សារព័ត៌មាន នគរវត្ត តែងតែនាំមុខគេជានិច្ច
នាល្ងាចថ្ងៃទី ៥ ខែមេសាសមាជិករដ្ឋសភាវៀតណាមបានបោះឆ្នោតជ្រើសរើសលោក ផាមមីញជិញ សមាជិកគណកម្មការនយោបាយនិងជាប្រធានគណៈកម្មាធិការរៀបចំមជ្ឈិម ធ្វើជានាយករដ្ឋមន្ត្រីថ្មីរបស់ប្រទេសវៀតណាមដោយទទួលបានសំឡេងគាំទ្រខ្ពស់រហូតដល់ទៅ៤៦២ / ៤៦៦ ស្មើនឹង ៩៦,២៥% នេះបង្ហាញពីទំនុកចិត្តខ្ពស់នៃប្រព័ន្ធនយោបាយវៀតណាមទាំងមូលទៅលើ នាយករដ្ឋមន្ត្រីថ្មី។
លោក ផាម មីញជិន កើតនៅថ្ងៃទី ១០ ខែធ្នូ ឆ្នាំ១៩៥៨ ជាសាស្រ្តាចារ្យរងបណ្ឌិតច្បាប់ វិស្វករសំណង់។ ស្រុកកំណើតរបស់លោក គឺនៅស្រុក ហ៊ូវ ឡុក(Hau Loc) ខេត្ត ថាញ់វ៉ា Thanh Hoa ។ លោកគឺជាសមាជិកគណកម្មការនយោបាយអាណត្តិទី XII, XIII។ លេខាធិការគណៈកម្មាធិការមជ្ឈឹមបក្សអាណត្តិទី XII ។ សមាជិកគណៈកម្មាធិការកណ្តាលនៃអាណត្តិទី XI, XII, XIII ។ ប្រធានគណៈកម្មាធិការកណ្តាលសម័យប្រជុំលើកទី ១២ និងជាសមាជិក រដ្ឋសភាអាណត្តិទី XIV ។
ចាប់ផ្តើមធ្វើការក្នុងឆ្នាំ ១៩៨៤ លោក ផាម មីញជិញ ត្រូវបានចាត់តាំងជាអ្នកស្រាវជ្រាវវិទ្យាសាស្ត្រ នាយកដ្ឋានស្រាវជ្រាវវិទ្យាសាស្ត្រ ស្រាវជ្រាវសេដ្ឋកិច្ច និងបច្ចេកទេសនៃក្រសួងមហាផ្ទៃ នៅឆ្នាំ ២០០៦ ។ លោកត្រូវបានតែងតាំងជាអគ្គនាយករងនៃក្រសួងសន្តិសុខសាធារណៈនៅខែកុម្ភៈឆ្នាំ ២០១០។ លោកត្រូវបានតែងតាំងជាអគ្គនាយកនៃអគ្គនាយកដ្ឋានបច្ចេកវិទ្យានៃក្រសួងសន្តិសុខសាធារណៈ នៅខែមីនាឆ្នាំ ២០១០ គាត់ត្រូវបានតម្លើងឋានៈជាសាស្ត្រាចារ្យរងផ្នែកជំនាញច្បាប់។
នៅខែសីហាឆ្នាំ ២០១០ លោក ផាម មីញជីញ ត្រូវបានតែងតាំងជារដ្ឋលេខាធិការនៃ ក្រសួងសន្តិសុខសាធារណៈ ។ នៅខែមករាឆ្នាំ ២០១១ លោកត្រូវបានបោះឆ្នោតជ្រើសរើសជាសមាជិកមជ្ឈឹមនៃគណបក្សអាណត្តិទី XI ។ចាប់ពីខែសីហាឆ្នាំ ២០១១ ដល់ខែមេសាឆ្នាំ ២០១៥ លោកត្រូវបានផ្ទេរនិងចាត់តាំងដោយការិយាល័យនយោបាយវៀតណាមឱ្យចូលរួមក្នុងក្រុមប្រឹក្សាប្រតិបត្តិគណៈកម្មាធិការអចិន្ត្រៃយ៍និងកាន់តំណែងជាលេខាគណៈកម្មាធិការបក្សខេត្ត ក្វាងនិញ អាណត្តិទី XIII ឆ្នាំ២០១០-២០១៥ ។
នៅខែមករាឆ្នាំ ២០១៦ នៅក្នុងសមាជបក្សលើកទី XII លោកត្រូវបានគេបោះឆ្នោតជ្រើសរើសជាគណៈកម្មាធិការកណ្តាលនៃបក្សកុម្មុយនិស្តវៀតណាម។ នៅក្នុងកិច្ចប្រជុំលើកទី ១ នៃគណៈកម្មាធិការមជ្ឈឹមបក្សកអាណត្តិទី ១២ គាត់ត្រូវបានគេបោះឆ្នោតជ្រើសរើសជាសមាជិកក្រសួងនយោបាយ ។ នៅខែកុម្ភះឆ្នាំ ២០១៦ ក្រសួងនយោបាយបានសំរេចចិត្តតែងតាំងលោកកាន់តំណែងទៅលេខាធិការដ្ឋានគណៈកម្មាធិការកណ្តាលដោយកាន់តំណែងជាប្រធានគណៈកម្មាធិការរៀបចំមជ្ឈិម។
ភ្លាមៗបន្ទាប់ពីពិធីស្បថចូលកាន់តំណែងជាផ្លូវការនាយករដ្ឋមន្រ្តីថ្មីនៃប្រទេសវៀតណាម លោកបានសម្តែងការគោរព និងដឹងគុណយ៉ាងជ្រាលជ្រៅចំពោះលោកប្រធាន ហ៊ូ ជីមិញដែលជាមេដឹកនាំដ៏អស្ចារ្យរបស់ប្រជាជាតិវៀតណាម មេដឹកនាំជាន់ខ្ពស់ព្រឹទ្ធាចារ្យនៃបដិវត្ត។ វីរបុរសយុទ្ធជន មាតាវីរជន ចូលរួមវិភាគទានយ៉ាងធំធេងក្នុងបុព្វហេតុកសាងនិងការពារមាតុភូមិវៀតណាម។ ជាមួយគ្នានេះលោកក៏បានធ្វើសេចក្តីថ្លែងការណ៍បញ្ជាក់អំពីការប្តេជ្ញាចិត្តរបស់រដ្ឋាភិបាលវៀតណាមក្នុងអាណត្តិថ្មី ២០២១ – ២០២៦ ។
លោកមានប្រសាសន៍ថាខ្លួនលោកបានដឹងយ៉ាងច្បាស់ថា រដ្ឋាភិបាលនិងសកម្មភាពរបស់រដ្ឋាភិបាលមានតួនាទីយ៉ាងសំខាន់ណាស់ក្នុងការកសាងនិងអភិវឌ្ឍន៍ប្រទេស។ ការពារដាច់ខាតនូវឯករាជ្យអធិបតេយ្យភាពឯកភាព និងបូរណភាពទឹកដីនៃមាតុភូមិដើម្បីគោលដៅប្រជាជនធូធា ប្រទេសរឹងមាំ ប្រជាធិបតេយ្យ សមភាពនិងភាពថ្លៃថ្នូ។ រដ្ឋាភិបាលគឺជាស្ថាប័នរដ្ឋបាលកំពូលរបស់រដ្ឋអនុវត្តអំណាចប្រតិបត្តិ ស្ថាប័នប្រតិបត្តិ នៃរដ្ឋសភានិងគោរពតាមរដ្ឋធម្មនុញ្ញនិងច្បាប់។
ឆ្លើយតបទៅនឹងសំណូមពរនៃការបន្តជំរុញការផ្លាស់ប្តូររបស់បក្សយ៉ាងទូលំទូលាយនិងស៊ីជម្រៅរដ្ឋាភិបាលលោកនាយករដ្ឋមន្រ្តីថ្មី បានទទួលស្គាល់យ៉ាងច្បាស់នូវទំនួលខុសត្រូវរបស់ខ្លួនក្នុងការទទួលមរតកនិងលើកកម្ពស់សមិទ្ធិផលដែលទទួលបាន ។ បន្តការច្នៃប្រឌិតបង្កើតការផ្លាស់ប្តូរដ៏ខ្លាំងក្លានិងមានប្រសិទ្ធភាពជាងមុននាពេលខាងមុខ ជាពិសេស៖
ទី ១- កសាងផែនការសកម្មភាពមួយដើម្បីអនុវត្តសេចក្តីសម្រេចចិត្តនៃមហាសន្និបាតលើកទី XIII របស់បក្ស ដែលផ្តោតលើបេសកកម្មសំខាន់ៗចំនួន ៦ និងរបត់យុទ្ធសាស្ត្រ ៣ ។ បន្តសម្រេចបានយន្តការនិងគោលនយោបាយ ជាពិសេសធ្វើឱ្យល្អ នូវស្ថាប័នសេដ្ឋកិច្ចដែលមានទិសដៅទីផ្សារសង្គមនិយម។ ផ្លាស់ប្តូរថ្មីនូវគំរូកំណើនសេដ្ឋកិច្ច ពង្រឹងវិមជ្ឈការ ទន្ទឹមនឹងនេះកំណត់ឱ្យច្បាស់នូវទំនួលខុសត្រូវលើកកម្ពស់ការផ្តួចផ្តើមគំនិតនិងការច្នៃប្រឌិតនៅគ្រប់ស្ថានប័ន។
ទី ២- បន្តជំរុញការកសាងនីតិរដ្ឋសង្គមនិយម រដ្ឋរបស់ប្រជាជន ដើម្បីប្រជាជន។ ប្រកាន់ខ្ជាប់ស្មារតីនៃការគោរពច្បាប់។ ពង្រឹងវិន័យ រដ្ឋបាលរដ្ឋនិងសង្គមទាំងមូល។ កំណែទម្រង់រឹងមាំនៃរដ្ឋបាលជាតិ។ មានយន្តការលើកទឹកចិត្តនិងការពារអ្នកច្នៃប្រឌិត ហ៊ានគិតហ៊ានធ្វើហ៊ានទទួលខុសត្រូវដើម្បីប្រយោជន៍រួម។
ទី៣- គ្រប់គ្រងប្រមូលផ្តុំ និងប្រើប្រាស់ធនធានទាំងអស់ប្រកបដោយប្រសិទ្ធភាព សម្រាប់ការអភិវឌ្ឍជាតិ។ ជំរុញការអភិវឌ្ឍហេដ្ឋារចនាសម្ព័ន្ធយុទ្ធសាស្រ្ត សំខាន់ៗ។ ផ្តោតសំខាន់ទៅលើការផ្លាស់ប្តូរឌីជីថលជាតិ និងការអភិវឌ្ឍសេដ្ឋកិច្ចឌីជីថល ដោយឈរលើមូលដ្ឋានវិទ្យាសាស្ត្រនិងបច្ចេកវិទ្យា។ បង្កើតបរិយាកាសនិងលក្ខខណ្ឌអំណោយផលសម្រាប់ផលិតកម្មនិងអាជីវកម្មដើម្បីអភិវឌ្ឍ។ ការពារយ៉ាងសកម្មនិងចាត់វិធានការប្រកបដោយប្រសិទ្ធភាពដើម្បីជំនះនូវផលប៉ះពាល់អវិជ្ជមាននៃគ្រោះមហន្តរាយធម្មជាតិ ការប្រែប្រួលអាកាសធាតុការបំពុលបរិស្ថាន ការរីករាលដាលជាពិសេសជំងឺរាតត្បាតកូវីដ១៩ ។
ទី ៤- ការពារដាច់ខាតឯករាជ្យអធិបតេយ្យភាពនិងបូរណភាពទឹកដី។ ធានាការពារជាតិសន្តិសុខសណ្តាប់ធ្នាប់និងសុវត្ថិភាពសង្គម។ បន្តអនុវត្តគោលនយោបាយការបរទេសឯករាជ្យភាពស្វ័យភាព ពហុភាគី នីយកម្មកិច្ចសហប្រតិបត្តិការនិងការអភិវឌ្ឍន៍។ ធ្វើសមាហរណកម្មយ៉ាងសកម្មនិងចូលរួមសហគមន៍អន្តរជាតិយ៉ាងស៊ីជម្រៅនិងប្រកបដោយប្រសិទ្ធភាពដែលជាសមាជិកមានការទទួលខុសត្រូវនិងមានកេរ្តិ៍ឈ្មោះនៃសហគមន៍អន្តរជាតិ។
ទី ៥- កសាងយន្តការគោលនយោបាយនិងលក្ខខណ្ឌសម្រាប់ការអភិវឌ្ឍវប្បធម៌និងប្រជាជនវៀតណាមឱ្យក្លាយជាធនធាននិងកម្លាំងចលករដ៏សំខាន់ក្នុងការអភិវឌ្ឍសេដ្ឋកិច្ចសង្គម។ ដើម្បីទទួលយកដំណោះស្រាយប្រកបដោយប្រសិទ្ធភាពដើម្បីលើកកម្ពស់គុណភាពនៃការថែទាំសុខភាពការអប់រំនិងការបណ្តុះបណ្តាលផ្សារភ្ជាប់ ក្នុងការអភិវឌ្ឍធនធានមនុស្សដែលមានគុណភាពខ្ពស់និងទាក់ទាញ អ្នកមានទេពកោសល្យ។ អភិវឌ្ឍប្រព័ន្ធសន្តិសុខសង្គមឱ្យកាន់តែទូលំទូលាយដោយមានការយកចិត្តទុកដាក់ បន្ថែមទៀតចំពោះតំបន់ដាច់ស្រយាលព្រំដែនកោះជនជាតិភាគតិច និងក្រុមដែលជួបការលំបាកនៅក្នុងសង្គម។ ថែរក្សាសម្ភារៈនិងជីវិត ស្មារតី របស់ប្រជាជនដើម្បីឱ្យមនុស្សម្នាក់ៗអាចរស់នៅប្រកបដោយភាពរុងរឿងសុភមង្គលសុវត្ថិភាពនិងស៊ីវិល័យ។
ទំនាក់ទំនងវៀតណាម – កម្ពុជាកាន់តែរីកចម្រើនពីមួយថ្ងៃទៅមួយថ្ងៃ
ទំនាក់ទំនងរវាងរដ្ឋាភិបាលវៀតណាម និងបណ្តាប្រទេសដទៃទៀតលើពិភពលោកនាពេលកន្លងមកបន្តទទួលបានលទ្ធផលសំខាន់ៗ និងទូលំទូលាយ រួមចំណែកបង្កើតមូលដ្ឋានគ្រឹះនយោបាយដ៏សំខាន់មួយសម្រាប់ស្ថិរភាព ពង្រីកនិងរឹតបន្តឹងទំនាក់ទំនងទ្វេភាគី ។ បញ្ហាទាក់ទងនឹងសន្តិសុខនិងការអភិវឌ្ឍប្រទេស ដោយរួមចំណែកដល់ការថែរក្សាបរិយាកាសប្រកបដោយសន្តិភាពនិងស្ថេរភាព។ ជាពិសេសទំនាក់ទំនងរវាងប្រទេសវៀតណាមនិងបណ្តាប្រទេស សង្គមនិយម និងប្រទេសជិតខាងនៅតែបន្តដើរតួនាទីស្នូល ជាទិសដៅយុទ្ធសាស្ត្ររួមសម្រាប់ទំនាក់ទំនងទ្វេភាគី។ រយៈពេលកន្លងមក វៀតណាម និងកម្ពុជា កាន់តែជិតស្និទ្ធ និងការអភវឌ្ឍន៍ស៊ីជម្រៅ និងទទួលបានសមត្ថផលលេចថ្លោជាច្រើន។
នៅឆ្នាំ ២០២០ បើទោះបីប្រឈមនឹងផលប៉ះពាល់ធ្ងន់ធ្ងរនៃការរាតត្បាត Covid-19 លើគ្រប់វិស័យតាំងពី ជីវភាពរស់នៅ សន្តិសុខនយោបាយរហូតដល់សេដ្ឋកិច្ចសង្គម។ ក្នុងស្មារតីនៃទំនាក់ទំនងជិតខាងល្អ ប្រពៃណីកិច្ចសហប្រតិបត្តិការប្រកបដោយនិរន្តរភាពយូរអង្វែងរវាងប្រទេសទាំងពីររដ្ឋាភិបាលនិងប្រជាជននៃប្រទេសទាំងពីរវៀតណាម – កម្ពុជាបានសហការយ៉ាងសកម្មក្នុងការជួយនិងគាំទ្រគ្នាទៅវិញទៅមក ក្នុងការបង្ការនិងទប់ស្កាត់ការរាតត្បាត កូវីដ១៩ ទន្ទឹមនឹងនោះខិតខំរក្សាសកម្មភាពក្នុងកិច្ចសហប្រតិបត្តិការទ្វេភាគីរវាងប្រទេសទាំងពីរ។
អំពីនយោបាយ, ទាក់ទងនឹងសន្តិសុខខេត្តតាមព្រំដែន, អំពីវប្បធម៌អប់រំ, ទាក់ទងនឹងសេដ្ឋកិច្ច – ពាណិជ្ជកម្ម ទាក់ទងនឹងការវិនិយោគ រហូតដល់វិស័យឧស្សាហកម្ម ថ្នាក់ដឹកនាំជាន់ខ្ពស់នៃប្រទេសទាំងពីរ បានបន្តរក្សាទំនាក់ទំនងយ៉ាងល្អប្រសើរ និងអភិវឌ្ឍន៍ឡើងជាលំដាប់ ឲ្យកាន់តែប្រសើរឡើងលើគ្រប់វិស័យ ។
ជាមួយនឹងទំណាក់ទំនងការបរទេសតភ្ជាប់លើការអភិវឌ្ឍទំនាក់ទំនងស្នូលជាមួយប្រទេសជិតខាង មានព្រំដែនជាប់គ្នា របស់រដ្ឋាភិបាលវៀតណាមប្រាកដណាស់ថាទំនាក់ទំនងរវាងវៀតណាមនិងកម្ពុជាក្នុងពេលខាងមុខកាន់តែជិតស្និទ្ធនិងទទួលបានសមិទ្ធិផលដ៏អស្ចារ្យជាច្រើនទៀត សម្រាប់ជាផលប្រយោជន៍របស់ប្រជាជននៃប្រទេសទាំងពីរ៕ដោយ៖ធីរីណា
