាភិបាលរបស់ខ្លួន បានដាក់ចេញនូវវិធានការនេះជាលើកដំបូង ក្នុងខែមេសាកន្លងទៅ អំឡុងពេលមានរលករាតត្បាតខ្លាំងបំផុត។
រដ្ឋមន្រ្តីក្រសួងសេដ្ឋកិច្ចជប៉ុន បានប្រាប់អ្នកយកព័ត៌មានកាលពីថ្ងៃសៅរ៍ម្សិលមិញថា រដ្ឋាភិបាលចាំបាច់ត្រូវពិគ្រោះយោបល់ជាមួយអ្នកជំនាញសុខភាពជាមុនសិន មុនពេលធ្វើការសម្រេចចិត្តដ៏សំខាន់នេះ។ ទោះជាយ៉ាងណា រដ្ឋមន្ត្រីរូបនេះបាននិយាយថា ជាវិធានការបណ្តោះអាសន្ននាពេលបច្ចុប្បន្ន ភោជនីយដ្ឋាន និងហាងខារ៉ាអូខេនៅក្នុងទីក្រុងតូក្យូ ត្រូវបានស្នើសុំឲ្យបិទទ្វារ នៅត្រឹមម៉ោង៨ យប់ ខណៈដែលអាជីវកម្មលក់គ្រឿងស្រវឹង តម្រូវឲ្យបិទទ្វារនៅម៉ោង៧ យប់។
ក្រសួងសុខាភិបាលជប៉ុនបានឲ្យដឹងថា នៅថ្ងៃអាទិត្យនេះ មានករណីឆ្លង COVID-19 ថ្មីៗនៅទូទាំងប្រទេសចំនួន ៣,០៤៥ករណី។ ជាសរុប ចាប់តាំងពីមានការផ្ទុះរាតត្បាតជំងឺដ៏កាចសាហាវនេះមក ជប៉ុន បានកត់ត្រាករណីឆ្លងច្រើនជាង ២៤០,០០០ករណី ក្នុងនោះស្លាប់ ៣,៥៤៨ នាក់៕
ដោយ៖ធី រីណា
