សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ពិតជាគួរឱ្យកោតសរសើរចំពោះក្រុមគ្រូពេទ្យនៃមន្ទីរពេទ្យបង្អែកសាមគ្គីរំដួលដែលបានជួយសម្រាលកូនដល់ស្ត្រីម្នាក់ទៀតដែលមានជំងឺកូវីដ-១៩និងកំពុងព្យាបាលជំងឺទទួលបានជោគជ័យដ៏ត្រចះត្រចង់។
យោងតាមអាក់ខោនហ្វេសប៊ុករបស់មន្ទីរពេទ្យបង្អែកសាមគ្គីរំដួលបានបង្ហោះកាលពីវេលាម៉ោង១០និង៥៥នាទីយប់ថ្ងៃទី៨ខែមិថុនាឆ្នាំ២០២១នេះថា សូមអបអរសាទរអ្នកជំងឺវិជ្ជមានមេរោគកូវីដ-១៩ ឈ្មោះ នង ដារ៉ា ភេទស្រី អាយុ៣៩ឆ្នាំ ដែលមានផ្ទៃពោះគ្រប់ខែ(៣៩សប្តាហ៍) ហើយឈឺពោះសម្រាលកូនត្រូវបានក្រុមគ្រូពេទ្យនៃមន្ទីរពេទ្យបង្អែកសាមគ្គីរំដួលយកចិត្តទុកដាក់ខិតខំប្រឹងប្រែងជួយសម្រាលបានកូនស្រីម្នាក់ប្រកបដោយជោគជ័យ។
ដោយក្រុមគ្រូពេទ្យបានជួយសម្រាលបានកូនស្រីម្នាក់មានទម្ងន់២គីឡូ៩៥០ក្រាម ខណ:ស្ថានភាពក្រោយសម្រាល ម្តាយ និងកូនមានសុខភាពល្អ ហើយកំពុងបន្តតាមដានយ៉ាងយកចិត្តទុកដាក់ពីក្រុមគ្រូពេទ្យដោយស្រ្តីខាងលើមានទីលំនៅក្នុង ភូមិវាល ឃុំម៉ឺនជ័យ ស្រុករំដួល ខេត្តស្វាយរៀង។
ក្រុមគ្រូពេទ្យនៃមន្ទីរពេទ្យបង្អែកសាមគ្គីរំដួលសូមអំពាវនាវដល់បងប្អូនប្រជាពលរដ្ឋមេត្តាប្រកាន់ខ្ជាប់នូវវិធានការ ៣កុំ និង៣ការពារទាំងអស់គ្នា។
ក្នុងឱកាសនោះស្ត្រីដែលទើបសម្រាលបានកូនស្រីបានអរគុណដល់ក្រុមគ្រូពេទ្យនៃមន្ទីរពេទ្យបង្អែកសាមគ្គីរំដួលដែលបានខិតខំអស់ពីកម្លាំងកាយ ចិត្ត និងស្មារតីជួយសង្គ្រោះដល់រូបនាងនិងកូន និងសូមគោរពជូនពរក្រុមការងារទាំងអស់មានសុខភាពល្អបរិបូរណ៍ ជោគជ័យថ្មីៗបន្ថែមទៀតក្ក្នុងការងារ៕
ដោយ៖ យឹម សុថាន
