សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់សង្ស័យស្រវឹងស្រាបានជិះម៉ូតូក្នុងល្បឿនលឿនជ្រុលទៅបុកម៉ូតូមួយគ្រឿងទៀតដែលកំពុងបើកឆ្លងផ្លូវបណ្ដាលឲ្យរងការខូចខាតយ៉ាងដំណំ ចំណែកម្ចាស់ម៉ូតូរងរបួសស្រាល។
ហេតុការណ៍គ្រោះថ្នាក់ចរាចរណ៍នេះបង្កការភ្ញាក់ផ្អើលនៅវេលាម៉ោង៦និង៥០នាទីល្ងាច ថ្ងៃទី១០ ខែមិថុនា ឆ្នាំ២០២១ស្ថិតនៅតាមបណ្ដោយផ្លូវសហព័ន្ធរុស្ស៊ី ត្រង់ចំណុចភ្លើងស្តុបវត្តនាគវ័ន ក្នុងសង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញបុរសម្នាក់ជិះម៉ូតូមួយគ្រឿងម៉ាកM D ពណ៌ស ពាក់ស្លាកលេខភ្នំពេញ 1HA-3167 តាមបណ្ដោយផ្លូវសហព័ន្ធរុស្ស៊ីក្នុងទិសដៅពីលិចទៅកើត ខណៈមកដល់ភ្លើងស្តុបវត្តនាគវ័នក៏បានបត់ឆ្វេងឆ្លងផ្លូវស្របពេលមានម៉ូតូមួយគ្រឿងម៉ាកហុងដាឌ្រីម សេ125 ពណ៌ខ្មៅពាក់ស្លាកលេខ 1HH-6047 បើកដោយបុរសម្នាក់សង្ស័យស្រវឹងស្រាក្នុងទិសដៅពីកើតទៅលិចក្នុងល្បឿនលឿនធ្វើឱ្យម៉ូតូទាំងពីរគ្រឿងបុកគ្នាពេញទំហឹងបណ្ដាលឲ្យដួលរងការខូចខាតម៉ូតូយ៉ាងដំណំ ចំណែកឯម្ចាស់ម៉ូតូរងរបួសស្រាល។
ក្រោយកើតហេតុសមត្ថកិច្ចមូលដ្ឋានបានមកដល់រួចបានឲ្យភាគីទាំងសងខាងធ្វើការសម្របសម្រួលគ្នា ដោយភាគីខាងម៉ូតូMD យល់ព្រមសងការខូចខាតចំនួន៤០ដុល្លារទៅភាគីខាងម៉ូតូហុងដាឌ្រីមដើម្បីបញ្ចប់រឿងនៅកន្លែងកើតហេតុ៕
ដោយ៖ និន សុភ័ស្ត
