សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ថ្លែងក្នុងសន្និសីទព័ត៌មានពាក់ព័ន្ធការបង្កើតច្បាប់ស្តីពីវិធានការទប់ស្កាត់ការឆ្លងជំងឺកូវីដ១៩ នៅព្រឹកថ្ងៃចន្ទ ទី១៥ ខែមីនា ឆ្នាំ២០២១ ដោយបានបង្ហាញភាពអាសន្នថា៖ ព្រឹត្តិការណ៍ឆ្លងក្នុងសហគមន៍២០កុម្ភៈនេះ មិនអាចបិទបញ្ចប់ឡើយ បើពលរដ្ឋមិនចូលរួមទេនោះ។ ជាក់ស្ដែងរហូតមកដល់ពេលនេះមានរយៈពេលជិតមួយខែ តែមិនទាន់អាចកាត់ផ្តាច់នៅឡើយ។
លោកស្រី ឱ វណ្ណឌីន បានគូសបញ្ជាក់ថា បេីគិតត្រឹមថ្ងៃទី១៥ ខែមីនានេះ ព្រឹត្តិការណ៍សហគមន៍២០កុម្ភៈ បានរកឃើញអ្នកវិជ្ជមានរហូតដល់ទៅ ៨១០នាក់ហើយ ហើយមានអ្នកជំងឺម្នាក់បានស្លាប់ថែមទៀតផង។ ហេីយព្រឹត្តិការណ៍នេះ បានរីករាលដាលទៅខេត្តព្រះសីហនុ កណ្តាល ព្រៃវែង កោះកុង កំពង់ចាម កំពង់ធំ បាត់ដំបង និងសៀមរាបជាដើម។ ប៉ុន្តែការរីករាលដាលនៃជំងឺកាចសាហាវមួយនេះ មិនទាន់មានសញ្ញាណថមថយនៅឡើយនោះទេ។
អ្នកនាំពាក្យក្រសួងសុខាភិបាលរូបនេះ ថ្លែងក្នុងសន្និសីទព័ត៌មានដដែលនេះ ក៏បានបង្ហាញការកត់សម្គាល់ថា ព្រឹត្តិការណ៍សហគមន៍២០កុម្ភៈ មានការរីករាលដាលខ្លាំង ដោយសារតែប្រជាពលរដ្ឋមានការធ្វេសប្រហែស មើលស្រាលទៅលើស្ថានភាពនៃការវាយលុករបស់មេរោគកូវីដ១៩ ដែលនាំឱ្យមានការចម្លងពីកន្លែងមួយ ទៅកន្លែងមួយ។
លោកស្រី ឱ វណ្ណឌីន បានសង្កត់ធ្ងន់ថា បេីទោះបីរាជរដ្ឋាភិបាល និងក្រសួងសុខាភិបាល ដាក់ចេញវិធានការ និងការអំពាវនាវឱ្យចូលរួមទប់ស្កាត់ តែប្រជាពលរដ្ឋនៅតែជួបជុំហូបចុក និងធ្វើពិធីផ្សេងៗ ដែលមានការប្រមូលផ្តុំ។
បន្ថែមពីនេះលោកស្រី បានគូសបញ្ជាក់ទៀតថា ការកាត់ផ្តាច់ពីបុគ្គលម្នាក់ទៅបុគ្គលម្នាក់ជារឿងសំខាន់ ដែលទាមទារឱ្យពលរដ្ឋចូលរួមអនុវត្តម៉ឺងម៉ាត់តាមវិធានកំណត់របស់ក្រសួងសុខាភិបាល និងការណែនាំរបស់រាជរដ្ឋាភិបាល ក៏ដូចជាអាជ្ញាធរ។
ជាមួយគ្នានេះលោកស្រីរដ្ឋលេខាធិការ បានបញ្ជាក់យ៉ាងដូច្នេះថា «ការកាត់ផ្តាច់ការចម្លងពីបុគ្គលម្នាក់ ទៅបុគ្គលម្នាក់ជាការចាំបាច់នៅក្នុងដំណាក់កាលនេះ។ ធ្វើម៉េចដើម្បីកាត់បាន ទី១នៅផ្ទះ បើមិនចាំបាច់ទេ បើមិនមានភារកិច្ចត្រូវធ្វើទេ កុំចល័តអីនៅផ្ទះសុខសាន្ត នៅផ្ទះមានសុវត្ថិភាព នៅផ្ទះមិនរងហានិភ័យខ្ពស់នូវការចម្លងវីរុសកូវីដ១៩អាបែបបំប្លែងថ្មី។ កុំចល័ត អ្នកភ្នំពេញនៅភ្នំពេញសិនទៅ កុំធ្វើដំណើរចេញទៅខេត្ត ហើយអ្នកខេត្តសូមកុំធ្វើដំណើរចូលមកភ្នំពេញ»។
ដោយឡែកលោកស្រី ឱ វណ្ណឌីន ក៏បានលើកឡើងពីការប្រមើមើលរបស់លោកស្រីពីការចម្លងនៃព្រឹត្តិការណ៍សហគមន៍២០កុម្ភៈដែរថា វិជ្ជមានវីរុសកូវីដ១៩ ធ្លាក់ចុះ ឬកើនឡើងអាស្រ័យលើការអនុវត្តវិធានការសុខាភិបាល និងអនុវត្តវិធានការមិនមែនសុខាភិបាល។ ជាពិសេសបើពលរដ្ឋអនុវត្តឱ្យបានម៉ត់ចត់ជាទីបំផុតដោយនៅផ្ទះ, កុំចល័តចេញបើមិនចាំបាច់, អនុវត្តវិធានការ៣ការពារ និង៣កុំឱ្យបានម៉ត់ចត់ជាទីបំផុត និងអ្នកដែលមានតម្រូវឱ្យធ្វើចត្តាឡីស័ក គឺត្រូវមានភាពស្មោះត្រង់ នោះការរីករាលដាលអាចនឹងទប់ស្កាត់។
លេីសពីនេះទៅទៀត លោកស្រី ឱ វណ្ណឌីន បានបញ្ជាក់ថា«ប្រសិនបើបងប្អូនចូលរួមអនុវត្តបាននៅក្នុងពេលពីរសប្តាហ៍នេះសម្រាប់បុគ្គលខ្ញុំអ្នកបច្ចេកទេស ខ្ញុំរំពឹងថា ស្ថានភាពជាពិសេសករណីវិជ្ជមាន និងករណីឆ្លង នឹងថយចុះជាបណ្តើរៗ ហើយយើងអាចឈានចូលទៅដល់ការបញ្ចប់នូវការចម្លងនៅក្នុងពេលឆាប់ៗ»។ ប៉ុន្តែទោះជាយ៉ាងណាលោកស្រី នៅតែព្រួយបារម្ភខ្លាចព្រឹត្តិការណ៍២០កុម្ភៈនេះ មិនអាចកាត់ផ្តាច់បាន បើពលរដ្ឋនៅតែមើលស្រាល ឬការប្រមាថចំពោះការរីករាលដាលជំងឺកូវីដ-១៩មួយនេះ៕ដោយ៖ស តារា
