សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ បុរសម្នាក់ត្រូវបានប្រជាពលរដ្ឋក្នុងភូមិប្រទះឃើញសាកសពអណ្តែតទឹកនៅមាត់ព្រែក ក្រោយពីបាត់ពីផ្ទះអស់មួយយប់ ហេតុការណ៍ភ្ជាក់ផ្អើលនេះបានកើតឡើងកាលពីព្រឹកថ្ងៃទី២៨ ខែមិថុនា ឆ្នាំ២០២១ នៅភូមិសំរោង ឃុំពោធិ៍ ស្រុកកំពង់លែង ខេត្តកំពង់ឆ្នាំង ។
សមត្ថកិច្ចបានឱ្យដឹងថា ជនរងគ្រោះមានឈ្មោះ ឡុច វៃ ភេទ ប្រុស អាយុ៥២ឆ្នាំ រស់នៅ ភូមិសំរោង ឃុំពោធិ៍ ស្រុកកំពង់លែង ជនរងគ្រោះរស់នៅតែម្នាក់ឯងទេ ។
ប្រជាពលរដ្ឋនៅកន្លែងកើតហេតុ បានប្រាប់សមត្ថកិច្ចឱ្យដឹងថា នៅមុនពេលកើតហេតុ កាលពីថ្ងៃទី២៧ ខែមិថុនា២០២១ ជនរងគ្រោះបានចម្លងគោតាមព្រែកឱ្យទៅស៊ីស្មៅតាមព្រែកពាមទន្លា ដូចសព្វដង ប៉ុន្តែនាថ្ងៃនេះ គេមិនឃើញបរុសរងគ្រោះមកផ្ទះដូចរាល់ដងនោះទេ ដោយសារតែគាត់នៅផ្ទះតែម្នាក់ឯង គេពុំចាប់អារម្មណ៍ប៉ុន្មាននោះទេ ។ លុះព្រឹកថ្ងៃទី២៨ ខែមិថុនា ប្រជាពលរដ្ឋក្នុងភូមិបានចុះទៅមាត់ទឹកដើម្បីចេញដំណើរតាមកាណូតស្មាច់ បម្រុងមកកំពង់ឆ្នាំង ដើម្បីទិញអីវ៉ាន់ ក៏ប្រទះឃើញសពជនរងគ្រោះអណ្តែតនៅមាត់ព្រែក ។ ក្រោយពីឃើញសពជនរងគ្រោះភ្លាម បានរាយការណ៍ទៅអាជ្ញាធរសមត្ថកិច្ច ដើម្បីចុះអន្តរាគមន៍ពិនិត្យមើលសាកសព ។
ក្រោយពេលទទួលបានព័ត៌មានខាងលើ កម្លាំងសមត្ថកិច្ចបានសហការជាមួយអាជ្ញាធរមូលដ្ឋាននិងក្រុមគ្រូពេទ្យចុះពិនិត្យ លទ្ធផលឃើញថាសពជនរងគ្រោះពិតជាបានស្លាប់ដោយលង់ទឹក ពិតប្រាកដមែន ។
ពលរដ្ឋនៅក្នុងភូមិបាននិយាយថា ជនរងគ្រោះជាមនុស្សដែលញៀនស្រាផឹកស្រវឹងមិនដែលដាច់ថ្ងៃណានោះទេ ឃើញតែស្រវឹងជាប់ជាប្រចាំ ប៉ុន្តែថ្ងៃនេះ មិនដឹងយ៉ាងម៉េចទើបបណ្តាលឱ្យលង់ទឹកស្លាប់តែម្តងទៅ ៕
ដោយ ៖ ចន្ថា
