🔴ខ្លាំងមែន! មេការកាងឆ្នោតវៀតណាមយីហោ K9 ឈ្មោះឆាយ កំពុងដើរគំរាមអ្នកកត់ឆ្នោតខុសច្បាប់ដូចគ្នា នៅក្នុងខេត្តកំពត(មានវីដេអូ)

ចែករំលែក៖

ភ្នំពេញ៖ យោងតាមសេចក្ដីរាយការណ៍ពីប្រជាពលរដ្ឋដែលរស់នៅខេត្តកំពត នៅព្រឹកថ្ងៃសៅរ៍ទី២៦ ខែមិថុនា ឆ្នាំ២០២១នេះ បានឲ្យដឹងថា , រយៈពេលប៉ុន្មានថ្ងៃមកនេះមានមនុស្សមួយក្រុមដឹកនាំដោយឈ្មោះឆាយ ជាមេការកាងឆ្នោតវៀតណាមយីហោ K9 ដែលជារហ័សនាម គឺតំណាងឲ្យលោកឧកញ៉ា លឹម ប៊ុណ្ណា ហៅខ្នា បានដើរគំរាមកូនកញ្ច្រែងអ្នកកត់ឆ្នោតខុសច្បាប់ដូចគ្នានៅទូទាំងខេត្តកំពត យ៉ាងដាច់ខាតថា គឺត្រូវតែកត់ឆ្នោតវៀតណាមដាក់ស្លាក K9 ប្រសិនបើកូនកញ្ច្រែងអ្នកកត់ឆ្នោតខុសច្បាប់ដូចគ្នានោះ មិនព្រមកត់ឲ្យពួកគេនោះទេ ឈ្មោះឆាយ និងបញ្ជាឲ្យសមត្ថកិច្ចពាក់ព័ន្ធធ្វើការបង្រ្កាបទីតាំងនេះភ្លាម។ ត្រង់នេះពិតទេ បើសមត្ថកិច្ចត្រូវតាមបញ្ជាគាត់មែន ហើយគ្មានភារៈកិច្ចជាមេកើយ លើសាមីអង្គភាពសមត្ថកិច្ចនោះ ?

ជាក់ស្ដែងទីតាំងកត់ឆ្នោតវៀតណាមយីហោ K9 ធំៗជាច្រេីនកន្លែងមានដូចជា៖ ស្ថិតនៅភូមិសុវណ្ណសាគរ សង្កាត់កំពង់បាយ, ភូមិកំពង់បាយខាងត្បូង សង្កាត់កំពង់បាយ ក្រុងកំពត ខេត្តកំពត និងភូមិត្រពាំងធំ សង្កាត់ជុំគ្រៀល ស្រុកទឹកឈូក ខេត្តកំពត, បច្ចុប្បន្នកំពុងបេីកយ៉ាងចំហយ៉ាងអាណាធិបតេយ្យ មិនមានសមត្ថកិច្ចមូលដ្ឋាន ឬថ្នាក់ខេត្តហ៊ានចុះបង្រ្កាបនោះទេ។

បេីតាមសេចក្ដីរាយការណ៍ដដែល បន្តថា ឈ្មោះឆាយ ដែលជាអ្នកកាងឆ្នោតវៀតណាមយីហោ«K9» បានប្រមូលគ្នាមកនិយាយបញ្ជុះបញ្ជូល លួងលោម គំរាមកូនកញ្ច្រែងតូចៗដែលជាអាជីវករកត់ឆ្នោតវៀតណាមដូចគ្នា នៅតាមតូបផ្សារ តាមផ្ទះ ក្នុងខេត្តកំពត ឲ្យមកកត់ឆ្នោតឲ្យក្រុមខ្លួនវិញ។ ហេីយបើកូនកញ្ច្រែងទាំងអស់នោះបដិសេធមិនកត់ឲ្យ ពួកគេបានគំរាមថា ខ្លួននិងឲ្យសមត្ថកិច្ចចុះចាប់ទីតាំងទាំងអស់នោះ។ មិនតែប៉ុណ្ណោះ ពួកគេអះអាងថា, ពួកគេមានអំណាចអាចបញ្ជាទៅលើមន្រ្តីមានសមត្ថកិច្ចក្នុងមូលដ្ឋាន ដូចជា៖ អាជ្ញាធរមានសមត្ថកិច្ច ,នាយប៉ុស្តិ៍នគរបាលរដ្ឋបាលទាំងអស់ក្នុងទីរួមខេត្ត ឲ្យមើលទីតាំងកត់ឆ្នោតណាមិនដាក់ផ្លាកពណ៍ក្រហមយីហោ K9 ប្រសិនបើកូនកញ្ច្រែងណាយល់ព្រមគឺមិនបង្រ្កាបនោះទេ ប៉ុន្តែបើអ្នកណាមិនព្រមកត់ឲ្យពួកខ្លួននោះទេ នឹងធ្វើការបង្រ្កាបតែម្តង។

ប្រជាពលរដ្ឋ បានសង្កត់ធ្ងន់ថា ហើយការកំណត់ថ្មីរបស់ក្រុមលោកឧកញ៉ា លឹម ប៊ុណ្ណា ហៅខ្នា នេះគឺថ្នាក់លើជាអ្នកកំណត់មក ចឹងហើយគឺត្រូវតែធ្វើតាមពួកគេប្រាប់ បើមិនអញ្ចឹងទេពួកគេនឹងឲ្យសមត្ថកិច្ចនៅតាមតំបន់ធ្វើការបង្រ្កាប។

ជុំវិញបញ្ហានេះដែរ ប្រជាពលរដ្ឋបាននាំគ្នាងាយឆ្ងល់ថា លោកឧត្តមសេនីយ៍ទោ ម៉ៅ ចន្ទមធុរិទ្ធ ស្នងការនគរបាលខេត្តកំពត គឺជាថ្នាក់ដឹកនាំមួយរូប ដែលប្រជាពលរដ្ឋស្រឡាញ់ និងកោតសរសេីរក្នុងការអនុវត្តច្បាប់បានល្អ រាល់ការបង្រ្កាបបទល្មើស នឹងមានចាត់វិធានការបែបណាចំពោះក្រុមអ្នកកាងឆ្នោតវៀតណាមយីហោ«K9» នេះ ខណៈដែលកូនចៅរបស់លោកឧកញ៉ា លីម ប៊ុណ្ណា ហៅខ្នា កំពុងបង្កការអុកឡុកយ៉ាងអនាធិបតេយ្យក្នុងខេត្តកំពត ។

ដោយឡែកជុំវិញករណីនេះដែរ លោកឧត្តមសេនីយ៍ទោ ម៉ៅ ចន្ទមធុរិទ្ធ ស្នងការនគរបាលខេត្តកំពត បានប្រាប់អង្គភាពកាសែតនគរវត្ត និងនគរដ្រេហ្គននៅរសៀលថ្ងៃសៅរ៍ទី២៦ ខែមិថុនា ឆ្នាំ២០២១នេះ តាមរយៈប្រព័ន្ធតេឡេក្រាមថា៖ ឱ្យតែកន្លែងណាដែលបើកអាជីវកម្មឆ្នោតខុសច្បាប់ ឬឆ្នោតយួន លោកត្រូវតែបង្ក្រាបទាំងអស់ ។

គួររម្លឹកថា កន្លងទៅលោកឧត្តមសេនីយ៍ទោ ម៉ៅ ចន្ទមធុរិទ្ធ ស្នងការនគរបាលខេត្តកំពត ក៏ធ្លាប់បានបញ្ជាក់ប្រាប់អង្គភាពយេីងតាមទូរស័ព្ទដរថា៖ ចំពោះករណីក្រុមអ្នកកាងឆ្នោតវៀតណាមយីហោ K9 ប្រសិនបេីមានវិញលោកនឹងបញ្ជាកម្លាំងឲ្យបង្រ្កាបភ្លាម។ លោកស្នងការ បន្ថែមថា មួយវិញទៀតចំពោះករណីរាល់ល្បែងស៊ីសងក្នុងមូលដ្ឋានខេត្ត របស់លោក គឺមិនថាតែការកត់កន្ទុយលេខ(ឆ្នោតវៀតណាមខុសច្បាប់) ត្រូវបង្រ្កាបទាំងអស់ សូម្បីតែល្បែងបញ្ជល់មាន់តាមប្រព័ន្ធអនឡាញ; តាមទូរទស្សន៍ (ហាងកាហ្វេ) ក៏មិនឲ្យមានដែរ។

ដោយឡែកនៅរសៀលថ្ងៃសៅរ៍នេះដែរ អង្គភាពយើងបានទំនាក់ទំនងតាមទូរស័ព្ទទៅសុំការបំភ្លឺពីលោកឧកញ៉ា លឹម ប៊ុណ្ណា ហៅ ខ្នា ជុំវិញករណីខាងលេីនេះ ប៉ុន្តែមិនអាចទំនាក់ទំនងបានទេ ព្រោះតេមិនចូល។

ចំពោះករណីខាងលើដែលប្រជាពលរដ្ឋចោទប្រកាន់ក្រុមអ្នកកាងឆ្នោតវៀតណាមដែលមានយីហោ«K9»នេះ អង្គភាពយើងរង់ចាំការបកស្រាយគ្រប់ពេលវេលា ។ រីឯពលរដ្ឋរងគ្រោះសូមសំណូមពរដល់អាជ្ញាធរ និងសមត្ថកិច្ចថ្នាក់លើមានវិធានតាមច្បាប់ចំពោះក្រុមនេះផង ព្រោះបច្ចុប្បន្នកំពុងតែបង្កភាពអនាធិបតេយ្យក្នុងខេត្តកំពតផងដែរ៕ដោយ៖ស តារា