នៅខេត្តកំពង់ឆ្នាំង,អភិបាលស្រុកសាមគ្គីមានជ័យ បាញ់សម្លាប់គោអ្នកស្រុក ក្នុងសាលាស្រុក បង់លុយ៤លាន , នៅខេត្តព្រះវិហារ មន្ត្រីនគរបាលបាញ់សម្លាប់គោអ្នកភូមិ២ក្បាល បង់៥លានរៀល

ខេត្ត​ព្រះ​វិហារ​ ៖​ ហេតុអីក៏មន្ត្រីរដ្ឋបាលមុខងារសាធារណៈ មានតួនាទី បុណ្យស័ក្តិ មួយចំនួនតូចចិញ្ចឹមចិត្ត ជាមនុស្សអប្រិយ លេងស្គាល់ច្បាប់ បាញ់បោះសេរី បាញ់គោអ្នកស្រុក តាមការនឹកឃើញបែបចរិកមិនថ្លៃទៅវិញ !។

នៅឯខេត្តកំពង់ឆ្នាំង លោកអភិបាលស្រុកសាមគ្គីមានជ័យ បានបាញ់សម្លាប់គោ អ្នកស្រុកក្នុងបរិវេណសាលាស្រុករបស់ខ្លួនធ្វើការ, មុនដំបូងបដិសេធថាមិនបានបាញ់ទេ ក្រោយមានការស៊ើបអង្កេតពីនគរបាលខេត្ត ទើបសារភាពថាខ្លួនបានយកកាំភ្លើងអាកាបត់បាញ់ស្តាកាណុង ក៏ផ្លាតត្រូវគោនោះ ។ ដំណឹងចុងក្រោយឮថាបង់លុយ ៤លានរៀលបញ្ចប់រឿង។

តើឯណាទៅភាពថ្លៃថ្នូរក្នុងនាមជាអាជ្ញាធរដឹកនាំមូលដ្ឋាន?

ដោយឡែកនៅខេត្តព្រះវិហារវិញ, កាលម្សិលមិញ​គោអ្នកស្រុក​ ចំនួន​ពីរក្បាល​ ក្នុងចំណោមជាច្រេីនក្បាលដែលចិញ្ចឹមយកផលប្រយោជន៍ បានដួលប្រកាច់ងាប់នៅចំណុចដីស្រែមន្ត្រីនគរបាល នៃអធិការដ្ឋាននគរបាលស្រុកឆែប ខេត្តព្រះវិហារ​ ហេីយត្រូវបានម្ចាស់គោអះអាងថា​ មន្ត្រីនគរបាល​រូបនេះបាន​ប្រេីកាំភ្លេីងបាញ់សម្លាប់​គោរបស់គាត់ ។

មិនយូរប៉ុន្មាន​ ដំណឹងគ្រប់គ្រងកំហឹងខ្លួនឯង​មិនបាន​ទាញដៃកេះកៃកាំភ្លេីងបាញ់​ សម្លាប់គោបានក្លាយជារឿងពិត​ គឺកេីត​ ហេតុនៅរសៀលថ្ងៃទី០១ ខែឧសភា ឆ្នាំ២០២១​ រហូត​មានការសម្របសម្រួលគ្នា​ ម្ចាស់គោទារ​លុយ៥លានរៀល តែមន្ត្រីនគរបាល​នោះឲ្យត្រឹម៤.៥លានរៀល តែម្ចាស់គោមិនព្រម ។ ចុងបញ្ចប់មន្ត្រីរូបនោះបានយកលុយ៥លានរៀលទៅឲ្យម្ចាស់គោ តែម្ចាស់គោដូរចិត្ត​មិនព្រមទទួល​យក​​លុយឡេីយ​ ។

យោងតាម​ប្រភព​ព័ត៌មាន​ឲ្យ​ដឹង​ថា​, ជនរងគ្រោះជាម្ចាស់គោ ឈ្មោះ ផេង ផល អាយុ៣៣ឆ្នាំ និងមានប្រពន្ធឈ្មោះ រឹម សៀក អាយុ៣២ឆ្នាំ រស់នៅភូមិឃុំខាងលើ។ ដោយឡែកមន្ត្រីនគរបាល ដែលលើកកាំភ្លើងបាញ់គោអ្នកស្រុក ឈ្មោះ អៀ គាវាសនា ហៅពែក ឋានន្តរស័ក្ដិអនុសេនីយ៍ទោ មានតួនាទីនាយផ្នែកប្រឆាំងគ្រឿងញៀន នៃអធិការដ្ឋាននគរបាលស្រុកឆែប។
ជាទម្លាប់យូរលង់មកហេីយ​ គោរបស់អ្នកស្រុកក្នុងរដូវនេះ​ គឺលែងទាំងអស់គ្នា លុះពេលល្ងាចបានម្ចាស់គោស្វែងរកចាប់គោរៀងៗ ខ្លួនមកចងនៅឯផ្ទះ។ ដោយឡែកចំពោះគោ២ក្បាល ដែលមន្ត្រីប៉ូលិសស្រុកឆែបបាញ់នេះ គឺដើរក្នុងហ្វូងគោជាច្រើនក្បាលទៀត នៅក្នុងស្រែរបស់មន្ត្រីនគរបាល ដែលទើបនឹងសាបព្រួស ដែលជាហេតុធ្វើឲ្យមន្ត្រីនោះ ខឹងក៏លើកកាំភ្លើងបាញ់តែម្តង។

ទាក់ទងនឹងករណីនេះ លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្តព្រះវិហារ បានចេញសេចក្ដីសម្រេចផ្អាកការងារមន្ដ្រីនគរបាលរូបនេះ ជាបណ្ដោះអាសន្ន ដោយត្រូវឲ្យទៅបង្ហាញខ្លួនរៀងរាល់ម៉ោងធ្វើការ នៅការិយាល័យបុគ្គលិក នៃស្នងការដ្ឋាននគរបាលខេត្តព្រះវិហារ ដើម្បីរង់ចាំសេចក្ដីសម្រេចថ្មី៕

ដោយ ៖ វណ្ណៈ