ស្លាប់៣០នាក់ របួសជាង៥០នាក់ដោយគ្រោះថ្នាក់រថភ្លើងពីរគ្រឿងបុកគ្នានៅប៉ាគីស្ថាន

ចែករំលែក៖

នៅថ្ងៃទី ៧ខែមិថុនានេះរថភ្លើងពីរគ្រឿងបានបុកគ្នានៅក្នុងខេត្ត Sindh ភាគខាងត្បូងប្រទេសប៉ាគីស្ថាន បណ្តាលឲ្យមានអ្នកស្លាប់ជាង៣០នាក់និងរងរបួសជាង៥០នាក់។
លោក Ghotki Usman Abdullah មន្ត្រីក្នុងតំបន់បានឱ្យដឹងថា ក្រៅពីអ្នកស្លាប់និងរបួសក៏មានមនុស្សជាច្រើនជាប់គាំងនៅខាងក្នុងរថភ្លើងនៅឡើយដែរ។ ក្រុមជួយសង្គ្រោះបានព្យាយាមជួយអ្នកដែលជាប់នៅខាងក្នុងរថភ្លើង។
បើតាមអាជ្ញាធរប៉ាគីស្ថានបានឱ្យដឹងថា ហេតុការណ៍រថភ្លើងបុកគ្នានេះបានកើតមានឡើងនៅចំណុចផ្លូវដែកត្រង់ចន្លោះស្ថានីយរថភ្លើងរ៉ៃទី (Raiti) និង អូបារ៉ូ (Obaro) ស្ថិតនៅក្នុងស្រុក ហ្គោតគី (Ghotki) នៃខេត្ត Sindh រវាងរថភ្លើងរបស់ក្រុមហ៊ុនមីលឡេត អិចប្រេស (Millat Express) និងក្រុមហ៊ុន សឺ សាយីដ អិចប្រេស (Sir Syed Express)។ ការបុកគ្នាធ្វើឲ្យទូរថភ្លើងទាំងពីរខ្សែត្រូវរអិលធ្លាក់ចេញពីផ្លូវខ្ទេចខ្ទី និងខ្លះទៀតក្រឡាប់។
ក្រុមសង្គ្រោះកំពុងតែស្ថិតនៅកន្លែងកើតហេតុ ដើម្បីវេចខ្ចប់សាកសព និងបញ្ជូនអ្នករងរបួសទៅកាន់មន្ទីរពេទ្យ។ អាជ្ញាធរស្រុក Ghotki ក៏បានប្រកាសអាសន្ន ចំពោះជំងឺរាតត្បាតសកល COVID-19 ផងដែរនៅក្នុងតំបន់ដែលខ្លួនគ្រប់គ្រង ដើម្បីឲ្យមន្ទីរនានាបង្កើនការប្រុងប្រយ័ត្ន៕ដោយ៖ធីរីណា