ព័ត៌មានទាន់ហេតុការណ៍៖

ទាស់សម្ដីគ្នារឿងជំពាក់លុយ១មុឺនរៀល​ ធ្វេីឲ្យបុរសម្នាក់ត្រូវអ្នកជំពាក់លុយកាប់៣កាំបិតបណ្ដាលឲ្យរងរបួសធ្ងន់​

ចែករំលែក៖

ភ្នំពេញ​ ៖​ បុរសម្នាក់បានទារលុយពីអ្នកជំពាក់ចំនួន១មុឺនរៀលមិនបាន​ ថែមទាំងត្រូវអ្នកជំពាក់លុយកាប់៣កាំបិតចំខ្នងបណ្ដាលឲ្យរងរបួសធ្ងន់​ បង្កឲ្យមានការភ្ញាក់ផ្អើលដល់ប្រជាពលរដ្ឋកាលពីវេលាម៉ោង ១​ និង២០នាទីរំលងអធ្រាត្រឈានចូលថ្ងៃទី១​ ខែមេសា ឆ្នាំ២០២១ ស្ថិតក្នុងភូមិដើមចាន់​ សង្កាត់ច្បារអំពៅ២​ ខណ្ឌច្បារអំពៅ​ រាជធានីភ្នំពេញ​ ។

​ ជនរងគ្រោះមានឈ្មោះ​ សុខ​ កា​ ភេទប្រុស​ អាយុ២៨​ឆ្នាំ​ មុខរបររត់តុការ​ ស្នាក់នៅសង្កាត់ច្បារអំពៅ១​ ខណ្ឌច្បារអំពៅ​ ។

រីឯជនបង្កមានឈ្មោះ​ ពៅ​ អាយុជាង២០ឆ្នាំ​ មុខរបរមិនពិតប្រាកដ។​

​ តាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុ​ ជនរងគ្រោះបានទៅទារលុយពីជនដៃដល់ចំនួន១មុឺនរៀល​ តែជនបង្កគ្មានលុយឲ្យទេថែមទាំងទាស់សម្ដីគ្នារហូតទាញកាំបិតកាប់មកលេីជនរងគ្រោះពីក្រោយខ្នង៣កាំបិត​ បណ្ដាលឲ្យហូរឈាមពេញខ្លួនរងរបួសធ្ងន់​ បន្ទាប់មកជនដៃដល់គេចខ្លួនបាត់​ស្រមោល​ ។

​ ក្រោយកេីតហេតុ​ ជនរងគ្រោះត្រូវបានប្រជាពលរដ្ឋដឹកតាមកង់បីឥណ្ឌាមកកាន់មន្ទីរពេទ្យបង្អែកច្បារអំពៅ​ដេីម្បីព្យាបាលរបួស​ ។ ក្នុងនោះដែរខាងមន្ទីរពេទ្យដែលប្រចាំការហាក់បីដូចជាមិនចង់ជួយសង្គ្រោះ​ ដោយរុញទៅឲ្យខាងមន្ទីរពេទ្យធំ​ និងពន្យារពេលជិតមួយម៉ោងទេីបសមត្ថកិច្ចមូលដ្ឋានចុះមកដល់ក៏ឲ្យជនរងគ្រោះដេីរចូលក្នុងបន្ទប់សង្គ្រោះបន្ទាន់ដេីម្បីព្យាបាលរបួស​តែម្ដង ៕​

ដោយ៖ភារ៉ា​ ដង្កោ​


ចែករំលែក៖