ឃាត់ខ្លួនជនសង្ស័យ ៦នាក់និងថ្នាំញៀន ប្រភេទយ៉ាម៉ា និងម៉ាទឹកកកមួយចំនួនធំ

ខេត្តប៉ៃលិន៖  ក្រោមការដឹកនាំ និងចង្អុលបង្ហាញពីឧត្តម​សេនីយ៍ទោ សេង សុគន្ធ ស្នងការនគរបាលខេត្តប៉ៃលិន នៅថ្ងៃទី១៥ ខែមិថុនា ឆ្នាំ២០២១ ម្សិលមិញនេះ លោកវរសេនីយ៍ឯក យ៉ែម សារិទ្ធ អធិការនគរបាលក្រុងប៉ៃលិន ដឹកនាំកម្លាំងផែនប្រឆាំងគ្រឿង​ញៀននៃអធិការដ្ឋាននគរបាលក្រុងប៉ៃលិន សហ​ការជាមួយកម្លាំងអធិការដ្ឋាននគរបាលស្រុករតនមណ្ឌល ខេត្តបាត់ដំបង បានចុះបង្ក្រាបករណីជួញដូរ រក្សាទុក និងប្រើប្រាស់ដោយខុសច្បាប់នូវសារ​ធាតុញៀនមួយករណី នៅចំណុចទល់មុខរោងចក្រចិន ស្ថិតក្នុងភូមិតាគ្រក់ ឃុំត្រែង ស្រុករតនមណ្ឌល ខេត្តបាត់ដំបង។ ក្នុងប្រតិបត្តិការនេះសមត្ថកិច្ចជំនាញបានឃាត់ខ្លួនជនសង្ស័យចំនួន៦នាក់ក្នុងនោះមានស្រី៣នាក់ ​និងដកហូតវត្ថុតាងសរុបរួមមាន ៖

១/-ម្សៅក្រាមពណ៌សថ្លា(សង្ស័យម៉ាទឹកកក)​ចំនួន២៧កញ្ចប់(ក្នុងនោះធំ១៣កញ្ចប់)

២/-ថ្នាំញៀនប្រភេទWYពណ៌ក្រហមចំនួន៣៣៩គ្រាប់

៣/-ជញ្ជីងថ្លឹងថ្នាំញៀនចំនួន០២គ្រឿង

៤/-ទូរស័ព្ទដៃចំនួន០៧គ្រឿង

៥/-ថង់ប្លាស្ទិចចំនួន០២ដុំ

៦/-ដែកកេះចំនួន០៥ដើម

៧/-ដបសម្រាប់ជក់គ្រឿងញៀនចំនួន០១

៨/-កាំភ្លើងច្នៃចំនួន០២ដើម ។

ក្រោយឃាត់ខ្លួនជនសង្ស័យរួមទាំងវត្ថុតាងទាំងអស់ត្រូវបានឃាត់ខ្លួននៅអធិការដ្ឋាននគរបាលក្រុងប៉ៃលិន ដើម្បីកសាងសំណុំរឿងតាមនីតិវិធី ៕

ដោយ ៖ ប្រាថ្នា