សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រដ្ឋមន្ត្រីក្រសួងប្រៃសណីយ៍ និងទូរគមនាគមន៍លោក ជា វ៉ាន់ដេត បានលើកឡើងថា ក្នុងចំណោមអ្នកប្រើប្រាស់សេវាអ៉ីនធេីណេត នៅកម្ពុជា មាន២៦% ធ្លាប់ទទួលបានការបៀតបៀនតាមប្រព័ន្ធអនឡាញ ដោយក្នុងនោះកុមារ គឺជាជនរងគ្រោះខ្លាំងជាងគេ។
ជាក់ស្ដែងការផ្ទុះកូវីដ-១៩ បានធ្វើឲ្យកម្ពុជាក្លាយជាសង្គមប្រេីប្រាស់ប្រព័ន្ធឌីជីថលលឿនជាងផែនការ។ ខណៈដែលទំនាក់ទំនងសង្គម ការធ្វើជំនួញ ពិសេសប្រព័ន្ធសិក្សាធិការ ដែលបានដាក់ឲ្យរៀនតាមអនឡាញយ៉ាងទូលំទូលាយ ប៉ុន្តែការប្រើប្រាស់អ៉ីនធេីណេតរបស់កុមារនិងយុវជន មិនថានៅក្នុងពេលសិក្សាឬកម្សាន្តនោះទេ អាចប្រឈមនិងការបៀតបៀន។
បេីតាមការការលើកឡើងរបស់រដ្ឋមន្ត្រីក្រសួងប្រៃសណីយ៍ បានបញ្ជាក់នៅក្នុងវីដេអូខ្លីមួយ ដោយអំនាវនាវដល់មាតាបិតាសិស្សចូលរួមទប់ស្កាត់ការបៀតបៀនកុមារនៅលើអ៉ីនធេីណេត។ លោកជា វ៉ាន់ដេត នៅក្នុងវីដេអូ ដែលមានរយៈពេលប្រមាណជាង២នាទី បានលើកឡើងថា ការរំលោភបំពាន តាមបណ្តាញអ៉ីនធេីណេតចំពោះកុមារមានសន្ទុះកើនឡើងកាន់តែខ្លាំង នៅទូទាំងសាកលលោក ខណៈការឆ្លងរាលដាលនៃជំងឺកូវីដ-១៩ នៅកម្ពុជា ក៏ដូចនៅក្នុងពិភពលោក បានតម្រូវឱ្យកុមាររៀនតាមអនឡាញ ដោយប្រើប្រាស់នូវប្រព័ន្ធអ៊ីនធឺណែតជាប្រចាំ។
ជាមួយគ្នានេះលោករដ្ឋមន្ត្រី បន្តថា ដើម្បីធានាបានថាការតភ្ជាប់ និងការប្រើប្រាស់បច្ចេកវិទ្យានាំមកនូវផលវិជ្ជមានប្រកបទៅដោយសុវត្ថិភាពចំពោះកុមារកម្ពុជានោះ ក្រសួងប្រៃសណីយ និងទូរគមនាគមន៍ បានរៀបចំយុទ្ធនាការណ៍មួយដែលមានឈ្មោះថា«គិតគូរកូន» ជាភាសាបរទេស «KIT KOU KON» ដើម្បីជួយផ្តល់ព័ត៌មានដល់ឪពុកម្តាយ អាណាព្យាបាល គ្រូបង្រៀន និងសាធារណជន ក្នុងការការពារកុមារឱ្យចៀសផុតពីហានិភ័យនានា លើប្រព័ន្ធអនឡាញ។
ដោយឡែកជុំវិញករណីនេះដែរ នាយកមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព ក៏បានលើកឡើងដែរថា ការកំណត់និយមការបៀតបៀនមានភាពខុសគ្នារវាងស្ថាប័ននីមួយៗ។ ប៉ុន្តែជាទូទៅការបៀនបៀតផ្លូវភេទលើកុមារនិងយុវជន នៅពេលប្រើប្រាស់អ៉ីនធេីណេត មានដល់បៀតបៀនដល់ប្រដាប់ភេទ ដូចជា៖ការលួងលោមឲ្យបង្ហាញ ការលេង ឬជាការគំរាមកំហែង សម្លុត ប្រមាថជាដើម។
បន្ថែមពីនេះ លោកស្រីនាយកមជ្ឈមណ្ឌលសិទ្ធិមនុស្សកម្ពុជា បានសង្កត់ធ្ងន់ថា ដើម្បីទប់ស្កាត់បញ្ហានេះមាតាបិតាសិស្សគួរចំណាយពេលនៅជាមួយកូនៗឲ្យបានច្រើន ហើយគួរកំណត់កម្មវិធីប្រើប្រាស់បច្ចេកវិទ្យារបស់កូនថាកម្មវិធីណាកូនចូលប្រើប្រាស់និងកម្មវិធីណាមិនអាចចូលទៅបាន។ លោកស្រី បន្ថែមទៀតថា ឪពុកម្តាយមិនគួរបណ្តោយឲ្យកូនប្រើប្រាស់ទូរស័ព្ទដៃ ឬកុំព្យូរទ័រ ដែលភ្ជាប់អ៉ីនធេីណេត ពេញមួយថ្ងៃនោះឡើយ។
ជាចុងក្រោយលោក ជា វ៉ាន់ដេត បានអំពាវនាវដល់ឪពុកម្តាយ អាណាព្យាបាល គ្រូបង្រៀន សូមតាមដានទំព័រហ្វេសប៊ុកឈ្មោះ«គិតគូរកូន» និងទំព័រហ្វេសប៊ុកក្រសួងប្រៃសណីយ៍ និងទូរគមនាគមន៍ ដើម្បីទទួលបានចំណេះដឹងជាមូលដ្ឋានបន្ថែមទៀត ក្នុងការការពារកូនលោក-អ្នក ពីការរំលោភបំពាននានាតាមប្រព័ន្ធអនឡាញ៕ដោយ៖ស តារា
លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍
រូបភាព៖ឯកសារ
