សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ប្រហែលជាងោកមួយភាំងហើយបានជាបើករថយន្តកូរ៉េដឹកទឹកកករេចង្កូតជ្រុលទៅបុករុឺម៉កដែលគេចតចោលនៅអែបចិញ្ចើមផ្លូវនិងជ្រុលទៅបុករះសំយាបផ្ទះប្រជាពលរដ្ឋរងការខូចខាត តែសំណាងល្អដែរដែលមិនមានគ្រោះថ្នាក់ដល់មនុស្ស។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១និង២០នាទីរំលងអធ្រាត្រ ឈានចូលថ្ងៃទី១៧ ខែឧសភា ឆ្នាំ២០២១ ស្ថិតនៅតាមបណ្តោយផ្លូវលេខ៣៦៩ ក្នុងភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
ប្រភពព័ត៌មានពីអ្នកបើករថយន្តបង្កហេតុបានឱ្យដឹងថា នៅមុនពេលកើតហេតុខ្លួនបានចេញពីផ្ទះដើម្បីបើករថយន្តដឹកទឹកកកយកទៅដាក់ឲ្យម៉ូយ ខណៈខ្លួនកំពុងតែបើកមកដល់ចំណុចកើតហេតុស្រាប់តែងោកមួយភាំងទើបធ្វើឱ្យរេចង្កូតទប់អត់ជាប់ជ្រុលទៅបុករុឺម៉កចតចោលនៅអែបចិញ្ចើមផ្លូវ រួចបន្តទៅបុករះសំយាបផ្ទះប្រជាពលរដ្ឋរងការខូចខាត ចំណែកឯរថយន្តវិញបានរងការខូចខាតផ្នែកខាងមុខស្ទើរតែទាំងស្រុង។ បន្ទាប់ពីកើតហេតុសមត្ថកិច្ចមូលដ្ឋានសហការជាមួយនឹងខាងជំនាញចរាចរណ៍ខណ្ឌច្បារអំពៅបានចុះមកដល់ហើយបានឲ្យភាគីទាំងពីរចរចាគ្នា ដោយភាគីម្ចាស់រថយន្តបង្កព្រមសងជាសំណងក្នុងការជួសជុលទៅលើរុឺម៉កនិងសំយាបផ្ទះប្រជាពលរដ្ឋបញ្ចប់រឿងនៅកន្លែងកើតហេតុតែម្តង៕
ដោយ៖ ជ្រោយពេជ្រ
