សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមមន្រ្តីប្រចាំទីក្រុងម៉ុមបៃ បានបញ្ជាក់ថា មានករណីអគ្គិភ័យដែលបានឆាបឆេះផ្សារទំនើបមួយ ដែលត្រូវបានយកធ្វើជាមន្ទីរពេទ្យសម្រាប់ព្យាបាលអ្នកជំងឺ COVID-19 នៅទីក្រុងម៉ុមបៃ (Mumbai) ប្រទេសឥណ្ឌា បណ្ដាលឲ្យមនុស្សយ៉ាងហោចណាស់០៦នាក់បានស្លាប់។
បើតាមទីភ្នាក់ងារសារព័ត៌មាន Reuters នៅរសៀលថ្ងៃសុក្រ ទី២៦ ខែមីនាឆ្នាំ២០២១ បានដកស្រង់សម្តីមន្រ្តីប្រចាំទីក្រុងម៉ុមបៃ បានគូសបញ្ជាក់យ៉ាងដូច្នេះថា៖ អ្នកជំងឺ COVID-19 ជាង ៧០នាក់ដែលសម្រាកព្យាបាលនៅឯមន្ទីរពេទ្យឯកជនជាន់ទី ៣ ត្រូវបានជម្លៀសចេញទៅកាន់មជ្ឈមណ្ឌលដទៃទៀត។
មន្រ្តីដដែលបន្តថា មូលហេតុដែលបានបណ្ដាលឲ្យមានអគ្គិភ័យឆាបឆេះបែបនេះ កំពុងស្ថិតក្រោមការស៉ើបអង្កេតនៅឡើយ ហើយគេក៏មិនទាន់ដឹងច្បាស់ដែរថា តើអ្នកស្លាប់ខាងលើជាអ្នកជំងឺ COVID-19 ឬយ៉ាងណានោះទេ។
សូមជម្រាបថា ទីក្រុង Mumbai ដែលមានប្រជាជនរស់នៅច្រើនកកកុញនៅតែកំពុងព្យាយាមពុះពារឆ្លងកាត់ ដំណាក់កាលដ៏អាក្រក់បំផុតនៃជំងឺឆ្លងរាតត្បាត COVID-19 ដែលកាលពីថ្ងៃព្រហស្បតិ៍ទី២៦ ខែមីនាម្សិលមិញនេះ បានរាយការណ៍ពីការរកឃើញនូវករណីឆ្លងថ្មីៗចំនួន៥,៥០០ករណីក្នុងមួយថ្ងៃ ដែលជាចំនួនករណីឆ្លងខ្ពស់បំផុត គិតចាប់តាំងពីមានការផ្ទុះឡើងនៃជំងឺនេះនៅក្នុងប្រទេសឥណ្ឌា។
គួរបញ្ជាក់ថា ប្រការនេះហើយទើបកាលពីប៉ុន្មានថ្ងៃមុននេះ ដែលឥណ្ឌាបានសម្រេចផ្អាក ការផ្គត់ផ្គង់វ៉ាក់សាំងទៅដល់កម្មវិធី ខូវ៉ាកស៍(COVAX) របស់អង្គការសុខភាពពិភពលោក (WHO) ដោយសារតែតម្រូវការក្នុងស្រុកកំពុងកើនឡើងយ៉ាងគំហុក៕
ដោយ៖ស តារា
