សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ នៅព្រឹកថ្ងៃទី ២៨ ខែមីនា ឆ្នាំ២០២១ បានអញ្ជើញដឹកនាំកិច្ចប្រជុំបន្ទាន់មួយ ស្តីពីការពង្រឹងវិធានការការពារ និងទប់ស្កាត់ការរីករាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ ដែលកិច្ចប្រជុំខាងលើ ធ្វើឡើងនៅសាលាខេត្តកំពង់ចាម ដោយមានការចូលរួមពីលោក លោកស្រី ជាថ្នាក់ដឹកនាំ និងសមាជិក សមាជិកានៃគណៈកម្មការប្រយុទ្ធប្រឆាំងនឹងជំងឺកូវីដ-១៩ ខេត្តកំពង់ចាម រួមនឹងមន្ត្រីពាក់ព័ន្ធមួយចំនួន។
នៅក្នុងឱកាសនោះលោកអភិបាលខេត្តកំពង់ចាម ថ្លែងថា ដើម្បីទប់ស្កាត់ការរីករាលដាលនៃជំងឺកូវីដ-១៩ ដែលកំពុងផ្ទុះឡើងចំនួន៥ ករណី នាពេលថ្មីៗនេះ អាជ្ញាធរខេត្ត សម្រេចបិទជាបណ្ដោះអាសន្ននូវទីតាំងចំនួន៤ កន្លែង ដែលមានការពាក់ព័ន្ធនឹងអ្នកវិជ្ជមានកូវីដ-១៩ ក្នុងខេត្តកំពង់ចាមរួមមាន ៖
១- គ្លីនិក ម៉ី មុនីបូរិន្ទ
២- គ្លីនិក យិន ស៊ីណាត
៣- តូបចំនួន៦ ក្នុងផ្សារធំ ក្រុងកំពង់ចាម
៤- មណ្ឌលសុខភាព ឃុំខ្ពបតាងួន ស្រុកស្ទឹងត្រង់
បើតាមលោកវេជ្ជបណ្ឌិត គីមសួរ ភីរុណ ប្រធានមន្ទីរសុខាភិបាលនៃរដ្ឋបាលខេត្តកំពង់ចាម បានឲ្យដឹងថា÷ អ្នកដែលមានផ្ទុកវិជ្ជមានកូវីដ-១៩ទាំង៥ នាក់រួមមាន៖
១- ឈ្មោះ ជួប សារ៉េត ភេទស្រី អាយុ ៤៥ ឆ្នាំ នៅភូមិ សង្កេត ឃុំ សំបូរ ស្រុកបាធាយ ខេត្តកំពង់ចាម ចូលចត្តាឡីស័ក ថ្ងៃទី ២៥ មីនា(ឆ្លងពីកូននៅភ្នំពេញ)។
២- វណ្ណា ហ្សារីន (កូនរបស់ វ៉ាន់ណា ក្រូ) ភេទស្រី អាយុ ១៨ខែ។
៣- វណ្ណា ឡូស៉ិច (កូនរបស់វ៉ាន់ណា ក្រូ) ភេទប្រុស អាយុ ៨ឆ្នាំ។
៤-ឈ្មោះ លាង សុធារី (ប្រពន្ធ វ៉ាន់ណា ក្រូ) ភេទស្រី អាយុ ២៧ឆ្នាំ នៅភូមិអូរឬស្សី ឃុំអូរឬស្សី ក្រុងក្រចេះ។
៥- ឈ្មោះ លាង ញ៉ (ឪពុកក្មេក វ៉ាន់ណា ក្រូ) ភេទប្រុស អាយុ ៧៥ឆ្នាំ នៅភូមិទីមួយ ឃុំវាលវង់ ក្រុងកំពង់ចាម។
លោកវេជ្ជបណ្ឌិតបន្តថា ចំពោះអ្នកវិជ្ជមានកូវីដ-១៩ ទាំង៥ខាងលើត្រូវបានក្រុមគ្រូពេទ្យចាត់បញ្ជូនពីមណ្ឌលចត្តាឡីស័កទៅព្យាបាលជំងឺនៅមន្ទីរពេទ្យខេត្តកំពង់ចាម។
សូមបញ្ជាក់ជូនថា លោក វ៉ាន់ណា ក្រូ ជាមន្រ្តីនរគបាលនៅខេត្តត្បូងឃ្មុំ បានមកសម្រាកព្យាបាលជំងឺនៅមន្ទីរពេទ្យខេត្តកំពង់ចាមហើយបានបន្តចម្លងជំងឺនេះដល់ឪពុកក្មេក ប្រពន្ធ និងកូនពីរនាក់បន្ថែមទៀត។
ក្នុងនាមរដ្ឋបាលខេត្ត និងគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ លោកអ៊ុន ចាន់ដា បានស្នើដល់ អាជ្ញាធរ និងកម្លាំងមានសមត្ថកិច្ចគ្រប់លំដាប់ថ្នាក់ សូមបន្តយកចិត្តទុកដាក់ខ្ពស់អំពីវិធានការនៃការអនុវត្តច្បាប់ និងការអប់រំផ្សព្វផ្សាយទៅដល់គ្រប់បណ្តាមូលដ្ឋាន និងបន្តស្រាវជ្រាវរកអ្នកដែលមានការពាក់ព័ន្ធជាមួយនឹងអ្នកដែលមានវិជ្ជមានខាងលើដើម្បីធ្វើចត្តាឡីស័ក ក៏ដូចជាយកសំណាករបស់ពួកគេ ដើម្បីតេស្តរកមេរោគកូវីដ-១៩។
លោកអភិបាលបន្តថា សូមឲ្យបងប្អូនប្រជាពលរដ្ឋយើង រួមគ្នាអនុវត្តនូវវិធានការរបស់ប្រមុខរាជរដ្ឋាភិបាល ៣ការពារ និង ៣កុំ រួមនឹងវិធានការរបស់ក្រសួងសុខាភិបាល ក្នុងការការពារ ទប់ស្កាត់ការរីករាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ សំដៅធ្វើយ៉ាងណាកុំឲ្យជំងឺដ៏កាចសហាវមួយនេះកាន់តែរីករាលដាលខ្លាំងឡើងនេះ៕
ដោយ៖ សូរិយា
