សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ជាកម្មករសំណង់បានស្លាប់យ៉ាងអាណោចអាធ័ម បន្ទាប់ពីរូបគាត់ និងបុរស២នាក់ទៀត ជាអ្នកធ្វើការជាមួយគ្នា(សរុបគ្នា៣នាក់) បាននាំគ្នាវាយជញ្ជាំងបេតុងនៅក្នុងភោជនីយដ្ឋានម្ហូបចិនមួយកន្លែងជិតដួល ហើយក៏នាំគ្នាទៅរុញផ្តួលនោះ ក៏ស្រាប់តែបាក់សង្កត់តែម្តង។
ហេតុការណ៍នេះ បានកើតឡើងកាលពីវេលាម៉ោង១និង៣០នាទីរសៀលថ្ងៃទី២៤ ខែមករា ឆ្នាំ២០២១ នៅចំណុចភោជនីយដ្ឋានចិនមួយកន្លែង ផ្លូវចៃកា(ម្តុំខាងក្រោយស្ថានទូតរុស្ស៊ី) ស្ថិតក្នុងសង្កាត់ទន្លេបាសាក់ ខណ្ឌចំការមន។
សពបុរសរងគ្រោះមានឈ្មោះ សៀង ធាវី អាយុ៤២ឆ្នាំ មុខរបរកម្មករសំណង់មានទីលំនៅក្នុងភូមិជ្រៃរុន ឃុំឬស្សីក្រាំង ស្រុកមោងឬស្សីខេត្តបាត់ដំបង។
តាមប្រភពព័ត៍មានពីកន្លែងកើតហេតុ បានឲ្យដឹងថា មុនពេលកើតហេតុបុរសជាកម្មករសំណង់រងគ្រោះ រួមនឹងបុរសជាកម្មករសំណង់ធ្វើការងារជាមួយគ្នាចំនួន២នាក់ទៀត (សរុបគ្នា៣នាក់) បាននាំគ្នាវាយជញ្ជាំងបេតុងមួយខាងក្នុងហាងម្ហូបចិនខាងលើ។
ប្រភពដដែលបន្តថា នៅពេលដែលក្រុមកម្មករសំណង់ទាំង៣នាក់បានវាយជញ្ជាំងដាច់ជើងខាងក្រោមស្ទើរតែអស់ហើយនោះ ក៏បាននាំគ្នាទៅរុញបន្ថែមដើម្បីឱ្យដួល ក៏ស្រាប់តែបាក់រលំសង្កត់ពីលើបុរសជនរងគ្រោះម្នាក់ខាងលើជាប់តែម្តង ចំណែកបុរស២នាក់ទៀតស្ទុះរត់ចេញទាន់ និងមិនរងរបួសអ្វីឡើយ។ ភ្លាមៗនោះ ក្រុមកម្មករសំណង់ដែលធ្វើការជាមួយគ្នានាំគ្នាវាយ និងលើកជញ្ជាំងថ្មបេតុងនោះចេញ ដើម្បីជួយសង្គ្រោះបុរសរងគ្រោះ តែជាអកុសលរូបគាត់បានដាច់ខ្យល់ស្លាប់បាត់ទៅហើយ។
ក្រោយពេលកើតហេតុ កម្លាំងមានសមត្ថកិច្ចខណ្ឌចំការមន សហការជាមួយកម្លាំងនគរបាលជំនាញនៃស្នងការដ្ឋានរាជធានីភ្នំពេញ បានចុះមកធ្វើការត្រួតពិនិត្យភោជនីយដ្ឋានម្ហូបចិនកើតហេតុខាងលើ និងប្រគល់សាកសពបុរសកម្មករសំណង់រងគ្រោះឱ្យក្រុមគ្រួសារយកទៅធ្វើបុណ្យទៅតាមប្រពៃណី៕
ដោយ៖សហការី
