សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមទីភ្នាក់ងារសារព័ត៌មាន BBC នៅថ្ងៃអាទិត្យ ទី០៩ ខែឧសភា ឆ្នាំ២០២១ បានដកស្រង់ចេញសម្តីរបស់លោក អែមម៉ានុយអែល ម៉ាក្រុង ប្រធានាធិបតីបារាំង បានអំពាវនាវឲ្យសហរដ្ឋអាមេរិកលុបចោលការរឹតត្បិត ឬបម្រាមលើការនាំចេញវ៉ាក់សាំង COVID-19 និងវត្ថុធាតុដើមសំខាន់ៗដែលចាំបាច់សម្រាប់ផលិតវ៉ាក់សាំង។
ទីភ្នាក់ងារសារព័ត៌មាន BBC បាននិយាយបន្ថែមថា ចំពោះការអំពាវនាវរបស់លោក ម៉ាក្រុង ធ្វើឡើងនៅចំពេលសហរដ្ឋអាមេរិក និងបណ្ដាប្រទេសអឺរ៉ុបមួយចំនួន កំពុងខ្វែងគំនិតគ្នាជុំវិញមធ្យោបាយបង្កើនការផលិតវ៉ាក់សាំង នៅទូទាំងពិភពលោក ក្រោយរដ្ឋបាលាមេរិកលោក ចូ បៃដិន ប្រកាសគាំទ្រលើកលែងប៉ាតង់វ៉ាក់សាំង។
បើតាមការអះអាងពីលោកប្រធានាធិបតីបារាំង បានបញ្ជាក់ថា ការបង្កើនការនាំចេញ និងការផលិត ទើបជាមធ្យោបាយល្អមួយក្នុងការដោះស្រាយវិបតិ្ត COVID-19 នាពេលបច្ចុប្បន្ន។ បន្ថែមពីនេះលោក ម៉ាក្រុង បានគូសបញ្ជាក់បន្ថែមដូច្នេះថា៖ «គន្លឹះសំខាន់ដើម្បីផលិតវ៉ាក់សាំងឱ្យបានកាន់តែលឿនរហ័សសម្រាប់ផ្គត់ផ្គង់ដល់បណ្ដាប្រទេស ក្រីក្រទាំងអស់ ឬប្រទេសមានប្រាក់ចំណូលមធ្យម នោះគឺបង្កើនការផលិត»។
ប្រធានាធិបតីបារាំងរូបនេះ បន្តទៀតថា សហរដ្ឋអាមេរិក គួរតែលុបចោលការរឹតត្បិតមិនមែនត្រឹមតែលើ ការនាំចេញវ៉ាក់សាំងប៉ុណ្ណោះទេ ប៉ុន្តែក៏ត្រូវលុបចោលការរឹតត្បិតលើការនាំចេញវត្ថុធាតុដើមសម្រាប់ផលិតវ៉ាក់សាំងផងដែរ ដែលកំពុងបង្កការរាំងស្ទះដល់ការផលិត។
គួរជម្រាបថា បច្ចុប្បន្ន វ៉ាក់សាំង ១.២៥ពាន់លានដូស ត្រូវបានប្រើប្រាស់ ឬចាក់នៅជុំវិញពិភពលោក។ ក៏ប៉ុន្តែ វ៉ាក់សាំងតិចជាង ១ភាគរយតែប៉ុណ្ណោះ ត្រូវបានប្រើប្រាស់នក្នុងបណ្ដាប្រទេសក្រីក្រចំនួន២៩ នៅជុំវិញពិភពលោក ហើយវ៉ាក់សាំងភាគច្រើនកំពុងស្ថិតនៅកណ្ដាប់ដៃប្រទេសអ្នកមានដូចជា សហរដ្ឋអាមេរិក និងចក្រភពអង់គ្លេសដែលត្រូវបានគេរាយការណ៍ថា បានទិញវ៉ាក់សាំងស្ដុកទុកលើសមិនប្រើរាប់រយលានដូស៕ដោយ៖ស តារា
រូបភាព៖AFP និងBBC
