សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ បេីយោងតាមការរិះគន់របស់ប្រជាពលរដ្ឋរស់នៅក្នុងមូលដ្ឋានក្រុងបាត់ដំបង បាននិយាយថា បច្ចុប្បន្ននេះយេីងសង្កេតឃើញថា កំណាត់ផ្លូវនៅក្នុងខេត្តជាច្រើនខ្សែបានរងការខូចខាតយ៉ាងដំណំ ក្នុងសភាពលិចលង់នៅក្នុងទឹក គ្មានអ្នកជួយសង្គ្រោះឡើយ រហូតដល់សព្វថ្ងៃនេះស្ទើរក្លាយជាបឹងនៅចំកណ្ដាលថ្នល់ទៅហើយ។ ប៉ុន្តែកំណាត់ផ្លូវខ្លះ ក៏បានធ្វើការជួសជុលឡើងវិញផងដែរ។
បេីតាមរូបភាពជាច្រេីនសន្លឹករបស់ប្រជាពលរដ្ឋ បានបញ្ជាក់ថា ជាក់ស្ដែងកំណាត់ផ្លូវមួយខ្សែនៅខាងក្រោយជាប់នឹងផ្សារទំនើប«បុរីថ្មី» ស្ថិតចំកណ្ដាលបេះដូងក្រុងបាត់ដំបងតែម្ដង ដែលត្រាំត្រែងក្នុងទឹកខួបប្រាំងខួបវស្សា គ្មានមន្ត្រីណាមើលឃើញឡើយ។
ប្រជាពលរដ្ឋដែលរស់នៅតំបន់នោះ បាននិយាយថា កំណាត់ផ្លូវមួយខ្សែដែលជាប់នឹងផ្សារទំនើប «បុរីថ្មី» ប៉ែកខាងក្រោយ បានរងការខូចខាតច្រើនឆ្នាំកន្លងមកហើយ និងធ្ងន់ធ្ងរបំផុតនៅឆ្នាំទៅម៉ិញដោយសារជំនន់ទឹកភ្លៀង។ ពលរដ្ឋ បន្តថា កំណាត់ផ្លូវនេះ ចូលទៅកាន់ផ្សារទំនើប ដែលដំបូងក្រាលកៅស៊ូ តែបានរងការខូចខាតទៅវិញច្រើនឆ្នាំហើយគ្មានការជួសជុលទេ រក្សាទុករហូតដល់សព្វថ្ងៃនេះស្ទើរក្លាយជាបឹងទៅហើយ ពេលភ្លៀងម្ដងៗទឹកលិចធ្វើដំណើរមិនកើតឡើយ។
ដោយឡែកជុំវិញបញ្ហានេះដែរ លោក ព្រូញ រិទ្ធថា ប្រធានមន្ទីរសាធារណៈការ និងដឹកជញ្ជូនខេត្តបាត់ដំបង បានថ្លែងថា កំណាត់ផ្លូវដែលខូចខាតខាងលើនេះ ជាបន្ទុករបស់ម្ចាស់ផ្សារទំនើប«បុរីថ្មី» និង ក្រោមគម្រោងវិនិយោគរបស់ខេត្ត បើខាងខេត្តមានកញ្ចប់ថវិកាអាចធ្វើបាន។
បន្ថែមពីនេះ លោក ព្រូញ រិទ្ធថា បានបញ្ជាក់ត្រង់ចំណុចនេះយ៉ាងដូច្នេះថា «បច្ចុប្បន្ន រាល់ផ្លូវនានានៅក្នុងខេត្ត ត្រូវបានក្រសួងទម្លាក់ទៅឲ្យថ្នាក់ក្រោមជាតិ ជាអ្នកទទូលខុសត្រូវ មិននៅក្រោមគម្រោងរបស់ថ្នាក់ជាតិទៀតទេ»។ ពោលគឺកំណាត់ផ្លូវនានានៅក្នុងខេត្ត ដែលកំពុងរងការខូចខាត មិនស្ថិតនៅក្នុងគម្រោងថែទាំរបស់មន្ទីរសាធារណៈការនិងដឹកជញ្ជូនខេត្តទៀតទេ គឺ នៅក្រោមដែនសមត្ថកិច្ចរបស់ខេត្ត។
ចំណែកម្ចាស់ផ្សារទំនើបបុរីថ្មី ឬ អ្នកទទូលខុសត្រូវផ្សារនេះ នៅព្រឹកថ្ងៃទី២០ ឧសភា ឆ្នាំ២០២១នេះដែរ អង្គភាពយេីង មិនអាចទំនាក់ទំនងបាននៅឡើយទេ។
បើតាមមន្ត្រីម្នាក់ ពាក់ព័ន្ធនឹងករណីខាងលេីនេះ បានលួចបង្ហេីបប្រាប់ថា គម្រោងជួសជុលផ្លូវនៅម្ដុំផ្សារទំនើប«បុរីថ្មី»ខាងលើនេះ ហាក់មានការរារែកចែកមិនដាច់ស្រេច រវាងគម្រោងវិនិយោគរដ្ឋបាល ជាមួយនឹងថៅកែផ្សារ។ ខាងខេត្តចង់ទុកឲ្យខាងផ្សារធ្វើ រីឯខាងផ្សារចង់ឲ្យមានការចូលរួមចំណែកពីខាងខេត្ត (រុញដាក់គ្នា)។ មន្ត្រីដដែលបានបញ្ជាក់ថា ដោយសារតែប្រចាំគ្នាទៅវិញ ទៅមកដូច្នេះហើយ ទើបកំណាត់ផ្លូវនៅម្ដុំក្រោយផ្សារទំនើបបុរីថ្មី ពេលនេះមានស្ថានភាពដូចផ្លូវទៅកាន់ឋាននរក។ ពេលចូលដល់រដូវវស្សាដូចសព្វថ្ងៃនេះ មើលទៅដូចបឹងនៅចំកណ្ដាលថ្នល់ដែលលំបាកធ្វើដំណើរបំផុត។ តើឆ្នាំណាទើប អាជ្ញាធរឬថៅកែផ្សារទំនើបនេះ បើកភ្នែកមើលឃើញបឹងនៅចំកណ្ដាលផ្លូវនេះ ?
គួបញ្ជាក់ថា យ៉ាងណាមិញ ថ្វីបើកំណាត់ផ្លូវមួយចំនួននៅក្នុងខេត្ត ដែលរងការខូចខាតដោយសារជំនន់ទឹកភ្លៀងកាលពីឆ្នាំទៅក៏ពិតមែន ត្រូវបានអាជ្ញាធរជួសជុលរួចរាល់ភាគច្រើនក្ដី តែនៅតែមានកំណាត់ផ្លូវមួយចំនួនទៀត កំពុងរងការខូចខាតនៅឡើយ ដែលអាជ្ញាធរហាក់ធ្វើមិនដឹងមិនឮ ដោយមិនខ្វល់ខ្វាយក្នុងការជួសជុលផ្លូវនេះឡេីយ ។
លេីសពីនេះទៅទៀត ប្រធានសាធារណៈការនិងដឹកជញ្ជូនខេត្ត លោក ព្រូញ រិទ្ធថា បានថ្លែងបន្តទៀតថា បើទោះជាកំណាត់ផ្លូវដែលរងការខូចខាតមួយចំនួន ស្ថិតនៅថ្នាក់ក្រោមជាតិ ឬ ក្រោមដែនសមត្ថកិច្ចខេត្ត ជាអ្នកទទូលថែទាំក្ដី ប៉ុន្តែកន្លងមក ខាងមន្ទីររបស់លោក បានចុះជួយជួសជុលបិតជង្ហុក សម្បុកមាន់បានច្រើនកន្លែង ច្រើនកំណាត់ដែរផ្លូវដែរ ដើម្បីជួយសម្រូលដល់ការធ្វើដំណើររបស់ប្រជាពលរដ្ឋ៕ដោយ៖សហការី
