ព័ត៌មានទាន់ហេតុការណ៍៖

Update ៖ ចាប់​បាន​ហើយ​! ជន​ដៃដល់​ ដែលធ្វើ​សកម្មភាព​កាប់​គ្មាន​ប្រណី​លើ​បុរស​២​នាក់ស្លាប់​ ​ពេលជិះ​ម៉ូតូ​ចូល​ផ្ទះ​ជួល​ ព្រោះតែ​ទំនាស់​រឿងស្រីស្នេហ៍

ចែករំលែក៖

ខេត្តបន្ទាយមានជ័យ៖ បើ​តាម​ការបញ្ជាក់​ពីលោក​ឧត្តមសេនីយ៍ត្រី នូ ជី​វ័​ន្ត ស្នងការ​រង​ទទួល​ការងារ​ព្រហ្មទណ្ឌ​នៃ​ស្នងការដ្ឋាន​នគរបាល​ខេត្តបន្ទាយមានជ័យ​ នៅថ្ងៃទី២២​ ខែមីនា​ ឆ្នាំ​២០២១​ បានឲ្យដឹងថា​​​ កម្លាំង​នគរបាលជំនាញ​ បាន​ស្រាវជ្រាវឃាត់ខ្លួន​ជនសង្ស័យ​ចំនួន​៣​នាក់​ ក្នុង​នោះ​មាន​ម្នាក់​គឺជា​ជន​ដៃដល់​ដែល​ជា​អ្នក​ធ្វើ​សកម្មភាព​កាប់​ជន​រង​គ្រោះ​ ពាក់​ព័ន្ធ​ករណី​ឃាតកម្ម​កាប់​សម្លាប់​មនុស្ស​បណ្ដាលឲ្យស្លាប់​ម្នាក់​ និង​របួស​ធ្ងន់​ម្នាក់​​ហើយ​ត្រូវ​បាន​បញ្ជូន​បាន​បញ្ជូន​ទៅ​សង្គ្រោះ​បន្ទាន់​ ប៉ុន្តែ​ជា​អកុសលបណ្ដាលឲ្យ​បាត់បង់​ជីវិត​ផង​ដែរ ព្រោះតែ​ទំនាស់​រឿងស្រី​។

លោក​ឧត្តមសេនីយ៍ត្រី នូ ជី​វ័​ន្ត​ បន្ត​ថា​ ករណី​ឃាត់​ជនសង្ស័យ​ទាំង៣នាក់ខាងលើ​នេះ បាន​កើតឡើង​កាលពី​វេលា​ម៉ោង​៩​និង​៣០​នាទី​យប់ ថ្ងៃ​ទី​២១ ខែមីនា ឆ្នាំ​២០២១ ស្ថិត​ក្នុងភូមិ​-​សង្កាត់​អូរ​អំបិល ក្រុង​សិរី​សោភ័ណ​។

លោកស្នងការ​រង​ទទួល​ការងារ​ព្រហ្មទណ្ឌ​រូប​នេះ​ បានបញ្ជាក់យ៉ាងដូច្នេះថា៖ ជនសង្ស័យ​ទាំង​៣​នាក់​នេះ​ ទី១,មានឈ្មោះ ចាន់ សំណាង ហៅ​អា​វ៉​ច ភេទ​ប្រុស អាយុ​២០​ឆ្នាំ រស់នៅ​ភូមិ​បាណ​យ សង្កាត់​ទឹកថ្លា ក្រុង​សិរី​សោភ័ណ ​គឺជា​ជន​ដៃដល់​។ ចំណែក​​ជនសង្ស័យ​២​នាក់​ទៀត​មិន​ទាន់​ស្គាល់ឈ្មោះ គឺជា​បក្ខពួក​។

លោក​ឧត្តមសេនីយ៍ត្រី នូ ជី​វ័​ន្ត​ បន្ថែមទៀតថា មុន​ពេល​កើតហេតុ កាលពី​យប់​វេលា​ម៉ោង​៣​ទៀប​ភ្លឺ​ឈាន​ចូល​ថ្ងៃ​ទី​២១ ខែមីនា ឆ្នាំ​២០២១ នៅ​ចំណុច​ផ្ទះ​ជួល ស្ថិត​ក្នុងភូមិ​ខ្លា​កូន​ចាស់ សង្កាត់​កំពុងស្វាយ ក្រុង​សិរី​សោភ័ណ មាន​ជន​រង​គ្រោះ​ម្នាក់​ឈ្មោះ ឈី​វ ហាក់ ភេទ​ប្រុស អាយុ​៣៨​ឆ្នាំ (​មុខរបរ​ជា​ជាងដែក​) ស្នាក់​នៅ​ធ្វើ​ការងារ​ស្រុក​ស្វាយចេក និង​មានស្រុក​កំណើត​ភូមិ​-​ឃុំ​អូរ​តា​គី ស្រុក​ថ្មគោល ខេត្តបាត់ដំបង ត្រូវ​បាន​ជនសង្ស័យ​កាប់ បណ្តាល​ស្លា​ប់​​នៅ​នឹង​កន្លែង​កើតហេតុ និង​ម្នាក់​ទៀត​របួសធ្ងន់​កំពុង​សម្រាក​ព្យាបាល​នៅ​មន្ទីរពេទ្យ​មិត្តភាព​កម្ពុជា​.​ជប៉ុន​មង្គល​បូ​រី ខណៈ​ពេល​ជន​រង​គ្រោះ​នាំ​គ្នា​ជិះ​ម៉ូតូ​ចូល​ក្នុងផ្ទះ​ជួល​ខ្លួន​វិញ ។

ដោយឡែក​លោក​ឧត្តមសេនីយ៍ទោ សិទ្ធិ ឡោះ ស្នងការ​នគរបាល​ខេត្ត​ ក៏បាន​បញ្ជាក់​ដែរ​ថា ក្រោយ​ពី​ទទួល​ព័ត៌មាន​ពី​ករណី​កាប់​ស​ម្លា​ប់​ជន​រង​គ្រោះ បណ្តាល​ស្លា​ប់​ម្នាក់ និង​ម្នាក់​ទៀត​របួសធ្ងន់​ត្រូវ​សង្គ្រោះ​បន្ទាន់​ហើយ មន្ត្រី​នគរបាល​កា​រិ​យា​ល័​ព្រហ្មទណ្ឌ​ខេត្ត​សហការ​មន្ត្រី​នគរបាល​ក្រុង​សិរី​សោភ័ណ បាន​ចុះ​ស្រាវជ្រាវ និង​កំណត់​មុខសញ្ញា​ឃាត់​ជនសង្ស័យ​ទាំង​៣​នាក់ ក្នុង​នោះ​ម្នាក់​ជា​ជន​ដៃដល់​ឈ្មោះ ចាន់ សំណាង ហៅ​អា​វ៉​ច រួច​ក៏​បញ្ជូន​មក​កាន់​ស្នងការ​នគរបាល​ខេត្តបន្ទាយមានជ័យ ដើម្បី​សាកសួរ​ចម្លើយ​។

​ស្នងការ​នគរបាល​ខេត្ត​រូប​នេះ​ បាន​បញ្ជាក់​ថា យោង​តាម​ចម្លើយ​ជនសង្ស័យ​ឈ្មោះ ចាន់ សំណាង បាន​សារភាព​ថា ខ្លួន​ពិតជា​បាន​ធ្វើ​សកម្មភាព​កាប់​ទៅ​លើ​ជន​រង​គ្រោះ​ពិតប្រាកដ​មែន ព្រោះតែ​គំនុំ​កាលពី​២​ថ្ងៃមុន នៅ​ពេល​រូបគេ​ឌុ​ប​សង្សា​របស់​ខ្លួន​ចេញពី​ធ្វើការ​ពេល​យប់ ស្រាប់តែ​ជន​រង​គ្រោះ​ឈ្មោះ ឈី​វ ហាក់ និង​បក្ខពួក​របស់​គេ ស្ទាក់​វាយ​ទៅ​លើ​ខ្លួន ។ លុះ​នៅ​យប់​កើតហេតុ​នោះ ជន​រង​គ្រោះ​បាន​ទូរស័ព្ទ​មក​លេខ​សង្សារ​របស់​គេ ខណៈ​ពេល​កំពុង​នៅ​ជាមួយ​គ្នា​ក្នុង​បន្ទប់ ហើយ​ខ្លួន (​ជនសង្ស័យ​) ក៏​បាន​ទទួល រួច​ប្រាប់​ថា ពេល​នេះ​កំពុង​នៅ​ក្នុង​បន្ទប់​ជាមួយ​សង្សារ​។

លោកស្នងការ​ បន្ថែមទៀត​ថា បន្ទាប់​ជន​រង​គ្រោះ​ក៏​បាន​ប្រាប់​ទៅ​វិញ​ថា ឱ្យ​ចាំ​មួយ​ភ្លែត​រូបគេ​ទៅ​ដល់​ឥឡូវ​ហើយ ។ លុះ​មួយសន្ទុះ​ក្រោយ ខណៈ​ពេល​ជន​រង​គ្រោះ និង​មិត្តភក្តិ​ម្នាក់​ទៀត​បាន​មក​ដល់​កន្លែង​កើតហេតុ​នោះ គឺ​ជន​រង​គ្រោះ​អង្គុយ​លើ​ម៉ូតូ ហើយ​មិត្តភក្តិ​របស់​ជន​រង​គ្រោះជា​អ្នក​ដើរ​ចូល​ទៅ​គោះ​ទ្វារ​បន្ទប់ ក៏​ស្រាប់តែ​ជនសង្ស័យ​បើកទ្វារ​ភ្លាម រួច​ក៏​យក​កាំបិត​ផ្គាក់​កាប់​ទៅ​លើ​មិត្តភក្តិ​ជន​រង​គ្រោះ​បណ្តាល​របួសធ្ងន់ ហើយ​បន្ទាប់​មក​ជនសង្ស័យ​ក៏​ស្ទុះ​ទៅ​កាប់​ជន​រង​គ្រោះ​ដែល​អង្គុយ​លើ​ម៉ូតូ​ខាងក្រៅ​បន្ទប់​ទៀត ដោយ​កាប់​ចំ​ក​ញ្ចឹ​ង​.​ក ធ្វើ​ឱ្យ​ដួល​ទាំង​ជន​រង​គ្រោះ​ទាំង​ម៉ូតូ បណ្តាល​ស្លា​ប់​នៅ​នឹង​កើត​ហេតុតែ​ម្តង។ ចំណែក​មិត្តភក្តិ​ជន​រង​គ្រោះ​ត្រូវ​បាន​បញ្ជូន​ទៅ​សង្គ្រោះ​បន្ទាន់​នៅ​មន្ទីរពេទ្យ ប៉ុន្តែ​ជា​អកុសល​បាន​បាត់បង់​ជីវិត​នៅ​មន្ទីរពេទ្យ​ក្នុង​យប់​ថ្ងៃ​ទី​២១ ខែមីនា​ផងដែរ​ ដោយ​សារ​របួស​ធ្ងន់ធ្ងរ​ពេក​។

លោក​ឧត្តមសេនីយ៍ទោ សិទ្ធិ ឡោះ​ បន្ត​ថា ក្រោយ​ពី​កាប់​ជន​រង​គ្រោះ​ទាំង​២​នាក់​ខាងលើ​នេះ​រួច ជនសង្ស័យ​បាន​ហៅ​បក្ស​ខ្លួន​មក​ទទួល រួច​ជិះ​ម៉ូតូ​រត់គេច​ខ្លួន​ដោយ​យក​កាំបិត​ផ្គាក់​ដែល​កាប់​ជន​រង​គ្រោះ​នោះ​ទៅ​ចោល​ក្នុង​ស្ទឹង​ស្ពាន​ទឹកថ្លា ហើយ​ក៏​ជិះ​ម៉ូតូ​គេចខ្លួន​បន្ត​ទៅ​ដេក​នៅ​វាល​ទំនប់​កណ្តុល​តែ​ម្តង ។ លុះ​រហូត​ដល់​ម៉ោង​៧​យប់ ថ្ងៃ​ទី​២១ ខែមីនា​នេះ ជនសង្ស័យ និង​បក្សពួក​ក៏​ជិះ​ម៉ូតូ​ត្រឡប់​ចូល​ភូមិ​វិញ ក្នុង​សង្កាត់​អូរ​អំបិល ក្រុង​សិរី​សោភ័ណ ក៏​ត្រូវ​កម្លាំង​នគរបាល​ដែល​ចាំ​តាមដាន និង​ឃ្លាំមើល​នៅ​កន្លែង​កើតហេតុ​នោះ ចាប់ខ្លួន​បាន​ទាំង​៣​នាក់​តែ​ម្តង​។

សូមជម្រាបថា ក្រោយ​ពេល​ឃាត់ខ្លួន​ជនសង្ស័យ​ឈ្មោះ ចាន់ សំណាង និង​បក្ខ​បាន​ហើយ​លោក​ឧត្តមសេនីយ៍ទោ សិទ្ធិ ឡោះ ស្នងការ​នគរបាល​ខេត្ត និង​កម្លាំង​ជំនាញ បាន​យក​ជនសង្ស័យ​ទៅ​រក​វត្ថុ​តាង​នៅ​ក្នុង​ស្ទឹង​ស្ពាន​ទឹកថ្លា តែ​រក​មិន​ទាន់​ឃើញ​ឡើយ ព្រោះតែ​យប់​ជ្រៅ​ពេក ហើយ​ទឹក​ជ្រៅ​ទៀត​។

ដោយឡែក​ជនសង្ស័យ​ឈ្មោះ ចាន់ សំណាង​ ​ក៏​បាន​សារភាព​បន្ថែម​ទៀត​ថា ពាក់ព័ន្ធ​នឹង​ករណី​ខាងលើ​នេះ គឺ​ខ្លួន​ជា​អ្នក​ប្រព្រឹត្ត​តែ​ម្នាក់ឯង​ប៉ុណ្ណោះ ។ ចំណែកឯ​សង្សារ​របស់​ជន​ដៃដល់​វិញ ក៏​ត្រូវ​បាន​កម្លាំង​កងរាជអាវុធហត្ថ​ក្រុង​សិរី​សោភ័ណ បាន​នាំ​យក​សាកសួរ​ផង​ដែរ​កាលពី​​ព្រឹក​ថ្ងៃ​ទី​២២ ខែមីនា នេះ​ដែរ​។

បច្ចុប្បន្ន​ជនដៃដល់​ និងបក្ខពួក២នាក់ទៀត​ សមត្ថកិច្ចជំនាញ​កំពុង​សាកសួរ​និង​ស្រាវជ្រាវ​បន្តថាអ្នកណាជាប់ពាក់ព័ន្ធករណីកាប់សម្លាប់មនុស្សខាងលេីនេះ​៕

ដោយ​៖សហការី​


ចែករំលែក៖