តើលោកអ្នកមានគម្រោងទៅទស្សនាកម្សាន្តនាចុងសប្តាហ៍នេះហើយឬនៅ?

ខេត្តក្រចេះ ៖ ក្រុមការងារគ្រប់គ្រងបណ្តាញសង្គមក្រសួងទេសចរណ៍បានបញ្ជាក់ឲ្យដឹងថា, សហគមន៍អេកូទេសចរណ៍កោះសាមសិបនឹងក្លាយជាជម្រើសដ៏ល្អមួយសម្រាប់លោកអ្នក។ សហគមន៍អេកូទេសចរណ៍កោះសាមសិបមានទីតាំងស្ថិតនៅតាមបណ្ដោយដងទន្លេមេគង្គជាប់ព្រំប្រទល់ខេត្តក្រចេះ និងខេត្តស្ទឹងត្រែង ដែលមានចំងាយប្រមាណ៩៥គីឡូម៉ែត្រពីទីរួមខេត្តក្រចេះ ។

កោះសាមសិបជាទីឋានដ៏ស្រស់ត្រកាលប្រៀបដូចឋានសួគ៌ក្រោមមេឃ ដែលមានធម្មជាតិដ៏វិសេសគ្របដណ្ដប់ដោយព្រៃឈើ បៃតងខ្ចី មានវាលខ្សាច់ សម្បុរសនារដូវប្រាំង ព្រមទាំងរំលេចជាទេសភាពដ៏ស្រស់ត្រកាល។ ភ្ញៀវដែលទៅកម្សាន្ត នៅទីនោះនឹងទទួលបាននូវអារម្មណ៍ដ៏ស្រស់ស្រាយ តាមរយៈការទស្សនាព្រៃលិចទឹកទន្លេមេង្គ ទស្សនាសត្វស្លាប ពិសេសសត្វស្លាបជិតផុតពូជជាច្រើនប្រភេទ ទស្សនាថ្ងៃរះ និងថ្ងៃរៀបលិចដ៏ស្រស់ស្អាត ស្ទូចត្រី បង់សំណាញ់ ងូតទឹកលេងកម្សាន្ត បោះតង់ និងជជែកគ្នាលេងនាពេលរាត្រីផងដែរ៕

ដោយ៖សិលា