សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ប្រជាពលរដ្ឋបានប្រទះឃើញសាកសពនារីម្នាក់ដេកស្លាប់ក្នុងដីឡូត៍មួយកន្លែងទាំងអាក្រាតកាយនិងមានសភាពហើមស្អុយ បង្កឲ្យមានការភ្ញាក់ផ្អើលដល់សមត្ថកិច្ច កាលពីវេលាម៉ោង១១ព្រឹកថ្ងៃទី៤ ខែមីនា ឆ្នាំ២០២១ ស្ថិតនៅក្នុងដីឡូត៍មួយកន្លែងក្នុងភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ ។
សាកសពនារីខាងលើគេមិនទាន់បានស្គាល់អត្តសញ្ញាណនៅឡើយនោះទេ ដោយសាកសពមានសភាពអាក្រាតកាយនិងហើមធុំក្លិនស្អុយទៅហើយ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា ដីឡូត៍មួយកន្លែងខាងលើនេះម្ចាស់បានចាក់ទ្វាររបងទុកចោលហើយជារៀងរាល់ដងគេតែងតែឃើញក្រុមអ្នកញៀនល្បែងបញ្ជល់មាន់នាំគ្នាលួចផ្លោះរបងចូលទៅលេងបញ្ជល់មាន់ម្ដងម្កាល តែមិនបានប្រទះឃើញសពនារីខាងលើនៅក្នុងដីឡូត៍នេះទេ ទើបតែមកដល់ម៉ោងកេីតហេតុក៏មានរថយន្តដឹកកម្មករចូលទៅដឹកអុសក៏ធុំក្លិនស្អុយ រួចក៏ដើរចូលទៅក្បែរស្រាប់តែប្រទះឃើញនារីខាងលើដេកស្លាប់ទាំងអាក្រាតកាយហើយក៏បានរាយការណ៍ជូនអាជ្ញាធរមូលដ្ឋានតែម្ដង ។
ក្រោយពេលសមត្ថកិច្ចមូលដ្ឋានទទួលបានព័ត៌មានថាមានមនុស្សស្លាប់ ភ្លាមៗនោះកម្លាំងនគរបាលប៉ុស្តិ៍រដ្ឋបាលស្ទឹងមានជ័យទី៣សហការជាមួយកម្លាំងនគរបាលព្រហ្មទណ្ឌខណ្ឌមានជ័យ រួមនឹងកម្លាំងជំនាញកោសល្យវិច័យស្នងការដ្ឋាននគរបាលរាជធានីភ្នំពេញបានចុះទៅធ្វើការហ៊ុមព័ទ្ធនៅជុំវិញកន្លែងកើតនិងធ្វើការពិនិត្យសាកសព ។ ក្រោយពេលពិនិត្យសាកសពរួចសមត្ថកិច្ចជំនាញមិនបានបញ្ជាក់ប្រាប់ថាសពនារីខាងលើនេះស្លាប់ដោយសារមូលហេតុអ្វីពិតប្រាកដនោះទេដោយសមត្ថកិច្ចរួសរាន់ដឹកសពចេញពីកន្លែងកើតយកទៅតម្កល់ទុកនៅវត្តសំបួរមាសដើម្បីធ្វើការស្រាវជ្រាវរកក្រុមគ្រួសារសាច់ញាតិចាត់ចែងធ្វើបុណ្យតាមប្រពៃណី។
បេីតាមការបញ្ជាក់ពីលោក ហ៊ីង សាម៉ន ដែលជាមេភូមិទ្រា៤បានប្រាប់អ្នកសារព័ត៌មានថា សាកសពខាងលើជាមនុស្សស្រីវ័យប្រហែល២៨ឆ្នាំ សាកសពមានសភាពហើមស្អុយនិងអាក្រាតកាយ សង្ស័យជាករណីរំលោភហើយដឹកសាកសពយកមកទម្លាក់ចោលនៅក្នុងដីឡូត៍ខាងលើនេះតែមិនមែនជាអ្នកភូមិនេះនោះទេ ៕
ដោយ៖ ភារ៉ា ដង្កោ
