សារព័ត៌មាន នគរវត្ត តែងតែនាំមុខគេជានិច្ច
ខេត្តកោះកុង៖ កន្លងទៅមាន លោកផ្កាយ២ ជាយោធា បានធ្វើសកម្មភាពចាក់ដី ថ្ម ខ្សាច់ រំលោភយកឆ្នេរសមុទ្រ អត់មានទោសទណ្ឌ នៅខេត្តកោះកុង , ដល់ឥឡូវមានអ្នកចាក់រំលោភយកបន្តទៀត , តើអាជ្ញាធរ ពាក់ព័ន្ធ មើលឃើញទេ ?
សូមបញ្ជាក់ផងដែរថា, មានគេរាយការណ៍មកឆ្នេរសមុទ្រមួយកន្លែងស្តិតនៅចំនុចពយតាឃុន ក្នុងភូមិព្រែកខ្សាច់ ឃុំព្រែកខ្សាច់ ស្រុកគិរីសាគរ ខេត្តកោះកុង ត្រូវបានអ្នកមានលុយមានអំណាច ចាក់ដីលុបរំលោភយកដីចំណីឆ្នេរសមុទ្រខុសច្បាប់អស់ជាង១០០ម៉ែត្រ ខណៈមន្រីគណៈកម្មការចម្រុះខេត្តចុះទៅត្រួតពិនិត្យ បានត្រឹមធ្វើកិច្ចសន្យាបញ្ឈប់សកម្មភាពចាក់ដីបន្ត ដែលធ្វើឲ្យពលរដ្ឋរស់នៅទីនោះខកចិត្ត និងដាក់ការសង្ស័យថា ជាការឃុបឃិតគ្នាព្រោះតែផលប្រយោជន៍ផ្ទាល់ខ្លួន ទើបមន្ត្រីគណៈកម្មការដែលចុះទៅត្រួតពិនិត្យ មិនអនុវត្តន៍ច្បាប់ឲ្យបានពេញលេញ ពោលគឺគ្មានវិធានការដាក់ទោសទណ្ឌ ផាកពិន័យតាមច្បាប់ និងឲ្យកាយអាចម៍ដីចេញពីដីចំណីឆ្នេរដែលជាទ្រព្យសម្បត្តិរដ្ឋវិញឡើយ។ នេះជាទង្វើដែលបន្សល់ទុកនូវ ឱ្យអ្នកបំពានច្បាប់នៅតែប្រព្រឹត្តបំពានច្បាប់ដដែល ។
តាមសេចក្តីរាយការណ៍ពីពលរដ្ឋរស់នៅក្នុងភូមិព្រែកខ្សាច់បានឲ្យដឹងថា, ការចាក់ដីរំលោភយកដីចំណីឆ្នេរសមុទ្រធ្វើកម្មសិទ្ធិនេះ បានធ្វើឡើងរយៈពេលជាង១ខែទៅហើយ ដោយលោកស្រីឈឹម ចាន់ឌី រស់នៅក្នុងភូមិព្រែកខ្សាច់ជាអ្នកប្រព្រឹត្ត ហាក់ដូចជាគ្មានខ្លាចរអាចំពោះអាជ្ញាធរ មន្ត្រីជំនាញពាក់ព័ន្ធសូម្បីបន្តិច ។ សេចក្តីរាយការណ៍បន្តថា, លោកស្រី ឈឹម ចាន់ឌី បានជួលគ្រឿងចក្រពីមេការរបស់ក្រុមហ៊ុនអ្នកឧកញ៉ា លី យ៉ុងផាត់ ដើម្បីទុកជារនាំងអំណាចធ្វើសកម្មភាព ឈូសឆាយ ចាក់ដីលុបឆ្នេរសមុទ្រ ដែលធ្វើឲ្យអាជ្ញាធរមូលដ្ឋានរួញរាក្នុងការហាមឃាត់ និងការអនុវត្តន៍ច្បាប់ការពារឆ្នេរសមុទ្រ ឲ្យស្របទៅតាមផ្លូវច្បាប់ ។
បើតាមរយៈគេហទំព័រក្នុងស្រុកបានបញ្ជាក់ថា, លោកស្រី ឈឹម ចាន់ឌី បានប្រាប់អ្នកយកព័ត៌មានតាមទូរស័ព្ទថា , លោកស្រីពិតជាបានចាក់ដីភូមិដែលជាកម្មសិទ្ធិផ្ទាល់ខ្លួនរបស់គាត់ពិតមែន ហើយការចាក់ដីនេះ គឺលោកស្រីពុំបានសុំច្បាប់ត្រឹមត្រូវ ពីអាជ្ញាធរជំនាញពាក់ព័ន្ធឡើយ ដោយបានត្រឹមប្រាប់ផ្ទាល់មាត់ ទៅមេឃុំព្រែកខ្សាច់តែប៉ុណ្ណោះ។ ខណៈដីចំណីសមុទ្រប្រវែងជាង១០០ម៉ែត្រត្រូវចាក់ដីលុបរួចស្រេចទៅហើយនោះ លោកស្រី ឈឹម ចាន់ឌី បានលើកឡើងបែបមនុស្សមិនយល់ច្បាប់ថា គាត់ចាក់ដីលើដីកម្មសិទ្ធិរបស់គាត់ តើគាត់ខុសអ្វី?
ត្រង់ចំណុចនេះ ប្រជាពលរដ្ឋមានចម្ងល់ថា, តើចំពោះសមុទ្រ អាជ្ញាធរនិងជំនាញ ចេញប្លង់អោយជាកម្មសិទ្ធិដែរឬទេ ? ឬមួយក៏ការរំលោភយកឆ្នេរសមុទ្រនេះ ធ្វើឡើងតាមរយៈទឹកលុយ អ្នកមានអំណាចយោគយល់ ដោយសារផលប្រយោជន៍? មន្ត្រីបែបៗនេះ គួរណាស់តែថ្នាក់លើធ្វើការពិចារណាសិក្សាស្រាវជ្រាវលម្អិតឲ្យបានដិតដល់ចំពោះផ្លូវច្បាប់។
ដោយឡែក លោក រៀម រុំ មេឃុំព្រែកខ្សាច់ បានឲ្យដឹងថា, លោកស្រី ឈឹម ចាន់ឌី ពិតជាពុំមានច្បាប់អនុញ្ញាតត្រឹមត្រូវ ពីមន្ត្រីជំនាញពាក់ព័ន្ធ ដើម្បីចាក់ដីលុបលើទីតាំងដីខាលើនេះមែន គាត់បានរាយការណ៍ផ្ទាល់មាត់មកអាជ្ញាធរឃុំព្រែកខ្សាច់ដែរ ប៉ុន្តែលោកពុំបានឃុបឃិតឲ្យ មានការចាក់ដីលុប រំលោភយកដីចំណីឆ្នេរសមុទ្រឡើយ។
ជាក់ស្តែង បន្ទាប់ពីមានការបែកធ្លាយព័ត៌មានករណីចាក់ដីលុបចំណីឆ្នេរសមុទ្រខុសច្បាប់នៅក្នុងភូមិព្រែកខ្សាច់ យកធ្វើកម្មសិទ្ធិផ្ទាល់ខ្លួនដល់ថ្នាក់ដឹកនាំ និងជាអនុប្រធានគណៈកម្មាធិការជាតិគ្រប់គ្រង និងអភិវឌ្ឍន៍ឆ្នេរសមុទ្រកម្ពុជា និងលោក ម៉ន ផល្លា ប្រធានមន្ទីរបរិស្ថានខេត្តកោះកុង ស្រាប់តែនៅថ្ងៃទី១៤ ខែកុម្ភៈ ឆ្នាំ២០២១ថ្មីៗ កន្លងទៅនេះ គណៈកម្មការចម្រុះ រួមមានមន្ត្រីបរិស្ថាន មន្ត្រីជំនាញពាក់ព័ន្ធ អាជ្ញាធរស្រុកគិរីសាគរ បានចុះទៅធ្វើការត្រួតពិនិត្យផលប៉ះពាល់ និងបានត្រឹមធ្វើកិច្ចសន្យាឲ្យលោកស្រី ឈឹម ចាន់ឌី ផ្អាកសកម្មភាពចាក់ដីលុបឆ្នេរសមុទ្រជាបន្តតែប៉ុណ្ណោះ។ ចំពោះនីតិវិធីបន្ត គេពុំទាន់ដឹងថា តើអាជ្ញាធរនិងសមត្ថកិច្ចពាក់ព័ន្ធ អាចនឹងចាត់ការក្នុងរឿងព្រហ្មទណ្ឌដែរឬអត់ !
ប្រជាពលរដ្ឋរស់នៅក្នុងភូមិព្រែកខ្សាច់លើកឡើងថា រយៈពេល២-៣ថ្ងៃ មុនពេលគណៈកម្មការចម្រុះ ចុះទៅត្រួតពិនិត្យវាយតំលៃលើការចាក់ដីលុបឆ្នេរសមុទ្រខុសច្បាប់កាលពីថ្ងៃទី១៤ កុម្ភៈកន្លងទៅនេះ ពួកគាត់បានឃើញ លោកស្រី ឈឹម ចាន់ឌី ខ្វែងដៃខ្វែងជើង ម្តងរត់ទៅសាលាស្រុកគិរីសាគរ ម្តងឡើងទៅខេត្តកោះកុង ដើម្បីស្វែងរកអន្តរាគមន៍ ការពារទង្វើខុសច្បាប់ចាក់ដីលុបឆ្នេរសមុទ្ររបស់ខ្លួន។ពលរដ្ឋទាំងនោះបន្តថា លោកស្រី ឈឹម ចាន់ឌី មានខ្នងបង្អែករឹងមាំនៅក្នុងតុលាការខេត្តកោះកុង រឿងអីគណៈកម្មការចម្រុះហ៊ានអនុវត្តន៍ច្បាប់ ដាក់ទោសទណ្ឌ ឬពិន័យតាមច្បាប់នោះ។ ពលរដ្ឋរិះគន់ថា ទំនងគណៈកម្មការចម្រុះ ត្រឹមចុះមកត្រួតពិនិត្យបង្គ្រប់កិច្ច ហើយធ្វើរបាយការណ៍លំៗបិទបាំងថ្នាក់ដឹកនាំ ដើម្បីប្រយោជន៍ផ្ទាល់ខ្លួនក៏ថាបាន ព្រោះកន្លងមកក៏ធ្លាប់មានករណីបែបនេះនៅក្នុងភូមិព្រែកខ្សាច់ដែរ ប៉ុន្តែចុងបញ្ចប់វិធានការអនុវត្តន៍ច្បាប់ ស្ងាត់ឈឹង ឯអ្នកចាក់ដីរំលោភយកដីចំណីឆ្នេរសមុទ្រ កាន់តែបង្ហាញភាពក្រអឺតក្រទម ក្លាយជាម្ចាស់កម្មសិទ្ធិយ៉ាងពេញមុខ ដែលករណីលោកស្រី ឈឹម ចាន់ឌី ក៏មិនខុសគ្នានោះដែរមើលទៅ។
ពាក់ព័ន្ធក្នុងករណីរំលោភយកឆ្នេរសមុទ្រខាងលើនេះ ប្រជាពលរដ្ឋ សំណូមពរដល់លោកឧបនាយករដ្ឋមន្ត្រី ជា សុផារ៉ា ប្រធានគណៈកម្មាធិការជាតិគ្រប់គ្រង និងអភិវឌ្ឈន៍ឆ្នេរសមុទ្រកម្ពុជា មេត្តាពិនិត្យមើលពីភាពអសកម្មក្នុងការអនុវត្តន៍ច្បាប់ របស់មន្ត្រីជំនាញពាក់ព័ន្ធក្នុងខេត្តកោះកុងផង។ ដើម្បីរក្សាបាននូវឆ្នេរសមុទ្រដ៏ស្រស់ត្រកាលរបស់ប្រទេសកម្ពុជា សម្រាប់លើកស្ទួយវិស័យទេចរណ៍នាពេលអនាគត។ ម្យ៉ាងទៀត ត្រង់ថាម៉េចអ្នករំលោភយកឆ្នេរសមុទ្រ អះអាងថាខ្លួនមានប្លង់កម្មសិទ្ធិ តើមន្ត្រីណាពាក់ព័ន្ធក្នុងការអនុញ្ញាត ដើម្បីមានវិធានការផ្លូវច្បាប់ លុបបំបាត់និទណ្ឌភាព ចំពោះជនដែលមានអំណាចមានលុយ ប្រព្រឹត្តតែអំពើខុសច្បាប់ រំលោភយកឆ្នេរសមុទ្រ ដ៏គឃ្លើននេះ ។
ពាក់ព័ន្ធក្នុងករណីនេះ អង្គភាព”នគរដ្រេហ្គននិងកាសែតនគរវត្ត” មិនអាចទាក់ទងសុំការបំភ្លឺពី លោកស្រីអភិបាលនៃគណៈអភិបាលខេត្តកោះកុង និងលោកប្រធានមន្ទីររៀបចំដែនដីនគរូបនីយកម្មនិងសំណង់ខេត្តបាននៅឡើយទេ។
ប៉ុន្តែអង្គភាព”នគរដ្រេហ្គននិងកាសែតនគរវត្ត” នឹងរង់ចាំទទួលការបកស្រាយក្នុងករណីនេះគ្រប់ពេលវេលា៕
ដោយ៖ សិលា
