សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ នៅរសៀលថ្ងៃទី១០ខែមិថុនាឆ្នាំ២០២១នេះ លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀងបានឱ្យដឹងថាលោកមានការព្រួយបារម្ភជាខ្លាំងដោយក្នុងខេត្តស្វាយរៀងស្ថានភាពជំងឺកូវីដ-១៩ នៅតែមានការចម្លងចូលក្នុងសហគមន៍បន្ទាប់ពី កម្មករ កម្មការិនីរោងចក្រធ្វើតេស្តមានវិជ្ជមានមេរោគកូវីដ-១៩ ។
លោកបានបន្ថែមថា ជំងឺកូវីដ-១៩ នៅសហគមន៍ និងរោងចក្រសហគ្រាស មិនទាន់បានថមថយនៅឡើយទេដោយសារមានកត្តា៤យ៉ាងគឺ៖
ទី១-ក្រុមកម្មករមិនព្រមយកសំណាកនៅតាមរោងចក្រ និងមិនព្រមធ្វេីចត្តាឡីស័កនៅក្នុងរោងចក្រ គាត់ទៅផ្ទះចម្លងជំងឺកូវីដ-១៩ចូលក្នុងសហគមន៍ ។
ទី២-គម្លាតក្នុងពេលធ្វើដំណើររបស់បងប្អូនកម្មករទៅបម្រើការងាររោងចក្រសហគ្រាស មានការប្រមូលផ្ដុំជិះរថយន្តរួមគ្នាច្រើន ។
ទី៣-ពលករដែលធ្វើចំណាកស្រុកត្រឡប់មកពីប្រទេសថៃភាគច្រើនមានជំងឺកូវីដ-១៩ មកជាមួយ ។
ទី៤-ការមិនគោរពតាមវិធានការណែនាំរបស់ក្រសួងសុខាភិបាល និងវិធានការ ៣កុំ ៣ការពារ របស់សម្តេចតេជោ ហ៊ុន សែន ផងដែរ។
លោកបានបន្ថែមថា ឥទ្ធិពលនៃការរីករាលដាលជំងឺកូវីដ-១៩ នៅខេត្តស្វាយរៀងក្នុងពេលបច្ចុប្បន្នបាននិងកំពុងតែចម្លងចូលក្នុងសហគមន៍និងរោងចក្រមួយចំនួន ខណៈដែលអ្នកជំងឺមានជាង៤០០នាក់កំពុងតែសម្រាកព្យាបាល ។
លោកវេជ្ជបណ្ឌិតកែរ រដ្ឋាបានបញ្ជាក់ទៀតថា នៅក្នុងព្រឹតិ្តការណ៍សហគមន៍ ២០កុម្ភៈ ខេត្តស្វាយរៀងមានប្រជាពលរដ្ឋខ្មែរ និងជនបរទេសគិតត្រឹមថ្ងៃទី៨ ខែមិថុនាឆ្នាំ២០២១បានឆ្លងជំងឺកូវីដ-១៩ មានចំនួន១.១៧៤នាក់ ស្រីចំនួន ៦៧៦នាក់ ស្លាប់ចំនួន៧នាក់ និងមានការព្យាបាលជាសះស្បើយចំនួន៧៣៦នាក់ ស្រី៤១០នាក់ ហើយកំពុងធ្វើការព្យាបាលចំនួន៤៣០នាក់ ស្រី ២៦៤នាក់ ។
លោកបានបន្ថែមថា បើបងប្អូនដែលពាក់ព័ន្ធទាំងផ្ទាល់ និងប្រយោលជាមួយអ្នកមានជំងឺកូវីដ-១៩ សូមធ្វើចត្តាឡីស័កតាមដានសុខភាព អនុវត្តតាមវិធានការណែនាំរបស់ក្រសួងសុខាភិបាល និងវិធានការ ៣ការពារ ៣កុំ របស់សម្ដេចតេជោហ៊ុន សែន។
ប្រសិនបើមានរោគសញ្ញាដូចជា៖ គ្រុនក្ដៅ, ក្អក, កណ្ដាស់, ឈឺបំពង់ក ឬដកដង្ហើមខ្លីៗ ឬ សង្ស័យ សូមមេត្តាប្រញាប់ ទៅធ្វេីតេស្តរកមេរោគកូវីដ-១៩ ដែលមានទីតាំងនៅជិតផ្ទះ ឬផ្ដល់ព័ត៌មានទៅអាជ្ញាធរមូលដ្ឋាន ឬទៅយកវត្ថុវិភាគសំណាកនៅប៉ុស្ដិ៍យកសំណាកដែលនៅជិតផ្ទះ ឬទំនាក់ទំនងមកក្រុមការងារស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ-១៩ ខេត្ត📞044 712 522 ឬ 097 503 4567 ដើម្បីមានវិធានការបន្ត ។
សម្រាប់អ្នកដែលគ្មានរោគសញ្ញា សូមដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងនោះ៕
ដោយ៖ យឹម សុថាន
