សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ដើម្បីប្រយុទ្ធប្រឆាំងរលកទី៣ នៃការឆ្លងរាតត្បាតជំងឺ COVID-19 លោក អ៊ែមម៉ានុយអ៊ែល ម៉ាក្រុង (Emmanuel Macron) ប្រធានាធិបតីបារាំង នៅថ្ងៃពុធ៣១ ខែមីនា ឆ្នាំ២០២១ បានបញ្ជាឱ្យប្រទេសបារាំងដាក់ចេញនូវវិធានការបិទទ្វារ (lockdown) នៅទូទាំងប្រទេសលើកទី ៣របស់ខ្លួន និងបាននិយាយថា សាលារៀន នឹងត្រូវបិទទ្វាររយៈពេល ០៣សប្តាហ៍។
បើតាមទីភ្នាក់ងារសារព័ត៌មាន Reuters នៅព្រឹកថ្ងៃព្រហស្បតិ៍ ០១ ខែមេសា ឆ្នាំ២០២១ បានចុះផ្សាយថា ដោយសារនៅចំពោះមុខចំនួនអ្នកស្លាប់នៃជំងឺ COVID-19 ជិត ១០០,០០០នាក់, ខណៈប្រព័ន្ធថែទាំនៅក្នុងតំបន់ដែលរងគ្រោះខ្លាំងបំផុត។ មិនតែប៉ុណ្ណោះ ចំពោះការចាក់វ៉ាក់សាំង ដែលមានភាពយឺតយាវជាងការគ្រោងទុកនោះ ទេីបលោកប្រធានាធិបតីបារាំង Macron ត្រូវបានបង្ខំឱ្យបោះបង់ចោលគោលដៅរបស់ខ្លួន ដែលចង់រក្សាប្រទេសឲ្យបើកចំហ ដើម្បីការពារសេដ្ឋកិច្ច។
ជាមួយគ្នានោះ លោក អ៊ែមម៉ានុយអ៊ែល ម៉ាក្រុង បានថ្លែងទៅកាន់ប្រជាជាតិលោកថា៖ «យើងនឹងបាត់បង់ការគ្រប់គ្រង ប្រសិនបើយើងមិនផ្លាស់ប្តូរនាពេលឥឡូវនេះទេ»។
សូមជម្រាបថា ការប្រកាសរបស់លោកប្រធានាធិបតីបារាំងខាងលើនេះ បានកើតមានឡើងបន្ទាប់ពីវិធានការរឹតត្បិត ត្រូវបានដាក់ចេញរួចទៅហើយកាលពីជាង ១សប្តាហ៍មុននៅទីក្រុងប៉ារីស និងតំបន់ភាគខាងជើង និងភាគខាងត្បូងនៃប្រទេស។ ប៉ុន្តែនាពេលឥឡូវនេះ វានឹងត្រូវអនុវត្តនៅទូទាំងប្រទេស យ៉ាងហោចណាស់រយៈពេល ០១ខែចាប់ពីថ្ងៃសៅរ៍សប្ដាហ៍នេះតទៅ ហើយសាលារៀនក៏នឹងត្រូវបិទទ្វាររយៈពេល ០៣សប្តាហ៍ចាប់ពីចុងសប្តាហ៍នេះតទៅដូចគ្នា។
គួរបញ្ជាក់ដែរថា បើតាមគេហទំព័រ Worldometers រហូតមកទល់ពេលនេះ ប្រទេសបារាំង បានកត់ត្រានូវករណីឆ្លងជំងឺ COVID-19 សរុបនៅទូទាំងប្រទេសជាង ៤,៦០០,០០០ករណី ក្នុងនោះមានអ្នកស្លាប់ជាង ៩៥,០០០នាក់ និងចំនួនអ្នកជាសះស្បើយ មិនទាន់មានការបញ្ជាក់ឲ្យបានច្បាស់លាស់ឡើយ៕
ដោយ៖ស តារា
លោក អ៊ែមម៉ានុយអ៊ែល ម៉ាក្រុង (Emmanuel Macron) ប្រធានាធិបតីបារាំង
