សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើយោងតាមរបាយការណ៍សមត្ថកិច្ចបានបញ្ជាក់អោយដឹងថា, បុរសដែលស្លាប់ដោយសារជំងឺកូវីដ-១៩ នៅព្រឹកថ្ងៃទី១១ មីនា ឆ្នាំ២០២១ រស់នៅក្នុងមូលដ្ឋានខណ្ឌមានជ័យ រាជធានី ភ្នំពេញ គឺ លោកវរៈសេនីយ៍ត្រី ឡៅ វណ្ណា ភេទប្រុស អាយុ៥០ឆ្នាំ(ស្លាប់នៅពេទ្យរុស្សុី) មុខរបរ នាយកដ្ឋានអង្គរក្ស មានទីលំនៅ ផ្ទះលេខ៥៧ ក្រុម១២ ភូមិព្រែកតាឡុង១ សង្កាត់ចាក់អង្រែក្រោម ខណ្ឌមានជ័យ ភ្នំពេញ។
មានប្រពន្ធឈ្មោះ វេង សុម៉ាលី អាយុ៤១ មុខរបរនៅផ្ទះ មានកូនចំនួន៤នាក់ បច្ចុប្បន្នប្រពន្ធនិងកូនរបស់គាត់ ធ្វើចត្តាឡីស័កនៅផ្ទះ។
សូមបញ្ជាក់ថា, នៅនារសៀលថ្ងៃទី១១ ខែមីនា ឆ្នាំ២០២១ ក្រសួងសុខាភិបាល បានសេចក្តីប្រកាសព័ត៌មាន ស្តីពីករណីជនជាតិខ្មែរ ស្លាប់លើកទី១ ដោយសារជំងឺកវីដ-១៩។
ក្រសួងសុខាភិបាលនៃព្រះរាជាណាចក្រកម្ពុជា សូមប្រកាសព័ត៌មានជូនដល់សាធារណជន ទាំងអស់ ឱ្យបានជ្រាបថា នាថ្ងៃទី១១ ខែមីនា ឆ្នាំ២០២១ វេលាម៉ោង ១០:៤០នាទីព្រឹក មានបុរស ជនជាតិខ្មែរ ០១នាក់ អាយុ ៥០ឆ្នាំ បានទទួលមរណៈភាពដោយសារជំងឺកូវីដ-១៩ នៅមន្ទីរពេទ្យ មិត្តភាពខ្មែរ-សូវៀត ដែលជាករណីស្លាប់លើកទី១នៅកម្ពុជា។ សព មានទីលំនៅ នៅសង្កាត់ចាក់ អង្រែ ខណ្ឌមានជ័យ រាជធានីភ្នំពេញ ជាអ្នកបើកបរឲ្យថៅកែជនជាតិចិននៅខេត្តព្រះសីហនុ ដែល មានផ្ទុកជំងឺកូវីដ -១៩ ក្នុងព្រឹត្តិការណ៍សហគមន៍ ២០កុម្ភៈ។ សពនេះ ត្រូវបាន រកឃើញថាមានឆ្លង វីរុសកូវីដ-១៩ នៅថ្ងៃទី២៧ ខែកុម្ភៈ ឆ្នាំ២០២១ ដែលមានលទ្ធផលបញ្ជាក់ដោយមន្ទីរពិសោធន៍នៃ វិទ្យាស្ថានប៉ាស្ទ័រកម្ពុជា។
អាស្រ័យហេតុដូចបានជម្រាបជូនខាងលើ សូមសាធារណជន មេត្តាជ្រាបជាព័ត៌មាន៕
ដោយ៖សុខខេមរា
