សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ មន្ត្រីសុខាភិបាលខេត្តកណ្ដាល បានបញ្ជាក់ថា ទណ្ឌិត និងមន្ត្រីពន្ធនាគារខេត្តកណ្ដាល ត្រូវបានរកឃើញឆ្លងជំងឺកូវីដ-១៩ កើនឡើងចំនួន ៣៦៩នាក់ហើយ នេះបើគិតត្រឹមព្រឹកថ្ងៃទី៣១ ខែឧសភា ឆ្នាំ២០២១នេះ។
មន្ត្រីសុខាភិបាលខេត្ត បញ្ជាក់បន្ថែមថា ករណីឆ្លងនេះបានកើតឡើងតាំងពីថ្ងៃទី២៥ ខែឧសភា ដោយដំបូងរកឃើញទណ្ឌិតចំនួន ១០៣នាក់ និងមន្ត្រីពន្ធនាគារ៣នាក់ ហើយឆ្លងជាបន្តបន្ទាប់ ថោយគិតមកដល់ថ្ងៃនេះ ចំនួនអ្នកឆ្លងកើនឡើង ៣៦៩នាក់ហើយ។
ប្រភពដដែល បន្តថា គេពុំទាន់ស៊ើបដឹងច្បាស់ថា តើពួកគេឆ្លងជំងឺនេះតាមរយ:ណានោះទេ រីឯអ្នកជំងឺត្រូវបានក្រុមគ្រូពេទ្យនៃមន្ទីរសុខាភិបាលខេត្តកណ្ដាល បានថែទាំយកចិត្តទុកដាក់ ផ្ដល់ថ្នាំសង្កូវដល់ក្នុងពន្ធនាគារតែម្ដង ដើម្បីការពារមិនឱ្យពួកគាត់ចេញទៅព្យាបាលនៅខាងក្រៅឡើយ។ រីឯមន្ត្រីនគរបាលវិញ ក៏ត្រូវបានដាក់ពង្រាយយាមកាមជុំវិញពន្ធនាគារផងដែរ។
ក្រោយរកឃើញថាមានវិជ្ជមានភ្លាម មន្ត្រីពន្ធនាគារបានខ្នះខ្នែងរៀបចំការបែងចែកទីតាំងសម្រាប់ព្យាបាល មិងរៀបចំការពារទណ្ឌិតផ្សេងទៀតមិនឱ្យមានការឆ្លងបន្តទៀតនោះទេ ពោលគឺអនុវត្តន៍តាមការណែនាំរបស់ក្រសួងសុខាភិបាល ក្នុងន័យបញ្ចៀសការឆ្លងដល់ទណ្ឌិតដទៃទៀត។ ប៉ុន្តែចំនួនអ្នកឆ្លងចេះតែកើនឡើងឥតឈប់ឈរគួរជាទីបារម្ភបំផុត។
គួរជម្រាបថា ចាប់តាំងពីកើតមានព្រឹត្តិការណ៍ «សហគមន៍ ២០កុម្ភៈ» មកលោក គង់ សោភ័ណ្ឌ អភិបាលខេត្តកណ្ដាល រួមទាំងមន្ត្រីសុខាភិបាល និងមន្ត្រីពាក់ព័ន្ធខេត្តកណ្ដាលទាំងអស់ មានការស្វាហាប់ ពុះពារឧបសគ្គ ធ្វើការទាំងយប់ទាំងថ្ងៃមិនខ្លាចនឿយហត់ ជួនកាលដាច់យប់ក៏មាន ក្នុងការគ្រប់គ្រង និងទប់ស្កាត់ការរីករាលដាលជំងឺកូវីដ-១៩នេះ នៅមូលដ្ឋានខេត្តកណ្ដាលបានយ៉ាងល្អប្រសើរ ។
គួរបញ្ជាក់ថា សម្រាប់អ្នកដែលពាក់ព័ន្ធជាមួយនឹងព្រឹត្តិការណ៍ «សហគមន៍ ២០កុម្ភៈ» ដែលមានចំនួន ជាង៤ម៉ឺននាក់ ក៏ទទួលបានអំណោយលោកគង់ សោភ័ណ្ឌ និងពីលោកបណ្ឌិត ម៉ៅ ភិរុណ ប្រធានក្រុមប្រឹក្សាខេត្តកណ្ដាលផងដែរ៕ដោយ៖សហការី
