សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមទីភ្នាក់ងារព័ត៌មាន Reuters នៅថ្ងៃព្រហស្បតិ៍ ទី២៧ ខែឧសភា ឆ្នាំ២០២១នេះ បានដកស្រង់ពីរបាយការណ៍ប៉ូលិសអាមេរិក បានបញ្ជាក់ថា មានករណីខ្មាន់កាំភ្លើងម្នាក់ បានធ្វេីការវាយប្រហារបាញ់សម្លាប់មិត្តរួមការងាររបស់ខ្លួន៨នាក់ ហើយបាញ់សម្លាប់ខ្លួនឯងតាមក្រោយនៅឯកន្លែងជួសជុល និងចតរថភ្លើងមួយកន្លែងក្នុងទីក្រុងសាន់ ហូសេ (San Jose) រដ្ឋកាលីហ្វ័រនីញ៉ានៅថ្ងៃពុធសប្ដាហ៍នេះ (ម៉ោងនៅអាមេរិក)។
បើតាមប្រព័ន្ធផ្សព្វផ្សាយនៅក្នុងតំបន់ គឺសារព័ត៌មាន San Jose Mercury News ខ្មាន់កាំភ្លើងខាងលើត្រូវបានគេស្គាល់ឈ្មោះ សាំម្ញូអែល ខាសស៊ីឌី (Samuel Cassidy) មានអាយុ៥៧ឆ្នាំ និងជាបុគ្គលិកថែទាំរថភ្លើងនៅឯស្ថានីយ Santa Clara Valley Transportation Authority (VTA)។
យ៉ាងណាមិញ ភ្លាមៗប៉ូលិសអាមេរិក មិនទាន់អាចបញ្ជាក់ពីមូលហេតុ ឬចេតនានៅពីក្រោយការបាញ់ប្រហារនេះទេ ហើយក៏មិនបានបញ្ជាក់ពីអត្តសញ្ញាណខ្មាន់កាំភ្លើងនោះដែរ។ដោយឡែកបើយោងតាមអង្គការ Gun Violence Archive បានបញ្ជាក់ថា ករណីបាញ់សម្លាប់រង្គាលមនុស្សនៅទូទាំងសហរដ្ឋអាមេរិក រហូតមកដល់ពេលនេះបានកើតឡើង ២៣០លើកមកហើយនៅក្នុងឆ្នាំ២០២១នេះ។ ចំពោះការបាញ់សម្លាប់រង្គាលមនុស្សកន្លងទៅ គឺសំដៅទៅលើករណីបាញ់ប្រហារដែលបណ្ដាលឱ្យមនុស្សភាគច្រេីនស្លាប់ចាប់ពី៤នាក់ឡើងទៅផងដែរ៕
ដោយ៖ស តារា
