សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យាន្តដ្ឋានជួសជុលនិងកែច្នៃរថយន្តមួយកន្លែងមានទីតាំងនៅភូមិតាង៉ូវ សង្កាត់និរោធ ខណ្ឌច្បារអំពៅ ត្រូវអគ្គិភ័យឆាបឆេះសម្ភារៈជាច្រើនប្រភេទ នៅក្នុងយាន្តដ្ឋាន ដែលករណីនេះត្រូវបានសមត្ថកិច្ចសន្និដ្ឋានថាបណ្តាលមកពីជាងផ្សារដែកខ្វះការប្រុងប្រយ័ត្នខ្ទាតផ្កាភ្លើងទៅលើសម្ភារៈជ័រ និងប្រេង បណ្តាលអោយឆេះសន្ធោសន្ធៅផ្សែងខ្មៅខ្មួលខ្មាញ់ពេញអាកាស ប៉ៈពាល់ដល់សំណង់នៅក្នុងបុរីប៉េង ហ៊ួត បឹងស្នោរ តែម្តង ចំណែកប្រភពមួយទៀតបានលើកឡើងថា បណ្តាលមកពីក្រុមជាងនាំគ្នាផឹកស៉ីសប្បាយហើយចោលកន្ទុយបារីទៅលើប្រេង បង្កជាអគ្គិភ័យតែម្តង ។
ករណីអគ្គិភ័យឆេះសម្ភារៈនៅក្នុងយាន្តដ្ឋានជួសជុលនិងកែច្នៃរថយន្ត អត់ច្បាប់នេះបានបង្កការភ្ញាក់ផ្អើលនៅវេលាម៉ោង៦,១០នាទី ព្រលប់ថ្ងៃទី ២៦ ខែមិថុនា ឆ្នាំ២០២១ នៅក្នុងភូមិតាង៉ូវ សង្កាត់និរោធ ខណ្ឌច្បារអំពៅ ។
តាមសាក្សីនៅកន្លែងកើតហេតុបាន ប្រាប់ថា មុនពេលកើតអគ្គិភ័យក្រុមជាងខ្លះបានបង្ហើយការងារដោយកាត់ផ្សារគ្រឿងដែកនៅក្នុងយាន្តដ្ឋាន និងខ្លះទៀតប្រមូលផ្តុំគ្នាផឹកស៉ីសប្បាយ ។ មួយសន្ទុះក្រោយមកស្រាប់តែមានផ្សែងខ្មៅខ្មួលខ្មាញ់ពេញអាកាស បង្កការភ្ញាក់ផ្អើលដល់អាជ្ញាធរ សមត្ថកិច្ច គ្រប់ផ្នែក ចេញទៅអន្តរាគមន៍បាញ់ពន្លត់ដើម្បីកុំអោយឆេះរីករាលដាលដល់លំនៅដ្ឋានប្រជាពលរដ្ឋនៅក្បែរកន្លែងកើតហេតុ ។
ទោះជាមានការខិតខំចេញអន្តរាគមន៍ពីប្រជាពលរដ្ឋនៅជុំវិញកន្លែងកើតហេតុ រួមទាំងអាជ្ញាធរសង្កាត់-ខណ្ឌ និងកម្លាំងនគរបាលពន្លត់អគ្គិភ័យយ៉ាងណាក៏ដោយ សំណង់លំនៅដ្ឋានមួយចំនួននៅក្នុងបុរីប៉េង ហ៊ួត បឹងស្នោរុំព័ទ្ធទៅដោយផ្សែងខ្មៅ តែមិនមានគ្រោះថ្នាក់ដល់មនុស្សឡើយ ខូចខាតតែសម្ភារៈមួយចំនួននៅក្នុងយាន្តដ្ឋាន ប៉ុណ្ណោះ ។
ក្នុងហេតុការគ្រោះអគ្គិភ័យនេះដែរ លោក ញាណ ច័ន្ទសោភា នាយករដ្ឋបាលសាលាខណ្ឌច្បារអំពៅបានដឹកនាំកម្លាំងផ្ទាល់ចុះទៅកាន់កន្លែងកើតហេតុដើម្បីពិនិត្យមើលពិទំហំនៃការខូចខាត ។ ប្រមាណជា២០នាទីក្រោយមកអគ្គិភ័យដែលឆេះសម្ភារៈនៅក្នុងយាន្តដ្ឋានជួសជុលនិងកែច្នៃរថយន្តត្រូវបានគ្រប់គ្រងទាំងស្រុង ខូចខាតតែសម្ភារៈមួយចំនួននៅក្នុងយាន្តដ្ឋានប៉ុណ្ណោះ ៕
ដោយ ៖ សណ្តោស
