សង្ស័យម្ចាស់ស្រវឹងស្រាបើករថយន្តរេចង្កូតទៅបុកបង្គោលភ្លើងធ្លាក់ចូលស្រះទឹកមុខវិទ្យាល័យស្វាយរៀង

ខេត្តស្វាយរៀង៖ រថយន្តឡិចស៊ីសមួយគ្រឿងសង្ស័យអ្នកបើកស្រវឹងស្រាបានរេចង្កូតទៅបុកបង្គោលភ្លើងហើយធ្លាក់ចូលស្រះទឹកបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរមកចោមរោមមើលនិងរាយការណ៍ទៅសមត្ថកិច្ចមូលដ្ឋានឱ្យមកជួយធ្វើអន្តរាគមន៍ស្ទួចយករថយន្តចេញ។នៅក្នុងហេតុការណ៍នេះគឺសំណាងហើយដែលម្ចាស់រថយន្តរងរបួសស្រាល។

គ្រោះថ្នាក់ចរាចរណ៍នេះបានកើតឡើងកាលពីវេលាម៉ោងប្រមាណជាង៣រសៀលថ្ងៃទី៨ ខែមករាឆ្នាំ២០២១ស្ថិតលើផ្លូវជាតិលេខ១ក្នុងភូមិសាលាស្រុកចាស់ សង្កាត់ព្រៃឆ្លាក់ ក្រុងស្វាយរៀងទល់មុខវិទ្យាល័យស្វាយរៀង។

យោងតាមអ្នកភូមិបានឱ្យដឹងថា មុនពេលកើតហេតុមានបុរសម្នាក់មិនត្រូវបានស្គាល់អត្តសញ្ញាណបានបើករថយន្តមួយគ្រឿងម៉ាកឡិចសុីស ពណ៌ស ពាក់ស្លាកលេខភ្នំពេញ២AF-៣៩០៣ក្នុងទិសដៅពីកើតទៅលិចលើផ្លូវជាតិលេខ១ ហើយមិន ដឹងជាយ៉ាងម៉េចស្រាប់តែរេចង្កូតមកខាងស្ដាំដៃធ្លាក់ផ្លូវទៅបុកបង្គោលភ្លើងនិងធ្លាក់ចូលស្រះទឹកបង្កការភ្ញាក់ផ្អើលតែម្ដងតែសំណាងហើយដែលមនុស្សរងរបួសស្រាល។

ក្រោយកើតហេតុគេឃើញមានសមត្ថកិច្ចនគរបាលនិងកងរាជអាវុធហត្ថមូលដ្ឋានមកធ្វើអន្តរាគមន៍ហៅរថយន្តមកស្ទួចភ្លាមៗដើម្បីកុំអោយស្ទះចរាចរណ៍ផងដែរ៕ យឹម សុថាន