សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ យុវជន២នាក់ស្លាប់បាត់បង់ជីវិតយ៉ាងអណោចអធ័ម និងម្នាក់ទៀតរងរបួសធ្ងន់ ខណៈបើកម៉ូតូឌុបគ្នា ចាប់ហ្វ្រ័ងបូមបណ្ដាលឲ្យដួល ហើយខ្ទាតទៅបុកបង្គោលព្រំដីបន្ថែមទៀត បង្កការផ្អើលឆោឡោឡើង នៅថ្ងៃទី៩ ខែឧសភា ឆ្នាំ២០២១.វេលាម៉ោង១៩និង៤៥នាទីយប់ នៅលើផ្លូវបេតុង ស្ថិតក្នុងភូមិទួលសុភី ឃុំព្រែកគយ ស្រុកស្អាង ខេត្តកណ្តាល ។
មន្ត្រីចរាចរណ៍ស្រុកស្អាងបានឲ្យដឹងថា ជនរងគ្រោះឈ្មោះ ថាច ពេជ ភេទប្រុសអាយុ១៩ឆ្នាំ (ស្លាប់) ជាអ្នកបើកបរម៉ូតូម៉ាកប៊ីត (Beat) ពណ៌ស ពាក់ស្លាកលេខ កណ្តាល1A J-1976 រួមដំណើរដោយឈ្មោះ អឿ លាងហេង ភេទប្រុស អាយុ១៨ឆ្នាំ (ស្លាប់) និងអ្នករួមដំណើរម្នាក់ទៀតឈ្មោះ ស្រី សុខហេង ភេទប្រុសអាយុ១៨ឆ្នាំ(របួសធ្ងន់)។ ជនរងគ្រោះទាំង៣នាក់មានទីលំនៅភូមិកំពង់ទ្រា ឃុំស្អាងភ្នំ ស្រុកស្អាង ខេត្តកណ្តាល។
ប្រភពដដែលបន្តថា នៅថ្ងៃខែឆ្នាំកើតហេតុខាងលើ ជនរងគ្រោះទាំង៣នាក់ បានបើកម៉ូតូឌុបគ្នា ក្នុងទិសដៅ ពីលិចទៅកើត លុះបើកមកដល់ចំណុចភូមិឃុំកើតហេតុអ្នកបើកបរម៉ូតូ ក៌បានចាប់ហ្រ្វ័ងបូមមុខបណ្តាលបោកដួលបុកបង្គោលព្រំដី បណ្តាលអោយស្លាប់មនុស្សចំនួន២នាក់នៅកន្លែងកើតហេតុ និងរងរបួសធ្ងន់មនុស្សម្នាក់(មិនពាក់មួកសុវត្ថិភាពទាំងបី)។
ក្រោយពេលកើតហេតុសមត្ថកិច្ចជំនាញបានចុះមកពិនិត្យ និងវាស់វែងកន្លែងកើតហេតុ រួចយកវត្ថុតាងមករក្សាទុកនៅអធិការដ្ឋានស្រុកស្អាងរង់ចាំដោះស្រាយតាមនីតិវិធី ។
ចំណែកអ្នករងរបួស ត្រូវបានសាច់ញាតិបញ្ជូនទៅមន្ទីរពេទ្យភ្នំពេញ។
ចំណែកសពទាំង២ ត្រូវបានប្រគល់អោយសាច់ញាតិយកទៅធ្វើបុណ្យតាមប្រពៃណី។
ការសន្និដ្ឋានបឋមរបស់សមត្ថកិច្ច ករណីនេះបណ្ដាលមកពីអ្នកបើកបរម៉ូតូ ខ្វះការប្រុងប្រយ័ត្នបើកបរក្នុងល្បឿនលឿន ទើបបណ្ដាលអោយមានគ្រោះថ្នាក់ចរាចរណ៍កើតឡើង៕
ដោយ៖ ស្អាងជ័យ
