សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោកស្រីវេជ្ជបណ្ឌិត ឱ វណ្ណឌីន នៅតែបន្តអំពាវនាវដល់ប្រជាពលរដ្ឋកុំឱ្យមើលស្រាលវីរុសកូវីដ-១៩ ជាពិសេស វីរុសបំប្លែងថ្មី ខណៈដែលវីរុសកូវីដ-១៩បំប្លែងថ្មី វាមានភាពសាហាវ និងធ្ងន់ធ្ងរជាងមុននិងអាចស្លាប់បាន។
លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានមានប្រសាសន៍ថា ប្រជាពលរដ្ឋ ទាំងអស់មិនត្រូវធ្វេសប្រហែស ហើយមិនត្រូវមើលស្រាលវីរុសកូវីដ-១៩ នោះឡើយ ខណៈដែលវីរុសនេះអាចសម្លាប់អ្នកជំងឺ បាន បើគ្មានការព្យាបាលត្រឹមត្រូវ ពីក្រុមគ្រូពេទ្យជំនាញនោះទេ ។
« សូមបងប្អូនកុំគិតថា ឥឡូវនេះកម្ពុជាអត់មានអ្នកស្លាប់ដោយវីរុសកូវីដ-១៩ផង ទៅភ័យធ្វើអី្វ? កុំមើលស្រាល លទ្ធភាពនៃការវ៉ៃលុក របស់ជំងឺកូវីដ-១៩ឱ្យសោះ ជាពិសេសនោះគឺវីរុសបំប្លែងថ្មី វានឹងអាចធ្វើឱ្យអ្នកជំងឺវិវត្តទៅរកសេចក្តីស្លាប់ បាន ប្រសិនបើបុគ្គលនោះ មិនទទួលបាននូវការពិនិត្យព្យាបាល បានទាន់ពេលវេលា និងមានការថែទាំត្រឹមត្រូវពីក្រុមគ្រូពេទ្យ របស់យើងទេនោះ » ។
លោកស្រីវេជ្ជបណ្ឌិត ឱ វណ្ណឌីន បានបន្តអំពាវនាវឱ្យបងប្អូនប្រជាពលរដ្ឋទាំងអស់ បន្តអនុវត្តវិធានការសុខាភិបាល តាមការណែនាំដ៏ខ្ពង់ខ្ពស់បំផុត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចបានអំពាវនាវហើយអំពាវនាវទៀតដោយបានដាក់នូវអភិក្រម ៣ការពារ រួមមាន៖ ពាក់ម៉ាស់ លាងដៃ រក្សា គម្លាតសង្គម និងគម្លាតបុគ្គល ពី១,៥ម៉ែត្រឡើងទៅ និង ៣កុំ រួមមាន៖ កុំទៅកន្លែងដែលបិទជិតឈឹងគ្មានខ្យល់ចេញចូល និងប្រើម៉ាស៊ីនត្រជាក់ច្រើនពេក, កុំទៅកន្លែងដែលមានមនុស្សច្រើនកុះករ និង កុំចាប់ដៃគ្នា កុំឱបគ្នា កុំកៀកស្មាគ្នា។
សូមបញ្ជាក់ថា ក្រសួងសុខាភិបាល នៅព្រឹកថ្ងៃទី២៦ ខែកុម្ភៈ ឆ្នាំ២០២១នេះ បានប្រកាសរកឃើញអ្នកឆ្លងកូវីដ-១៩ថ្មី ចំនួន៤៤នាក់ទៀត ក្នុងនោះមានចំនួន៤០នាក់ជាករណីឆ្លងក្នុងសហគមន៍ ដែលពាក់ព័ន្ធនឹង « ព្រឹត្តិការណ៍សហគមន៍២០ កុម្ភៈ» ។ គិតត្រឹមថ្ងៃទី២៦ ខែកុម្ភៈ ឆ្នាំ២០២១នេះ កម្ពុជារកឃើញអ្នកឆ្លងកូវីដ-១៩ ចំនួន៧៤១នាក់ ក្នុងនោះ អ្នកជាសះស្បើយ ចំនួន៤៧៧នាក់ និងអ្នកជំងឺកំពុងសម្រាកនៅមន្ទីរពេទ្យចំនួន២៦២នាក់ ៕
ប្រភព៖ ក្រសួងព័ត៌មាន
