សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ទីបំផុត! អ្នកនយោបាយប្រឆាំងរដ្ឋាភិបាលរុស្ស៊ី លោក Alexei Navalny ត្រូវបានតុលាការកាត់ទោសឱ្យជាប់ពន្ធនាគារ៣ ឆ្នាំកន្លះ ចំពោះការបំពានលក្ខខណ្ឌនៅក្រៅឃុំ។ បន្ទាប់ពីលោក Navalny ដែលទៅព្យាបាលសារធាតុពុលនៅអាល្លឺម៉ង់ កាលពីថ្ងៃទី១៧ ខែមករាកន្លងទៅ ត្រូវបានអាជ្ញាធររុស្ស៊ី ចាប់ខ្លួនភ្លាមៗពេលទៅដល់ព្រលានយន្តហោះក្រុងមូស្គូ។ ប្រទេសលោកខាងលិច ចេញមកប្រតិកម្មជាថ្មីប្រឆាំងប្រធានាធិបតី វ្ល៉ាឌីមៀ ពូទីន ក៏ដូចជាពិចារណាដាក់ទណ្ឌកម្មបន្ថែមផងដែរ។
ជាក់ស្តែងអ្នកប្រឆាំងរដ្ឋាភិបាលរុស្ស៊ី លោក Alexei Navalny ក៏មុតស្រួចម្នាក់នេះ នឹងត្រូវត្រឡប់ចូលពន្ធនាគារឡើងវិញ បន្ទាប់ពីតុលាការក្រុងមូស្គូ នៅថ្ងៃទី២ ខែកុម្ភៈ បានកាត់ក្តីឱ្យអនុវត្តទោស៣ឆ្នាំកន្លះពាក់ព័ន្ធការបំពានលក្ខខណ្ឌនៅក្រៅឃុំក្នុងសំណុំរឿងបន្លំលុយ៥សែនដុល្លារ។
សូមជម្រាបថា ក្នុងសំណុំរឿងដែលប្រកាសសាលក្រមនៅឆ្នាំ២០១៤ លោក Navalny ត្រូវបានតុលាការអនុញ្ញាតឱ្យព្យួរទោស ដែលត្រូវបំពេញលក្ខណ្ឌមួយចំនួនដូចជាការរាយការណ៍ទៅអាជ្ញាធរឱ្យទៀងទាត់ជាដើម។ ប៉ុន្តែអង្គភាពពន្ធនាគាររុស្ស៊ី អះអាងថា លោក Navalny ដែលត្រូវបំពុលដោយសារធាតុគីមី Novichok បានរំលោភលក្ខខណ្ឌនៅក្រៅឃុំ។ លោក Navalny បកស្រាយថា លោកមិនអាចរាយការណ៍ទៅអាជ្ញាធរបានឡើយ ព្រោះត្រូវសំរាកព្យាបាលជំងឺ។ អាជ្ញាធរពន្ធនាគារ និយាយថា ការបំពានកើតឡើងមុនពេលលោក ត្រូវថ្នាំបំពុល ហើយលោក Navalnyខ្លួនឯងក៏អាចជួប និងនិយាយជាមួយអ្នកកាសែតបាន តាំងតែពីចុងខែកញ្ញាមកម្ល៉េះក្រោយពេលអស់សារធាតុពុលចេញពីខ្លួន។ ក្រោយមកលោក Navalny បានទៅដល់រុស្ស៊ីនៅថ្ងៃទី១៧ ខែមករា ហើយត្រូវប៉ូលីសឃាត់ខ្លួនរហូតមក។
ដោយឡែកទាក់ទងការអនុវត្តទោសនេះ មេធាវីរបស់លោក Navalny លើកឡើងថា កូនក្ដី ត្រូវជាប់គុកតែ២ឆ្នាំ៨ខែប៉ុណ្ណោះ ដោយសារតែលោកធ្លាប់ស្ថិតក្រោមការឃុំឃាំងក្នុងផ្ទះមួយរយៈហើយ។ មេធាវីអ្នកនយោបាយប្រឆាំងអំពើពុករលួយរូបនេះ និយាយថា នឹងប្តឹងឧទ្ធរណ៍ផងដែរ។ ជាក់ស្តែងខណៈសវនាការកំពុងប្រព្រឹត្តទៅ អ្នកគាំទ្រលោក Navalny រាប់រយនាក់បានមកជួបជុំនៅមុខតុលាការ។ អ្នកខ្លះបានស្រែកថាលោក ពូទីន ជាចោរ និងខ្លះទៀតស្រែកថាលោក ពូទីន ជាអ្នកបំពុល។ អាជ្ញាធររុស្ស៊ីវិញ បានឃាត់ខ្លួនមនុស្សចំនួន៧០នាក់ក្នុងការតវ៉ានេះ។
គួរបញ្ជាក់ថា ចំពោះការសម្រេចរបស់តុលាការ ធ្វើឡើងប៉ុន្មានថ្ងៃប៉ុណ្ណោះក្រោយពេលអ្នកគាំទ្រលោក Navalny ចេញបាតុកម្មប្រឆាំងនឹងការចាប់ខ្លួនរូបលោក ដែលនាំឱ្យអាជ្ញាធររុស្ស៊ីចាប់ខ្លួនបាតុករជាង៧ពាន់៥រយនាក់ ក្នុងបាតុកម្មចំនួនពីរផ្សេងៗគ្នា។ អាមេរិក អង់គ្លេស និងអឺរ៉ុប ទាមទារឱ្យរុស្ស៊ីដោះលែងលោកNavalny ជាបន្ទាន់។ ចំណែករដ្ឋមន្ត្រីការបរទេសអាមេរិក អាន់តូនី ប្ល៊ីខិន ធ្លាប់បានលើកឡើងថា វ៉ាស៊ីនតោន និងសម្របសម្រួលជាមួយសម្ព័ន្ធមិត្ត ដើម្បីចាត់វិធានការឱ្យមូស្គូទទួលខុសត្រូវចំពោះរឿងនេះ។
ដោយឡែកជុំវិញករណីនេះដែរ លោកនាយករដ្ឋមន្ត្រីអង់គ្លេស បូរីស ចនសុន ក្រោយតុលាការចេញសេចក្តីសម្រេច ក៏បានចាត់ទុកការកាត់ក្តីជារឿងកំសាក។ ចំណែកសេចក្តីថ្លែងការណ៍របស់ក្រសួងការបរទេសអង់គ្លេសវិញ ទាមទារឱ្យដោះលែងជាបន្ទាន់ និងគ្មានលក្ខខណ្ឌសម្រាប់លោក Navalny បាតុករ និងអ្នកកាសែតដែលត្រូវចាប់ខ្លួនក្នុងរយៈពេល២សប្តាហ៍ចុងក្រោយ៕
ដោយ៖ស តារា(រូបភាព៖Reuters)
