សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមទីភ្នាក់ងារសារព័ត៌មាន Viet Nam News នៅយប់ថ្ងៃអាទិត្យ ទី០៦ ខែមិថុនា ឆ្នាំ២០២១ បានដកស្រង់ចេញផ្សាយពីក្រសួងសុខាភិបាលប្រទេសវៀតណាម បានប្រកាសថា៖ បន្តរកឃើញករណីឆ្លងថ្មីៗ នៃជំងឺកូវីដ-១៩ ចំនួន ២០៦ករណីបន្ថែមទៀតនៅថ្ងៃអាទិត្យនេះដែរ។ អាជ្ញាធរសុខាភិបាល បន្តថា ក្នុងនោះ ២០១នាក់ ជាករណីឆ្លងក្នុងសហគមន៍ និង០៥នាក់ជាករណីនាំចូល។
ក្រសួងសុខាភិបាលវៀតណាម បានគូសបញ្ជាក់បន្ថែមថា៖ ក្នុងចំណោមករណីឆ្លងសហគមន៍ថ្មីៗខាងលើ មាន១២១ករណី ត្រូវបានរកឃើញនៅខេត្ត Bac Giang ដែលជាចំណុចកណ្តាល នៃការឆ្លងរាលដាលជំងឺកូវីដ១៩ នាពេលបច្ចុប្បន្ន, ៤០ករណីនៅខេត្ត Bac Ninh, ៣១ករណីនៅទីក្រុងហូជីមិញ ហើយក្រៅពីនោះ នៅតាមខេត្តមួយចំនួនផ្សេងទៀត។
សូមជម្រាបថា ប្រទេសវៀតណាម បានរងការវាយប្រហារពីកូវីដ-១៩ នៅរលកថ្មីកាលពី៥សប្តាហ៍មុន ហើយចាប់តាំងពីពេលនោះមកប្រទេសនេះមានការឆ្លងក្នុងសហគមន៍ចំនួន៥.៦២២នាក់នៅ៣៩ខេត្តក្រុង រួមមាន៖ ទីក្រុងធំៗ មជ្ឈមណ្ឌលឧស្សាហកម្ម និងទីតាំងដែលជាជម្រកក្រុមហ៊ុនបរទេសធំៗ។
ដោយឡែកខេត្តបាក់យ៉ាង និងបាក់និញភាគខាងជើង មានអ្នកឆ្លងច្រើនជាងគេ គឺចំនួន ៣.០៨៩នាក់ និង១.០៩៣នាក់រៀងៗខ្លួន បន្ទាប់មកក្រុងហូជីមិញ មានអ្នកឆ្លង៣៧៦នាក់។
គួរបញ្ជាក់ថា ប្រទេសវៀតណាម មានករណីឆ្លងកូវីដ-១៩ សរុបនៅទូទាំងប្រទេសកើនដល់ចំនួន ៨,៧៤៧នាក់ ក្នុងនោះស្លាប់ ៥៣នាក់ និងជាសះស្បើយ៣,៣៣៧នាក់៕ដោយ៖ស តារា
