សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ រដ្ឋាភិបាលឥណ្ឌូនេស៊ី បន្ទាប់ពីមេីលឃេីញប្រទេសឥណ្ឌា ដែលកំពុងតស៊ូនឹងការផ្ទុះជំងឺឆ្លងកូវីដ-១៩ នៅរលកទី២ដ៏អាក្រក់បំផុត បានសម្រេចបញ្ជូនជំនួយម៉ាស៊ីនបន្សុទ្ធខ្យល់អុកស៊ីសែនចំនួន២០០ទៅកាន់ប្រទេសមួយនេះ។
ជាក់ស្ដែងបេីតាមការលេីកឡេីងរបស់រដ្ឋមន្ត្រីការបរទេសឥណ្ឌូនេស៊ី លោកស្រី រ៉េតណូ ម៉ារស៊ូឌី បាននិយាយថា ជំនួយមនុស្សធម៌នេះជាការបង្ហាញសាមគ្គីភាពរបស់ឥណ្ឌូនេស៊ីជាមួយឥណ្ឌា ដែលជាមិត្តយូរលង់ដ៏ជិតស្និទ្ធនិងជាដៃគូយុទ្ធសាស្ត្រ នៅក្នុងការប្រយុទ្ធប្រឆាំងនឹងកូវីដ១៩។
បន្ថែមពីនេះ លោកស្រី រ៉េតណូ ម៉ារស៊ូឌី ក៏បានកត់សំគាល់ថា ពេញរយៈពេលផ្ទុះជំងឺឆ្លងនេះ ឥណ្ឌាបានផ្តល់គ្រឿងផ្គត់ផ្គង់វេជ្ជសាស្ត្រចាំបាច់ខ្លាំងដល់ឥណ្ឌូនេស៊ី និងគាំទ្រការស្វែងរកវ៉ាក់សាំងក្រោមគំរោងពហុភាគី Covax។
សូមជម្រាបថា ក្រោមគំរោងពហុភាគី Covax ឥណ្ឌូនេស៊ី បានទទួលវ៉ាក់សាំងកូវីដ-១៩ ចំនួន៦,៤១លានដូស របស់ក្រុមAstraZeneca ដែលផលិតនៅប្រទេសឥណ្ឌាផងដែរ។
គួរបញ្ជាក់ថា កាលពីថ្ងៃពុធទី១២ ខែឧសភាម្សិលមិញនេះ ឥណ្ឌា បានរាយការណ៍ថា រកឃើញករណីឆ្លងកូវីដ-១៩ថ្មី ចំនួន ៣៤៨.៤២១នាក់ និងអ្នកជំងឺកូវីដចំនួន៤.២០៥នាក់ទៀតបានស្លាប់។ខណៈចំនួននេះធ្វើឲ្យឥណ្ឌា មានអ្នកឆ្លងជំងឺសរុបឡើងដល់ជាង២៣លាននាក់ និងអ្នកជំងឺស្លាប់ ជាង២៥០.០០០នាក់៕ដោយ៖ស តារា
