សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ ផ្ទះសំណាក់យីហោ ថៃ បូរិន ស្ថិតក្នុងភូមិស្ពឺ(ក) ឃុំជយោ ស្រុកចំការលើ ខេត្តកំពង់ចាម ត្រូវបានសមត្ថកិច្ចចុះធ្វេីរដ្ឋបាលរកឃេីញមនុស្សប្រុសស្រី១០នាក់ និងចាប់យកគ្រឿងញៀន ជាមួយឧបករណ៍សម្រាប់សេពគ្រឿងញៀនមួយចំនួន ដែលជួលបន្ទប់ស្នាក់នៅក្នុងផ្ទះសំណាក់នេះ នាំយកទៅស្នងការដ្ឋានខេត្តដេីម្បីចាត់ការបន្តតាមនីតិវិធី ។
ប្រភពព័ត៌មានបានឱ្យដឹងថា កាលពីម្សិលមិញថ្ងៃទី២៤ ខែមករា ឆ្នាំ២០២១ វេលាម៉ោង០០:៣០នាទីរំលងអធ្រាត្រ នៅចំណុចផ្ទះសំណាក់របស់ឈ្មោះថៃ បូរិន ស្ថិតក្នុងភូមិស្ពឺ(ក) ឃុំជយោ ស្រុកចំការលើ ខេត្តកំពង់ចាម ដោយមានការសម្របសម្រួលពីលោក វង្ស ប៊ុនវិសុទ្ធ ព្រះរាជអាជ្ញាអមសាលាដំបូងខេត្តកំពង់ចាម កម្លាំងជំនាញការិយាល័យប្រឆាំងគ្រឿងញៀនខេត្តកំពង់ចាម សហការជាមួយជំនាញអធិការរដ្ឋាននគរបាលស្រុកចំការលេី និងប៉ុស្តិ៍នគរបាលរដ្ឋបាលជយោ ដឹកនាំដោយលោកឧត្តមសេនីយ៍ត្រី ជីវ សេងរស់ស្នងការរងទទួលផែនប្រឆាំងគ្រឿងញៀន បានបេីកកិច្ចប្រតិបត្តិការ ចុះធ្វើរដ្ឋបាលចំហ រកឃើញករណីជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀន ១ករណី ឃាត់ខ្លួនជនសង្ស័យចំនួន១០នាក់ ស្រី៦នាក់ដូចខាងក្រោមនេះ៖
១-ឈ្មោះ អ៉ីទ្រេះ វ៉ារី ភេទប្រុស អាយុ៣១ឆ្នាំ សញ្ជាតិខ្មែរអ៊ិស្លាម មុខរបរកម្មករ នៅភូមិអូរប្រាំ២ ឃុំព្រែកកក់ ស្រុកស្ទឹងត្រង់ ខេត្តកំពង់ចាម ។
២-ឈ្មោះ ឌឹក រ៉ែន ភេទស្រី អាយុ២២ឆ្នាំ សញ្ជាតិខ្មែរ មុខរបរនារីខារ៉ាអូខេ នៅភូមិត្រពាំងល្ពៅ ឃុំជយោ ស្រុកចំការលើ ខេត្តកំពង់ចាម។
៣-ឈ្មោះ ស៊ីម ផល្លី ភេទប្រុស អាយុ៣១ឆ្នាំ សញ្ជាតិខ្មែរ មុខរបរកម្មករ នៅភូមិថ្មី ឃុំព្រែកកក់ ស្រុកស្ទឹងត្រង់ ខេត្តកំពង់ចាម ។
៤-ឈ្មោះ អូន ស៊ីណា ហៅស្រីមុំ ភេទស្រី អាយុ២៨ឆ្នាំ សញ្ជាតិខ្មែរ មុខរបរនារីខារ៉ាអូខេ នៅភូមិ៣១ ឃុំតាអុង ស្រុកចំការលើ ខេត្តកំពង់ចាម ។
៥-ឈ្មោះ ឌឹក ស្រីនួន ភេទស្រី អាយុ២៨ឆ្នាំ សញ្ជាតិខ្មែរ មុខរបរនារីខារ៉ាអូខេ នៅភូមិអូរតាម៉េង ឃុំអន្លង់វែង ស្រុកអន្លង់វែង ខេត្តឧត្តមានជ័យ ។
៦-ឈ្មោះ អុក ចិន្ដា ភេទស្រី អាយុ៣១ឆ្នាំ សញ្ជាតិខ្មែរ មុខរបរនារីខារ៉ាអូខេ នៅខេត្តកំពត ។
៧-ឈ្មោះ រ៉េត បូរ៉ា ភេទប្រុស អាយុ២៦ឆ្នាំ សញ្ជាតិខ្មែរ មុខរបរមិនពិតប្រាកដ នៅភូមិអូរបេង ឃុំមេសរជ្រៃ ស្រុកស្ទឹងត្រង់ ខេត្តកំពង់ចាម។
៨-ឈ្មោះ លី តូច ហៅស្រីលីន ភេទស្រី អាយុ២២ឆ្នាំ សញ្ជាតិខ្មែរ មុខរបរនារីខារ៉ាអូខេ មកស្នាក់នៅភូមិស្ពឺ(ក) ឃុំជយោ ស្រុកចំការលើ ខេត្តកំពង់ចាម។
៩-ឈ្មោះ ថៃ បូរិន ភេទប្រុស អាយុ៤១ឆ្នាំ សញ្ជាតិខ្មែរ មុខរបរលក់ដូរ នៅភូមិស្ពី(ក) ឃុំជយោ ស្រុកចំការលើ ខេត្តកំពង់ចាម (ម្ចាស់ផ្ទះសំណាក់ ថៃ បូរិន និងខារ៉ាអូខេ ណាកាហ្សាKTV)។
១០-ឈ្មោះ អឿ នឿន ភេទស្រី អាយុ៣៨ឆ្នាំ សញ្ជាតិខ្មែរ មុខរបរមេការខារ៉ាអូខេ នៅភូមិព្រែកកុយ ឃុំព្រែកកុយ ស្រុកកងមាស ខេត្តកំពង់ចាម ។
កម្លាំងសមត្ថកិច្ចដកហូតវត្ថុតាងរួមមាន ៖ ម្សៅក្រាមពណ៌សសង្ស័យជាថ្នាំញៀនចំនួន៣កញ្ចប់ ទូរស័ព្ទដៃចំនួន៩គ្រឿង និងសម្ភារសេពគ្រឿងញៀនមួយចំនួន ។
ជនសង្ស័យ និងងវត្ថុតាងខាងលើ ត្រូវបានជំនាញការិយាល័យខេត្តនាំយកទៅចាត់ការបន្ដតាមនីតិវិធី ៕ដោយ៖វណ្ណៈ
