សារព័ត៌មាន នគរវត្ត តែងតែនាំមុខគេជានិច្ច
ស្ថានភាពកូវីដ-១៩ នៅក្នុងប្រទេសជិតខាងកម្ពុជាទាំងពីរ គឺវៀតណាមនិងថៃមានការប្រែប្រួលដោយវៀតណាមបានកើនឡើង ចំណែកថៃបន្តធ្លាក់ចុះ។ កាលពីថ្ងៃទី ៦ខែកុម្ភៈវៀតណាមរកឃើញតែ ករណីវិជ្ជមាន៤នាក់ប៉ុណ្ណោះ ប៉ុន្តែនៅថ្ងៃទី៧ខែកុម្ភៈរកឃើញដល់ទៅ១៦នាក់ គឺឆ្លងក្នុងសហគមន៍ទាំងអស់ ។
គិតដល់ម៉ោង១៨ ថ្ងៃទី៧ខែកុម្ភៈ វៀតណាមមានករណីឆ្លងនៅក្នុងសហគមន៍កើនឡើងដល់ទៅ១១១១នាក់ ក្នុងនោះមាន ៤១៨ នាក់គិតចាប់ពីថ្ងៃទី២៧ខែមករា មកទល់ថ្ងៃទី ៧ខែកុម្ភៈ។
ដោយឡែកនៅក្នុងប្រទេសថៃវិញចំនួនអ្នកឆ្លងបានធ្លាក់ចុះពី៤៩០នាក់នៅថ្ងៃទី៦ខែកុម្ភៈ នៅសល់តែ ២៣៧នាក់ប៉ុណ្ណោះនៅថ្ងៃទី ៧ខែកុម្ភៈ ។ នៅក្នុងរបាយការណ៍ប្រចាំថ្ងៃអាទិត្យ ទី០៧ ខែកុម្ភៈ ឆ្នាំ២០២១នេះ អាជ្ញាធរថៃបានប្រកាសរកឃើញអ្នកជំងឺ COVID-19 ចំនួន២៣៧នាក់ថ្មីទៀត។
លោកស្រី Panprapa Yongtrakul ដែលជាអ្នកនាំពាក្យនៃអាជ្ញាធរគ្រប់គ្រងស្ថានការណ៍ COVID-19 នៅក្នុងប្រទេសថៃបានបញ្ជាក់ឲ្យដឹងថា ក្នុងចំណោមករណីឆ្លងថ្មីទាំង ២៣៧ករណីខាងលើ មាន ២២៥នាក់ ជាករណីឆ្លងក្នុងស្រុក ខណៈ១២នាក់ទៀតជាករណីនាំចូលពីក្រៅប្រទេស។
លោកស្រី បានសង្កត់ធ្ងន់ទៀតថា មានតែខេត្តចំនួន៤ប៉ុណ្ណោះ ដែលទទួលរ៉ាប់រងករណីឆ្លងថ្មីនៅថ្ងៃអាទិត្យនេះ។ ខេត្តទាំងបួនរួមមានដូចជា ខេត្តសមុតសាខន ខេត្តសាមុតសុងឃុម ខេត្តតាក និងទីក្រុងបាងកក។
បើបូកបញ្ចូលទាំងករណីឆ្លងនៅថ្ងៃនេះ ថៃមានករណីឆ្លង COVID-19 សរុប ២៣,៣៧១ករណី ដែលក្នុងនោះមាន ២០,៨៣០ករណីជាករណីឆ្លងក្នុងស្រុក ខណៈ ២,៥៤១ករណីទៀតជាករណីនាំចូល។ ដោយឡែក ចំនួនអ្នកជំងឺដែលបានជាសះស្បើយឡើងវិញ មានចំនួន ១៦,៩៤២នាក់ និងស្លាប់ ៧៩នាក់៕ដោយ៖ធី រីណា
