សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ មនុស្ស ២នាក់ បានដួលបោកខ្លួនទៅនឹងថ្នល់រងរបួសរៀងៗខ្លួន ចំណែកម៉ូតូស៊េរីទំនើបមួយគ្រឿងម៉ាក BMW 1200cc GS Adventure មានតម្លៃជិត២ម៉ឺនដុល្លារអាមេរិក ត្រូវភ្លើងឆេះហ្មត់ខ្ទេចគ្មានសល់ ក្រោយពួកគាត់ជួបគ្រោះថ្នាក់ចរាចរណ៍រវាងម៉ូតូ និងម៉ូតូ។
បេីយោងតាមមន្រ្តីនាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានបង្ហោះនៅលើបណ្តាញសង្គមហ្វេសប៊ុកថា៖ កាលពីវេលាម៉ោង១ និង១៤នាទីរសៀលថ្ងៃទី២៥ មេសា ២០២១នេះ មានករណីគ្រោះថ្នាក់ចរាចរណ៍មួយកើតឡើងរវាងម៉ូតូ និងម៉ូតូ បណ្តាលឲ្យមានអគ្គីភ័យឆាបឆេះម៉ូតូធុនធំស៊េរីទំនើបមួយគ្រឿងម៉ាក BMW 1200cc GS Adventure (ដែលមានតម្លៃជិត២ម៉ឺនដុល្លារអាមេរិក) ភ្លើងឆេះហ្មត់ខ្ទេចអស់ នៅចំណុចភូមិថ្មដែកកេះ ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ជាប់ព្រំប្រទល់ខេត្តឧត្តរមានជ័យ ជាប់ផ្លូវបំបែកទៅប្រាសាទបន្ទាយឆ្មារ ។
ក្រោយកេីតហេតុ សមត្ថកិច្ចជំនាញចរាចរណ៍ បានចុះទៅដល់កន្លែងកេីតហេតុភ្លាមៗ នឹងធ្វើការវាស់វែងតាមជំនាញ ដោយយកវត្ថុតាងទាំងពីរ ទាំងឆេះយកទៅរក្សាទុក រងចាំដោះស្រាយគ្នាតាមក្រោយ។ ប៉ុន្តែករណីនេះនៅពុំទាន់ដឹងមូលហេតុនៅឡើយទេ៕ដោយ៖សហការី
