យន្តហោះដឹកទំនិញធំបំផុតលើពិភពលោក ដឹកម៉ាស៊ីនផលិត អ៊ុកសុីហ្សែនចុះចតនៅឥណ្ឌា

ចែករំលែក៖

រដ្ឋាភិបាល អង់គ្លេសបានឲ្យដឹងថា យន្តហោះដឹកទំនិញធំបំផុត លើពិភពលោក បានចាកចេញពី Belfast ស្ថិតនៅអៀកឡង់ខាងជើង នៅថ្ងៃទី ៧ខែឧសភា ដោយនាំម៉ាស៊ីនផលិតអ៊ុកសុីហ្សែន៣គ្រឿង ដែលអាចផលិតអ៊ុកស៊ីហ្សែនបាន ១៨តោន និងម៉ាស៊ីនជំនួយដង្ហើម ១០០០គ្រឿង។
ការិយាល័យក្រសួងការបរទេសអង់គ្លេសបានឲ្យដឹងថា បុគ្គលិក អាកាសយានដ្ឋានបានធ្វើការពេញមួយយប់ដើម្បីរៀបចំ ការដឹកជញ្ជូនជំនួយទៅកាន់ប្រទេសឥណ្ឌា តាមយន្តហោះដឹកជញ្ជូនធំបំផុតលើពិភពលោក Antonov 124។ តាមគម្រោងយន្តហោះ Antonov 124 នឹងចុះចតនៅក្នុងទីក្រុងញូវដេលី នាថ្ងៃទី ៩ខែឧសភា ។
នៅពេលនេះដែរ ឥណ្ឌា មានករណីស្លាប់ដោយកូវីដ-១៩ កើនឡើងដល់ទៅ៤១៩២នាក់ ក្នុងរយៈពេល២៤ម៉ោងកន្លងទៅ។ នេះជាចំនួនស្លាប់ខ្ពស់បំផុតមិនធ្លាប់មានពីមុនមក ធ្វើឲ្យចំនួនអ្នកស្លាប់សរុប ដល់ទៅ 238.283 នាក់។
នៅថ្ងៃទី ៧ខែឧសភា ប្រទេសឥណ្ឌាក៏បានរកឃើញករណីឆ្លងដល់ទៅជាង ៤០១ពាន់នាក់ ធ្វើឲ្យអ្នកឆ្លងសរុបកើនឡើងជិត២២លាននាក់ហើយ។ តំបន់ដែលរងផលប៉ះពាល់ខ្លាំងជាងគេដោយសាររលកកូវីដ-១៩ លើកទីពីរ គឺនៅរដ្ឋ Maharashtra, Madhya Pradesh, Telangana និងរដ្ឋធានី New Delhi៕